.jpg?$p=430c1f1&f=16x10&w=852&q=0.8)
ചിക്കു നന്ദന ഹൈദയോടൊപ്പം | ഫോട്ടോ: മാതൃഭൂമി
'ആമിക്ക് സാധാരണക്കാര്‍ വന്നാല്‍ ശ്രദ്ധകൊടുക്കാന്‍ താത്പര്യമില്ല. സിനിമാ മേഖലയില്‍നിന്നുള്ളവരോടാണ് പ്രിയം, പ്രത്യേകിച്ച് സംവിധായകരോട്. ബാഹുബലിയില്‍ പ്രഭാസിനൊപ്പമൊക്കെ അഭിനയിച്ച് കസറിയിട്ട് വര്‍ഷം കുറേ ആയി. എന്നാലും ആ പഴയ 'ഹാങ്ങ് ഓവര്‍' മാറിയിട്ടില്ല. ഇപ്പോള്‍ ഹൈദ വന്നതിനുശേഷം ആളുകള്‍ തന്നോട് താത്പര്യം കാണിക്കുന്നില്ല എന്ന പരിഭവവും പുള്ളിക്കാരിക്കുണ്ട്,'- ഭാവനാലോകത്ത് ഇങ്ങനെ പറഞ്ഞുവന്നത് തട്ട ഒരിപ്പുറത്തുള്ള നന്ദന ഫാമിലെ അന്തേവാസികളെപ്പറ്റിയാണ്.
ചിക്കു നന്ദനയുടെ ഉടമസ്ഥതയിലുള്ള ഈ ഫാമില്‍ ഗിനിപ്പന്നി മുതല്‍ ഒട്ടകംവരെയുള്ള മൃഗങ്ങളുണ്ട്. കൂടാതെ, വിവിധയിനം പക്ഷികളും. സിനിമാ ഷൂട്ടിങ്ങുകള്‍ക്കായി മൃഗങ്ങളെ എത്തിക്കുന്ന പരിപാടിയും ചിക്കുവിനുണ്ട്. അതുകൊണ്ടുതന്നെ ഇവിടെ കുറെയേറെ 'സിനിമാതാരങ്ങള്‍' ഉണ്ട്. 12 വയസ്സുകാരി ആമി നന്ദന എന്ന കുതിരയെപ്പറ്റിയാണ് ആദ്യം പറഞ്ഞത്. ബാഹുബലി കൂടാതെ ഈ അടുത്തിറങ്ങിയ 'സാറ്റര്‍ഡേ നൈറ്റ്' എന്ന ചിത്രത്തിലുമുണ്ട്. വളരെ ശാന്തശീലയായ ഇവളുടെ തൂവെള്ള നിറമാണ് ഏറ്റവും ആകര്‍ഷണം. ഇവള്‍തന്നെയാണ് കൂട്ടത്തിലെ മുതിര്‍ന്ന താരവും. ഇപ്പോള്‍ ഫാമിലെത്തുന്നവര്‍ക്ക് കൂടുതല്‍ ഇഷ്ടം ഹൈദ എന്ന ഒട്ടകത്തോടാണ്. ഹൈദ 'കായംകുളം കൊച്ചുണ്ണി'യില്‍ നിവിന്‍ പോളിയോടൊപ്പം 'അഭിനയിച്ചിട്ടുണ്ട്.' എന്നാല്‍, പുള്ളിക്കാരിക്ക് സിനിമകളേക്കാള്‍ കൂടുതല്‍ വിളികളെത്തുന്നത് സ്റ്റേജ് ഷോകളിലേക്കാണ്. എട്ട് വയസ്സുകാരിയായ ഇവള്‍ ചിക്കു നന്ദനയുടെകൂടെ എത്തിയിട്ട് രണ്ടുവര്‍ഷമാകുന്നു.
എന്നാല്‍, ഇവര്‍ക്കെല്ലാം മുമ്പ് ഇവിടത്തെ താരം മറ്റൊരാളായിരുന്നു. ബാഹുബലി, മാമാങ്കം, പത്തൊമ്പതാം നൂറ്റാണ്ട് തുടങ്ങി നിരവധി ചിത്രങ്ങളിലൂടെ പ്രേക്ഷകര്‍ക്ക് മുന്‍പിലെത്തിയ കുതിരയായ ആദിശങ്കര്‍ എന്ന ആദി നന്ദന. ചാര്‍ളി സിനിമയിലെ 'ഒരു കരിമുകിലിന്' എന്ന് തുടങ്ങുന്ന ഗാനത്തില്‍ ദുല്‍കര്‍ സല്‍മാനോടൊപ്പമെത്തിയത് ഏറെ ശ്രദ്ധിക്കപ്പെട്ടിരുന്നു. 15 വയസ്സുണ്ടായിരുന്ന ആദി കുറച്ചു മാസങ്ങള്‍ക്കുമുമ്പ് ചത്തു.
പഞ്ചവര്‍ണതത്തയില്‍ ജയറാമിനൊപ്പം അഭിനയിച്ച കഴുത അമ്മുവും ഇവിടെയുണ്ട്. റോമന്‍സ് സിനിമയില്‍ അഭിനയിച്ച മണിയന്‍ എന്ന കുതിരയും നേരത്തേ ഇവിടെയുണ്ടായിരുന്നു, ഇപ്പോളില്ല. സൂപ്പര്‍ഹിറ്റ് ചിത്രമായ 'തേന്‍മാവിന്‍കൊമ്പത്തി'ലെ കാളവണ്ടി ഇവിടെയുണ്ട്. ഇതിന് ഏകദേശം 150 വര്‍ഷത്തെ പഴക്കം കരുതപ്പെടുന്നു. കൂടാതെ, ബാഹുബലി സിനിമയ്ക്കുവേണ്ടി പീരങ്കികള്‍ നിര്‍മിച്ചു നല്‍കിയത് ചിക്കു നന്ദനയുടെ നേതൃത്വത്തിലായിരുന്നു.
സിനിമയില്‍ ഉപയോഗിച്ച ഒരെണ്ണം ഇവിടെ സൂക്ഷിച്ചിട്ടുണ്ട്. ഫാം തുടങ്ങിയിട്ട് 15 വര്‍ഷത്തോളമായെങ്കിലും പുറത്തുനിന്നുള്ള ആളുകള്‍ക്ക് കാണാനുള്ള പ്രദര്‍ശന രീതിയിലേക്ക് മാറ്റിയിട്ട് ഒരു വര്‍ഷം മാത്രം.
Content Highlights: birds and animals in chikku nandana's farm are celebrity film stars
Also Watch
RELATED STORIES
.jpg?$p=430c1f1&f=1x1&w=100&q=0.8)
IN CASE YOU MISSED IT
.jpg?$p=430c1f1&q=0.8&f=16x11&w=104)
.jpg?$p=79c0b37&q=0.8&f=16x11&w=104)
.jpg?$p=430c1f1&q=0.8&f=16x11&w=104)
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..