മൂന്നുദിവസത്തെ തിരച്ചിലും വിഫലം; ശ്രീനന്ദ കാണാമറയത്ത്; തട്ടിക്കൊണ്ടുപോകൽ സംശയിച്ച് മാതാപിതാക്കൾ

മൈസൂരു:പാലക്കാട്ടുനിന്ന് കുടുംബത്തോടൊപ്പം വിനോദ സഞ്ചാരത്തിനെത്തി ചിക്കമഗളൂരുവിൽ കാണാതായ വിദ്യാർഥിനിക്കായുള്ള തിരച്ചിൽ മൂന്നാംദിവസവും വിഫലം. പാലക്കാട് കടമ്പഴിപ്പുറത്തെ രമേശ്, രോഹിണി ദമ്പതിമാരുടെ മകൾ ശ്രീനന്ദയെയാണ് (15) ചൊവ്വാഴ്ച വൈകീട്ടോടെ കാണാതായത്. കുട്ടിയെ കാണാതായ മാണിക്കധാര വെള്ളച്ചാട്ടത്തിലും ബാബാബുഡാൻ ഗിരികുന്നിലും വ്യാപകമായ തിരച്ചിലാണ് വ്യാഴാഴ്ചയും നടത്തിയത്. ബാബുഡാൻ കുന്നിലെ 300 അടി താഴ്ചയിൽവരെ തെൽമൽ ഡ്രോൺ ഉപയോഗിച്ച് വ്യാഴാഴ്ച പരിശോധന നടത്തിയിട്ടും കുട്ടിയെ കണ്ടെത്താനായിട്ടില്ല.

ചൊവ്വാഴ്ച വൈകീട്ട് 5.20-വരെ കുട്ടി മാതാപിതാക്കളുടെ കൂടെയുണ്ടായിരുന്നു. നാല് മിനിറ്റിനുള്ളിലാണ് യാത്രാസംഘത്തിൽനിന്ന് കുട്ടിയെ കാണാതാകുന്നത്. ഇതിനിടെ മകളെ തട്ടിക്കൊണ്ടുപോയിട്ടുണ്ടോയെന്ന് സംശയമുള്ളതായും ഉടൻ കണ്ടുപിടിച്ചുതരണമെന്നും ആവശ്യപ്പെട്ട് ശ്രീനന്ദയുടെ മാതാപിതാക്കൾ ചിക്കമഗളൂരു നോർത്ത് പോലീസിൽ വ്യാഴാഴ്ച പരാതിനൽകി. വിനോദസഞ്ചാരത്തിനെത്തിയ 40-ഓളം കുടുംബാംഗങ്ങളുടെ സംഘത്തിലെ അംഗമായിരുന്നു ശ്രീനന്ദ.

ചിക്കമഗളൂരു ഡെപ്യൂട്ടി കമ്മിഷണർ എൻ.എം. നാഗരാജ, പോലീസ് സൂപ്രണ്ട് ജിതേന്ദ്രകുമാർ ദയാമ എന്നിവർ നേരിട്ടാണ് രക്ഷാപ്രവർത്തനത്തിന് മേൽനോട്ടം വഹിക്കുന്നത്. റാപ്പിഡ് ആക്ഷൻ ഫോഴ്‌സ്, ദുരന്തനിവാരണ സേന, വനംജീവനക്കാർ, പോലീസ്, അഗ്നിരക്ഷാസേനാംഗങ്ങൾ എന്നിവരുടെ നേതൃത്വത്തിലാണ് തിരച്ചിൽ നടക്കുന്നത്. കുട്ടിക്കായി തിരച്ചിൽ ഊർജിതമാക്കണമെന്നും വനംമന്ത്രി ഈശ്വർ ബി. ഖന്ദ്രെ ഉദ്യോഗസ്ഥർക്ക് നിർദേശംനൽകി.

മലയാളി ടെക്കി യുവതി ശരണ്യയെ കുടകിൽ ട്രക്കിങ്ങിനിടെ കാണാതായത് വൻചർച്ചയായിരുന്നു. കാട്ടിനുള്ളിൽ നാലുദിവസം നടത്തിയ തിരച്ചിലിനൊടുവിൽ ആദിവാസിവിഭാഗമാണ് ശരണ്യയെ കണ്ടെത്തിയത്. ശ്രീനന്ദയുടെ തിരച്ചിലിൽ സജീവമായ ഇടപെടലാണ് കർണാടക നടത്തുന്നത്.

Content Highlights: 15-year-old Sreenanda missing during a family trip in Chikmagalur., Search operations enter the third day with drone surveillance in 300ft deep valleys., Parents filed a formal complaint with Chikmagalur North Police suspecting abduction., Multi-agency rescue team including NDRF and forest officials actively searching.