ഫുഡ് ഡെലിവറി ഏജന്റിന്റെ വേഷത്തിലെത്തി ജൂവലറിയിൽ കവർച്ച നടത്തി രണ്ടംഗ സംഘം

ഗാസിയാബാദ്: ഫുഡ് ഡെലിവറി ഏജന്റുമാരുടെ വേഷത്തിലെത്തി ജൂവലറിയിൽ കവർച്ച നടത്തി രണ്ടം​ഗ സംഘം. ഉത്തർപ്രദേശിലെ ഗാസിയാബാദിലാണ് രണ്ടുപേർ ഫുഡ് ഡെലിവറി ബോയ്സിന്റെ വേഷത്തിലെത്തി നിമിഷങ്ങൾക്കുള്ളിൽ ആഭരണങ്ങൾ കവർന്നത്. സംഭവത്തിന്റെ സിസിടിവി ദൃശ്യങ്ങൾ പുറത്തുവന്നിട്ടുണ്ട്.

വ്യാഴാഴ്ച വൈകിട്ട് 3.30-ഓടെയായിരുന്നു സംഭവം. ബ്ലിങ്കിറ്റിന്റെയും സ്വിഗ്ഗിയുടെയും ഡെലിവറി ഏജന്റുമാരുടെ വേഷത്തിൽ ഹെൽമറ്റ് ധരിച്ചെത്തിയ പ്രതികൾ ജൂവലറി ജീവനക്കാരനെ തള്ളിമാറ്റി കടയിലേക്ക് തള്ളിക്കയറുകയായിരുന്നു. തുടർന്ന് ഇരുവരും വേഗത്തിൽ ഡിസ്‌പ്ലേ കെയ്സുകളിൽനിന്ന് ആഭരണങ്ങൾ വാരിയെടുത്ത് ബാ​ഗുകളിൽ നിറച്ചു. നിമിഷങ്ങൾക്കുള്ളിൽ ആഭരണങ്ങൾ കൈക്കലാക്കി പ്രതികൾ ഇരുചക്രവാഹനത്തിൽ സ്ഥലത്തുനിന്ന് രക്ഷപ്പെട്ടു.

കടയിൽനിന്ന് ഏകദേശം 20 കിലോഗ്രാം വെള്ളിയും 125 ഗ്രാം സ്വർണ്ണവും മോഷണം പോയിട്ടുണ്ടെന്നാണ് വിവരം. സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്.

Content Highlights: Two men disguised as food delivery agents robbed a Ghaziabad jewellery shop