പൊളിക്കാത്ത നിലക്കടലയ്ക്കുള്ളിലും മീറ്റ് ബോള്‍സിലും വിദേശ കറന്‍സി; അന്തംവിട്ട് ഉദ്യോഗസ്ഥര്‍
ന്യൂഡല്‍ഹി: വിദേശ കറന്‍സി കടത്തിനായി കള്ളക്കടത്തുകാര്‍ സ്വീകരിച്ച പുതിയമാര്‍ഗങ്ങള്‍ കണ്ട് അന്തംവിട്ടിരിക്കുകയാണ് ഡല്‍ഹി വിമാനത്താവളത്തിലെ ഉദ്യോഗസ്ഥര്‍. സംശയകരമായ പെരുമാറ്റത്തെ തുടര്‍ന്ന് ഒരു യാത്രക്കാരനെ പരിശോധിച്ചപ്പോഴാണ് ഇന്നേവരെ കാണാത്തരീതിയില്‍ വിദേശകറന്‍സികള്‍ ഒളിപ്പിച്ചത് കണ്ടത്.
ഇന്ദിരഗാന്ധി അന്താരാഷ്ട്ര വിമാനത്താവളത്തിലെ മൂന്നാം ടെര്‍മിനിലിലാണ് മുറാദ് അലി (25) എന്ന യുവാവ് വിമാനമിറങ്ങിയത്. ഇതിനിടെ ഇയാളുടെ പെരുമാറ്റത്തില്‍ സംശയം തോന്നിയ സി.ഐ.എസ്.എഫ് ഉദ്യോഗസ്ഥര്‍ വിശദമായി പരിശോധിക്കാന്‍ തീരുമാനിച്ചു. മുറാദിന്റെ ബാഗും മറ്റും പരിശോധിച്ചപ്പോള്‍ ആദ്യനോട്ടത്തില്‍ ഒന്നും കണ്ടെത്താനായില്ല. എന്നാല്‍ ബാഗിനുള്ളിലെ ഭക്ഷ്യവസ്തുക്കളിലായിരുന്നു ലക്ഷക്കണക്കിന് രൂപയുടെ വിദേശ കറന്‍സി ഒളിപ്പിച്ചുവെച്ചിരുന്നത്.