ലോക്ഡൗണ്‍ കാലത്ത് ചക്കയുടെ വലുപ്പത്തെക്കുറിച്ചുള്ള നിരവധി വാര്‍ത്തകളാണ് പുറത്ത് വന്നത്. കൊല്ലം അഞ്ചലില്‍നിന്നുള്ള ചക്കയാണ് ആദ്യം വാര്‍ത്തയായത്. പിന്നാലെ അതിനേക്കാള്‍ തൂക്കവുമായി വയനാട്ടില്‍നിന്നും തിരുവനന്തപുരത്ത് നിന്നും ചക്കയെത്തി.

ഇപ്പോള്‍ മൂവാറ്റുപുഴയില്‍ നിന്ന് ഒരു ചക്കഭീന്‍ എത്തിയിരിക്കുകയാണ്. മൂവാറ്റുപുഴയ്ക്കടുത്ത് ഏനാനല്ലൂരിലെ കര്‍ഷകനായ വടക്കേക്കര നാരായണന്റെ വീട്ടിലാണ് വമ്പന്‍ ചക്ക വിളഞ്ഞത്. തൂക്കം 53.4 കിലോഗ്രാം. 120 സെന്റീമീറ്റര്‍ വണ്ണവും 90 സെന്റീമീറ്റര്‍ നീളവുമുണ്ട് ചക്കയ്ക്ക്.

വയനാട്ടിലും കൊല്ലത്തും തിരുവനന്തപുരത്തും ഭീമന്‍ചക്ക വിളഞ്ഞ വാര്‍ത്ത കഴിഞ്ഞമാസമാണ് പുറത്തുവന്നത്. വയനാട്ടിലെ ചക്കയ്ക്ക്  52.35 കിലോയും കൊല്ലത്തേതിന് 51.5 കിലോയും തൂക്കമുണ്ടായിരുന്നു. ഇവയെ വടക്കേക്കര വീട്ടിലെ ചക്ക പിന്തള്ളി. എന്നാല്‍ തിരുവനന്തപുരം, വെമ്പായത്ത് വിളഞ്ഞ വരിക്കച്ചക്കയ്ക്ക് 68.5 കിലോ തൂക്കവും ഒരു മീറ്റര്‍ നീളവുമുണ്ടായിരുന്നു. 

നിലത്തുനിന്ന് പറിക്കാവുന്ന ഉയരത്തിലായിരുന്നു ഇത്. 25 വര്‍ഷം പ്രായമുണ്ടെങ്കിലും വലിയ വലുപ്പമൊന്നുമില്ല പ്ലാവിന്. നാരായണനും മുട്ടം പോളിടെക്നിക്കിലെ അധ്യാപകനായ മകന്‍ അരുണും ചേര്‍ന്നാണ് ചക്ക താഴെയിറക്കിയത്. നല്ല കനംതോന്നിയപ്പോള്‍ തൂക്കിനോക്കിയതാണ്. അപ്പോഴാണ് ഇത് റെക്കോഡായിരിക്കുമല്ലോ എന്നുതോന്നിയത്.

Content Highlights: Weighing Over 50 kg, Giant Jackfruit from muvattupuzha