സായയുടെ മരണം: രാത്രിയിൽ മൊഴിനൽകുന്നതിലെ ബുദ്ധിമുട്ട് അറിയിച്ചു; പോലീസിന് വീഴ്ചയില്ലെന്ന് എ.സി.പി.

കൊല്ലം: ഇരവിപുരത്ത് ഭർതൃവീട്ടിൽ മരിച്ചനിലയിൽ കണ്ടെത്തിയ സായയുടെ മരണവുമായി ബന്ധപ്പെട്ട് പോലീസ് അന്വേഷണത്തിൽ വീഴ്ചയുണ്ടായിട്ടില്ലെന്ന് എ.സി.പി. എസ്. ഷാജി പറഞ്ഞു. ലാപ്ടോപ്പ്, മൊബൈൽ ഫോൺ ഉൾപ്പെടെയുള്ള ഉപകരണങ്ങൾ വീണ്ടെടുത്ത് കോടതിയിൽ ഹാജരാക്കിയിട്ടുണ്ടെന്നും അദ്ദേഹം വ്യക്തമാക്കി.

ലാപ്ടോപ്പിലും മറ്റ് ഡിജിറ്റൽ ഉപകരണങ്ങളിലും എന്തെങ്കിലും വിവരങ്ങളുണ്ടോയെന്ന് പരിശോധനയിലൂടെയേ വ്യക്തമാകൂ. ഡിജിറ്റൽ ഉപകരണങ്ങളിൽനിന്ന് വിവരങ്ങൾ വീണ്ടെടുക്കാൻ സാധിക്കുമെന്നതിനാൽ തെളിവുകൾ നശിപ്പിച്ചെന്ന തരത്തിലുള്ള പ്രചാരണങ്ങൾക്ക് അടിസ്ഥാനമില്ലെന്നും അദ്ദേഹം പറഞ്ഞു.

ബന്ധപ്പെട്ടവരുടെ മൊഴിയെടുക്കാൻ 11 ദിവസം വൈകിയെന്ന ആരോപണവും അദ്ദേഹം നിഷേധിച്ചു. മൊഴിയെടുക്കാൻ പോലീസ് അന്നുതന്നെ ശ്രമിച്ചിരുന്നെങ്കിലും രാത്രിയിൽ മൊഴിനൽകുന്നതിലുള്ള ബുദ്ധിമുട്ട് ബന്ധപ്പെട്ടവർ അറിയിച്ചതിനെത്തുടർന്നാണ് നടപടികൾ വൈകിയതെന്ന് അദ്ദേഹം വിശദീകരിച്ചു.

കേസിൽ കൃത്യമായ മൊഴികളും തെളിവുകളും പരിശോധിച്ച് കൂടുതൽ അന്വേഷണം നടത്തും. കുറ്റം ചെയ്തിട്ടുണ്ടെങ്കിൽ നിയമനടപടി നേരിടേണ്ടിവരും. അന്വേഷണത്തിൽ പക്ഷപാതമോ ബാഹ്യ ഇടപെടലോ അനുവദിക്കില്ലെന്നും സായയുടെ കുടുംബത്തിന് സാധ്യമായ നീതി ഉറപ്പാക്കുമെന്നും എ.സി.പി. എസ്. ഷാജി പറഞ്ഞു.

Content Highlights: ACP S. Shaji stated there are no lapses in the Iravipuram Saya death investigation., Laptop and mobile phone have been recovered and submitted to the court., Police denied allegations of a 11-day delay in recording statements., Assurances given that justice will be ensured for Saya's family with no external interference.