ബിഹാറിലെ സ്കൂളുകളിൽ അധ്യാപകർക്കും ജീവനക്കാർക്കും ജീൻസും ടി-ഷർട്ടും വിലക്കി; ഔദ്യോഗിക വസ്ത്രധാരണം നിർബന്ധമാക്കി
ബിഹാറിലെ സർക്കാർ സ്കൂൾ അധ്യാപകർക്കും അധ്യാപകേതര ജീവനക്കാർക്കും ജോലിസമയത്ത് ഔദ്യോഗിക വസ്ത്രധാരണം നിർബന്ധമാക്കി വിദ്യാഭ്യാസ വകുപ്പ് ഉത്തരവിറക്കി. ഇതോടെ ജീവനക്കാർ സ്കൂളുകളിൽ ജീൻസും ടി-ഷർട്ടും ധരിച്ചെത്തുന്നതിന് വിലക്കേർപ്പെടുത്തി. സംസ്ഥാനത്തുടനീളം ഉത്തരവ് കർശനമായി നടപ്പിലാക്കുന്നുണ്ടെന്ന് ഉറപ്പുവരുത്താൻ ജില്ലാ വിദ്യാഭ്യാസ ഓഫീസർമാർക്ക് (DEO) നിർദേശം നൽകിയിട്ടുണ്ട്.
വിദ്യാഭ്യാസ വകുപ്പ് അഡീഷണൽ ചീഫ് സെക്രട്ടറി സി.കെ. അനിൽ ചുമതലയേറ്റതിന് തൊട്ടുപിന്നാലെയാണ് പുതിയ മാർഗനിർദേശങ്ങൾ പുറപ്പെടുവിച്ചത്. ഒക്ടോബർ 30 വെള്ളിയാഴ്ചയാണ് ഇതുസംബന്ധിച്ച കത്തുകൾ ജില്ലാ വിദ്യാഭ്യാസ ഓഫീസർമാർക്ക് അയച്ചത്.
ക്യാഷ്വൽ വസ്ത്രങ്ങൾക്ക് വിലക്ക്: ജോലി സമയത്ത് സ്കൂൾ വളപ്പിൽ ജീൻസ്, ടി-ഷർട്ട് തുടങ്ങിയ ക്യാഷ്വൽ വസ്ത്രങ്ങൾ ധരിക്കാൻ അനുവാദമില്ല. ചട്ടങ്ങൾ പാലിക്കാത്തവർക്കെതിരെ നടപടിയെടുക്കാൻ ഉദ്യോഗസ്ഥരോട് ആവശ്യപ്പെട്ടിട്ടുണ്ട്.
ഡി.ജെ, ഡിസ്കോ പാർട്ടികൾക്ക് നിരോധനം: സ്കൂൾ ക്യാമ്പസുകൾക്കുള്ളിൽ ഡി.ജെ, ഡിസ്കോ ആഘോഷ പരിപാടികൾ സംഘടിപ്പിക്കുന്നത് വിലക്കി. ലംഘിക്കുന്നവർക്കെതിരെ കടുത്ത നടപടിയുണ്ടാകും.
അതേസമയം ഇത് സംഗീതത്തിനോ സാംസ്കാരിക പഠനത്തിനോ ഉള്ള പൂർണ്ണ വിലക്കല്ല. പരമ്പരാഗത സംഗീത പഠനവും വാദ്യോപകരണങ്ങളുടെ ഉപയോഗവും തുടരാം. അക്കാദമിക് കലണ്ടറിലുള്ള ദിനാചരണങ്ങളും സാംസ്കാരിക പരിപാടികളും നടത്താൻ അനുമതിയുണ്ട്.
Content Highlights: Government school teachers and staff in Bihar are barred from wearing jeans and T-shirts