മോഡിഫൈഡ് BMW M2-വിൽ റെയ്മണ്ട് CEO ഗൗതം സിംഘാനിയ; സുരക്ഷയ്ക്ക് സ്കോർപിയോയും ഫോർച്യൂണറും | VIDEO

ഇന്ത്യയിൽ ഏറ്റവും വലിയ വാഹനശേഖരമുള്ള വ്യവസായികളിൽ ഒരാളാണ് റെയ്മണ്ട് സിഇഒ ഗൗതം സിംഘാനിയ.വാഹനങ്ങളോടുള്ള അദ്ദേഹത്തിന്റെ താത്പര്യം ഏറെ പ്രശസ്തമാണ്. അടുത്തിടെ, മുംബൈയിൽ മോഡിഫിക്കേഷൻ ചെയ്ത ബിഎംഡബ്ല്യു M2-വിൽ പ്രത്യക്ഷപ്പെട്ട സിംഘാനിയുടെ വീഡിയോ ഇപ്പോൾ വൈറലാണ്. 

യൂട്യൂബിൽ 'മോട്ടോർഹെഡ്' പങ്കുവെച്ച വീഡിയോയിൽ, ഗൗതം തൻ്റെ സുരക്ഷാ സേനയുടെ അകമ്പടിയോടെ പെർഫോമൻസ് സ്പോർട്സ് കാർ ഓടിക്കുന്നതാണുള്ളത്. സ്കോർപിയോ ക്ലാസിക്, ഫോർച്യൂണർ എന്നിവയായിരുന്നു സുരക്ഷാ വാഹനവ്യൂഹത്തിൽ ഉണ്ടായിരുന്നത്. 

ഇന്ത്യൻ വിപണിയിൽ 1.03 കോടി രൂപ (എക്സ്-ഷോറൂം) വിലയിലാണ് പുതിയ M2 ബിഎംഡബ്ല്യു പുറത്തിറക്കിയത്. 3.0 ലിറ്റർ ടർബോചാർജ്ഡ് പെട്രോൾ എൻജിനാണ് ഈ 2-ഡോർ, 4-സീറ്റർ പെർഫോമൻസ് സ്പോർട്സ് കൂപ്പെയ്ക്ക് കരുത്തേകുന്നത്. ഇത് 480 എച്ച്.പി പീക്ക് പവറും 600 എൻഎം ടോർക്കും ഉത്പാദിപ്പിക്കുന്നു. 

ഗിയർബോക്സ് ഓപ്ഷനുകളിൽ 8-സ്പീഡ് ഓട്ടോമാറ്റിക്, 6-സ്പീഡ് മാനുവൽ എന്നിവ ഉൾപ്പെടുന്നു. ഓട്ടോമാറ്റിക് ട്രാൻസ്മിഷനിൽ നാല് സെക്കൻഡിലും മാനുവൽ ട്രാൻസ്മിഷനിൽ 4.2 സെക്കൻഡിലും 0-100 കിലോമീറ്റർ വേഗത കൈവരിക്കും.  

ഗൗതം സിംഘാനിയയുടെ ബിഎംഡബ്ല്യു M2-വിൽ നിരവധി കസ്റ്റമൈസേഷനുകൾ ഉണ്ട്. 2025 ബിഎംഡബ്ല്യു M2-വിന്റെ സ്റ്റാൻഡേർഡ് പതിപ്പിൽ പുനർരൂപകൽപ്പന ചെയ്ത എസി വെൻ്റ് ലേഔട്ട്, ഒരു എം അൽകന്റാര സ്റ്റിയറിങ് വീൽ, ടച്ച്‌സ്‌ക്രീൻ ഇൻഫോടെയ്ൻമെൻ്റ് യൂണിറ്റിന് കരുത്തേകുന്ന ഏറ്റവും പുതിയ OS8.5 സിസ്റ്റം എന്നിവയുണ്ട്.

സുരക്ഷാ ഫീച്ചറുകളിൽ ആറ് എയർബാഗുകൾ, ഡൈനാമിക് സ്റ്റെബിലിറ്റി കൺട്രോൾ, ആൻ്റി-ലോക്ക് ബ്രേക്കിങ് സിസ്റ്റം, ഓട്ടോമാറ്റിക് സ്റ്റെബിലിറ്റി കൺട്രോൾ, എം ഡൈനാമിക് മോഡ്, കോർണറിങ് ബ്രേക്ക് കൺട്രോൾ എന്നിവ ഉൾപ്പെടുന്നു.

Content Highlights: gautam-singhania-bmw-m2-mumbai