കല കൊലക്കേസ്; അന്വേഷണത്തിൽ പുരോഗതിയില്ല, പ്രതികൾ ചോദ്യംചെയ്യലിനോടു സഹകരിക്കുന്നില്ല

മാന്നാർ: ചെന്നിത്തല ഇരമത്തൂരിൽ മീനത്തേതിൽ കലയെ 15 വർഷംമുൻപ്‌ കൊലപ്പെടുത്തി സെപ്റ്റിക് ടാങ്കിൽ തള്ളിയെന്ന കേസിൽ അന്വേഷണത്തിൽ കാര്യമായ പുരോഗതിയില്ല. ഒന്നാംപ്രതിയും കലയുടെ ഭർത്താവുമായ അനിൽ ഇസ്രയേലിലാണ്. അറസ്റ്റിലായ മൂന്നുപ്രതികളെ തിങ്കളാഴ്ചവരെ കോടതി പോലീസ് കസ്റ്റഡിയിൽ വിട്ടിട്ടുണ്ട്. രണ്ടു ദിവസത്തിനുള്ളിൽ കസ്റ്റഡി കാലാവധി അവസാനിക്കുമ്പോൾ കാര്യമായ തെളിവുകൾ പോലീസിനു ശേഖരിക്കാനായിട്ടില്ല.

കഴിഞ്ഞ ചൊവ്വാഴ്ച പോലീസ് വൻ സന്നാഹങ്ങളോടെയെത്തി അനിലിന്റെ വീട്ടിലെ സെപ്റ്റിക് ടാങ്ക് തുറന്നുപരിശോധിച്ചപ്പോൾ കിട്ടിയ ദുർബലമായ തെളിവുകളിൽ കൂടുതലായി മറ്റൊന്നും ലഭിച്ചില്ലെന്നാണ് അറിയുന്നത്. എന്നാൽ, പോലീസ് യാതൊന്നുംതന്നെ വ്യക്തമാക്കുന്നില്ല.

സെപ്റ്റിക് ടാങ്കിൽനിന്ന്‌ ഒരു ഹെയർ ക്ലിപ്പ്, അടിവസ്ത്രത്തിന്റെ ഇലാസ്റ്റിക്, ഒരു ലോക്കറ്റ്, കറുത്ത ഏതോ ചെറിയ വസ്തുക്കൾ എന്നിവയാണ് ലഭിച്ചിട്ടുള്ളത്. ഇത് ഫൊറൻസിക് ലാബിലേക്ക് അയച്ചിരിക്കുകയയാണ്. ഇതിന്റെ ഫലം കിട്ടിയെങ്കിൽമാത്രമേ കലയുടെ കൊലപാതകവുമായി ഇതിനെ ബന്ധപ്പെടുത്താനാവൂ. അതിന് ഇനി ദിവസങ്ങളെടുക്കുമെന്നാണ് അറിയിരുന്നത്.

കഴിഞ്ഞദിവസം മൂന്നുപ്രതികളെയും വെവ്വേറെ പോലീസ് സ്റ്റേഷനുകളിൽ കൊണ്ടുപോയി ചോദ്യംചെയ്തു. എന്നാൽ, പ്രതികൾ ചോദ്യംചെയ്യലിനോടു സഹകരിക്കാത്തത് പോലീസിനെ കുഴയ്ക്കുന്നുണ്ട്. ഇക്കാരണത്താൽ ശനിയാഴ്ചയും തെളിവെടുപ്പിനുകൊണ്ടുപോകാൻ സാധിച്ചിട്ടില്ല. പ്രതികളുടെ കസ്റ്റഡി കാലാവധി നീട്ടിക്കിട്ടാൻ കോടതിയിൽ അപേക്ഷനൽകുമെന്നാണ് അറിയുന്നത്. ഒന്നാംപ്രതി അനിൽ കുമാറിനെ നാട്ടിലേക്കു കൊണ്ടുവരുന്നതിനുള്ള ശ്രമങ്ങളും ആരംഭിച്ചിട്ടുണ്ട്.

ഇന്റർപോളിന്റെ സഹായംതേടുന്നതിന്റെ ആദ്യപടിയായി വാറന്റ് പുറപ്പെടുവിക്കണമെന്ന് ആവശ്യപ്പെട്ട് പോലീസ് കോടതിയിൽ അപേക്ഷ നൽകി. അനിലിനെ നാട്ടിലെത്തിച്ചെങ്കിൽമാത്രമേ കേസിന്റെ മുന്നോട്ടുള്ള പോക്ക് സുഗമമാകൂ.

ഒട്ടേറെപ്പേരെ പോലീസ് ഇതിനോടകം ചോദ്യംചെയ്തു. അന്വേഷണ ഉദ്യോഗസ്ഥരായ ചെങ്ങന്നൂർ ഡിവൈ.എസ്.പി.ക്കും മാന്നാർ സി.ഐ.ക്കും സ്ഥലംമാറ്റത്തിന് ഉത്തരവിറങ്ങിയിട്ടുണ്ട്. അതിനാൽ പുതിയതായി വരുന്നവർ കാര്യമായി അന്വേഷിക്കട്ടെ എന്നരീതിയിൽ മെല്ലപ്പോക്ക് നടത്തുന്നതായും ആക്ഷേപമുണ്ട്.

Content Highlights: mannar murder no progress in investigation accused not cooperating with interrogation