RICE
കരിമോഡന്‍ നെല്ല്

ചിറ്റൂര്‍: ഔഷധഗുണമുള്ള കരിമോഡന്‍ ഇനം നെല്ലുമായി കുണ്ടരാംപാളയത്തെ യുവകര്‍ഷകന്‍ പീറ്റര്‍. കീടബാധ കുറവാണ്. ധാരാളം വൈക്കോലും കിട്ടും. ഒരു ഏക്കറില്‍ നിന്നും ഒരു ടണ്‍ നെല്ല് ലഭിക്കുമെന്നതും അധികം വെള്ളം ആവശ്യമില്ലെന്നതും പ്രധാനഗുണങ്ങളായി കര്‍ഷകന്‍ പറയുന്നു. 150 മുതല്‍ 160 ദിവസത്തിനുള്ളില്‍ വിളവെടുക്കാം.

ഈ നെല്ലിന്റെ ഉറവിടം ചൈനയിലാണെന്ന് കൃഷിവിദഗ്ധര്‍ പറയുന്നു. മറ്റ് നെല്‍ച്ചെടികളെക്കാളും പൊക്കമുണ്ട്. ആറടിവരെ ഉയരമുണ്ട്. ഒരടി അകലത്തിലാണ് നടുന്നത്. ഇക്കാരണത്താല്‍ തന്നെ കളപറി, വളപ്രയോഗം എന്നിവയ്ക്ക് സഹായമാണ്.

ഒരുതണ്ടില്‍ 35 ചിനപ്പുകള്‍വരെ ഉണ്ടാകും.  ഇടതൂര്‍ന്ന നെന്മണികളുള്ള കതിരുകളാണ് ഇതിന്റേത്. ഉയരം കൂടിയാലും കാറ്റിലും മഴയിലും വീഴാതെ പിടിച്ചുനില്‍ക്കാനുള്ള തണ്ടുബലം കരിമോഡനുണ്ട്.

ഹൃദയാഘാതം, പൊണ്ണത്തടി, കാന്‍സര്‍, പ്രമേഹം തുടങ്ങിയ രോഗമുള്ളവരാണ് അരി വാങ്ങുന്നതെന്ന് പീറ്റര്‍ അവകാശപ്പെടുന്നു. കിലോഗ്രാമിന് 330 രൂപയാണ് വില. തൃശ്ശൂര്‍ ഭാഗത്താണ് അരി കൂടുതലായും ചെലവാകുന്നത്. ജൈവരീതിയിലാണ് കൃഷി. തമിഴ്നാട്ടില്‍ പുതുക്കോട്ടയില്‍ നിന്നാണ് വിത്ത് വാങ്ങിയതെന്നും പീറ്റര്‍ പറഞ്ഞു.

Content Highlights: Young farmer from Palakkad cultivates Karimodal variety of paddy