ആലപ്പുഴ : കേരള സ്റ്റേറ്റ് ഡ്രഗ്സ് ആൻഡ് ഫാർമസ്യൂട്ടിക്കൽസിന്റെ (കെ.എസ്.ഡി.പി.) നിർമാണം പൂർത്തിയാക്കിയ ഇൻജക്‌ഷൻ പ്ലാന്റിന്റെ ഉദ്ഘാടനവും നിർമാണം ആരംഭിക്കുന്ന ഓങ്കോളജി പാർക്കിന്റെ ശിലാസ്ഥാപനവും മുഖ്യമന്ത്രി പിണറായി വിജയൻ നിർവഹിച്ചു. ഇവ രണ്ടും പ്രവർത്തനക്ഷമമാകുന്നതോടെ സാധാരണക്കാർക്കു കുറഞ്ഞനിരക്കിൽ കാൻസറിനുൾപ്പെടെയുള്ള മരുന്നുകൾ നൽകാൻ സാധിക്കുമെന്നു മുഖ്യമന്ത്രി പറഞ്ഞു.
50 കോടി രൂപ മുതൽ മുടക്കിയാണ് ഇൻജക്‌ഷൻ പ്ലാൻറ് നിർമിച്ചത്. വർഷത്തിൽ 3.5 കോടി ആംപ്യൂളുകൾ, 1.30 കോടി വയൽസ്, 1.20 കോടി എൽ.വി.പി. മരുന്നുകൾ (ഉയർന്ന അളവിലുള്ള മരുന്നു ബോട്ടിലുകൾ), 88 ലക്ഷം തുള്ളിമരുന്നുകൾ (ഒഫ്താൽമിക്) എന്നിവ ഉത്‌പാദിപ്പിക്കും. പാരസെറ്റാമോൾ, ഡെക്സ്ട്രോസ്, സലൈൻ എന്നിങ്ങനെയുള്ള 14 ഇനം മരുന്നുകളും പ്ലാന്റിൽ ഉത്‌പാദിപ്പിക്കാൻ കഴിയും.
105 കോടി രൂപ കിഫ്ബി ഫണ്ടിൽനിന്ന്‌ മുതൽ മുടക്കിയാണ് ഓങ്കോളജി പാർക്ക് ഒരുക്കുന്നത്. 18 മാസത്തിനുള്ളിൽ നിർമാണം പൂർത്തീകരിച്ചു പാർക്കു പ്രവർത്തനക്ഷമമാക്കുമെന്നു മുഖ്യമന്ത്രി പറഞ്ഞു.
ഓങ്കോളജി പാർക്കു പദ്ധതി യാഥാർഥ്യമാകുന്നതോടെ ശരാശരി 300 എം.ജി. ഡോസേജുള്ള 600 ലക്ഷം ടാബ്ലെറ്റും ശരാശരി 350 എം.ജി. ഡോസേജുള്ള 450 ലക്ഷം ക്യാപ്‍സൂളുകളും അഞ്ച്‌ എം.എൽ. മുതലുള്ള ഒൻപതുലക്ഷം യൂണിറ്റ് ഇൻജക്‌ഷൻ മരുന്നുകളും ഉത്‌പാദിപ്പിക്കാൻ സാധിക്കും. ഇതോടെ കെ.എസ്.ഡി.പി., കാൻസർ മരുന്നു നിർമാണരംഗത്തു നിർണായക സ്ഥാനത്തേക്ക് ഉയരുമെന്നു മുഖ്യമന്ത്രി പറഞ്ഞു.
മന്ത്രി ഇ.പി. ജയരാജൻ അധ്യക്ഷത വഹിച്ചു. പൂട്ടലിന്റെ വക്കിൽനിന്നാണ് കെ.എസ്.ഡി.പി. 14.23 കോടി രൂപയുടെ റെക്കോഡ്‌ ലാഭത്തിലെത്തിച്ചതെന്നു മന്ത്രി പറഞ്ഞു.
അഞ്ചുവർഷത്തിനിടെ 250 കോടി രൂപ കെ.എസ്.ഡി.പി.ക്കുവേണ്ടി സംസ്ഥാന സർക്കാർ ചെലവഴിച്ചതായി പുതിയ അഡ്മിനിസ്ട്രേറ്റീവ് ബ്ലോക്കിന്റെ ഉദ്ഘാടനം നിർവഹിച്ചു മന്ത്രി ഡോ. ടി.എം. തോമസ് ഐസക് പറഞ്ഞു. ഒഫ്താൽമിക് സ്റ്റേഷന്റെ കമ്മിഷനിങ് മന്ത്രി കെ.കെ. ശൈലജ നിർവഹിച്ചു. എൽ.വി.പി. ബ്ലോ-ഫിൽ-സീൽ സ്റ്റേഷന്റെ കമ്മിഷനിങ് മന്ത്രി ജി. സുധാകരനും എസ്.വി.പി. വയൽ ഫില്ലിങ് സ്റ്റേഷന്റെ കമ്മിഷനിങ് മന്ത്രി പി. തിലോത്തമനും നിർവഹിച്ചു.
എച്ച്.വി.എ.സി. പ്ലാന്റ് സ്വിച്ച് ഓൺ എ.എം. ആരിഫ് എം.പി. നിർവഹിച്ചു. ജില്ലാ പഞ്ചായത്ത് പ്രസിഡന്റ് കെ.ജി. രാജേശ്വരി, കെ.എസ്.ഡി.പി. ചെയർമാൻ സി.ബി. ചന്ദ്രബാബു, ഡി. മഹീന്ദ്രൻ, ആർ. റിയാസ്, പി.പി. സംഗീത, ടി.വി. അജിത്‌കുമാർ, ജി. ബിജുമോൻ, സുദർശനാ ഭായി, ശാരിമോൾ എന്നിവർ പ്രസംഗിച്ചു. ഇൻജക്‌ഷൻ പ്ലാന്റ് ഉദ്ഘാടനം ചെയ്തു ഓങ്കോളജി പാർക്കിന്റെ ശിലാസ്ഥാപനവും നിർവഹിച്ചു
