കുട്ടികള്‍ മുറ്റത്തുനിന്ന് പൂക്കള്‍ പറിച്ചു; അങ്കണവാടി ടീച്ചറുടെ മൂക്ക് അറുത്തുമാറ്റി വീട്ടുടമ
ബെംഗളൂരു: കുട്ടികള്‍ വീട്ടുമുറ്റത്തുനിന്ന് പൂക്കള്‍ പറിച്ചതിന് അങ്കണവാടി വർക്കറായ സ്ത്രീയുടെ മൂക്ക് അറുത്തുമാറ്റി വീട്ടുടമ. കര്‍ണാടകയിലെ ബെലഗാവിയിലാണ് സംഭവം. അങ്കണവാടി വർക്കർ സുഗന്ധ മോറെയെ (50) ഗുരുതരമായ പരിക്കുകളോടെ സ്വകാര്യ ആശുപത്രിയില്‍ പ്രവേശിപ്പിച്ചു.
ബെലഗാവിയിലെ ബസുര്‍തെ ഗ്രാമത്തിലുള്ള അങ്കണവാടിയിലെ ചില കുട്ടികള്‍ കളിക്കുന്നതിനിടെ സമീപത്തെ വീട്ടുമുറ്റത്തുനിന്ന് പൂക്കള്‍ പറിച്ചിരുന്നു. ഇതില്‍ പ്രകോപിതനായ കല്യാണ്‍ മോറെ എന്ന വീട്ടുടമ കുട്ടികളെ ആക്രമിക്കാൻ ശ്രമിച്ചു. കുട്ടികളെ ആക്രമണത്തിൽനിന്ന് രക്ഷിക്കുന്നതിന് ഓടിയെത്തിയ സുഗന്ധയെ ഇയാൾ അരിവാള്‍ കൊണ്ട് ആക്രമിക്കുകയായിരുന്നു.
ആക്രമണത്തിൽ സുഗന്ധയുടെ മൂക്കിന്‍റെ ഭാഗം മുറിഞ്ഞുപോയി. കകാടി പോലീസ് സ്‌റ്റേഷനില്‍ പരാതി നല്‍കിയെങ്കിലും പ്രതിയെ ഇതുവരെ അറസ്റ്റ് ചെയ്തിട്ടില്ല.
കഴിഞ്ഞ ഡിസംബറിലും ബെലഗാവിയില്‍ ഒരു സ്ത്രീ ആക്രമിക്കപ്പെട്ടിരുന്നു. മകന്‍ പെണ്‍കുട്ടിയുമായി ഒളിച്ചോടി എന്നാരോപിച്ചാണ് വന്തമുറി ഗ്രാമത്തില്‍ സ്ത്രീയെ ആക്രമിക്കുകയും അര്‍ധനഗ്നയാക്കുകയും ചെയ്തത്.
Content Highlights: Karnataka man chops off Anganwadi worker’s nose after children pick flowers from his yard