ഡെസ്റ്റിനേഷന്‍ - വിദേശം

ഹക്കകളുടെ വീട്ടില്‍...

Text: Suresh Desham

 

പുറമടച്ച്, അകം തുറന്ന്- ചൈനയിലെ ഹക്കകളുടെ വീട് അങ്ങിനെയാണ്. വട്ടക്കോട്ട പോലെ. ഒറ്റ വീട്ടില്‍ നിരവധി വീടുകളുണ്ടാവും. നടുക്കൊരു മുറ്റം. മുറ്റത്തൊരു കിണര്‍. കളിസ്ഥലം. കൃഷിക്കളം. ഒരു ജനതയുടെ ജീവിതവും വീടും എങ്ങിനെയെല്ലാം ബന്ധപ്പെട്ടിരിക്കുന്നു എന്നതിന്റെ നിദര്‍ശനം. അദ്ഭുതമുണര്‍ത്തുന്ന ഈ ചൈനീസ് വാസ്തുഗ്രാമത്തിലേക്ക്...


എന്റെ കമ്പ്യൂട്ടര്‍ ഡെസ്‌ക്ടോപ്പില്‍ ഒരു നാലുകെട്ടിന്റെ വാള്‍പേപ്പര്‍ ഉണ്ടായിരുന്നു. അതെന്റെ നാടിനോടുള്ള സ്‌നേഹമായിരുന്നു. അഭിമാനവുമായിരുന്നു. പ്രകൃതിയോടിണങ്ങി മഞ്ഞും മഴയും കണ്ട് നടുമുറ്റത്തെ കൂട്ടായ്മകളും കുന്നായ്മകള്‍ക്കും സാക്ഷ്യംവഹിച്ച് ജീവിച്ചുപോന്ന ഒരു തലമുറയെ കുറിച്ചുള്ള ഗൃഹാതുരത. ചിത്രം കണ്ട് ചൈനീസ് സുഹൃത്ത് ഹാന്‍പെങ് മിന്‍ (വായില്‍കൊള്ളാത്തതുകൊണ്ട് ഞങ്ങള്‍ ലിയോ എന്നു വിളിക്കുന്നു.) ഇതെന്താണെന്ന് എന്നോട് ചോദിച്ചപ്പോള്‍ ഞാന്‍ വാചാലനായതും അതുകൊണ്ട് തന്നെ. പക്ഷെ അവനെന്റെ ആവേശമെല്ലാം കെടുത്തികളഞ്ഞു. ഇതിനെ വെല്ലുന്ന ഒരു സംഭവം ചൈനയിലുണ്ടെന്നാണ് അവന്‍ പറഞ്ഞത്. പത്തുവര്‍ഷമായി ചൈനയില്‍ ജീവിച്ചുവരുന്നെങ്കിലും ഞാനങ്ങനെയൊരു കാര്യം കേട്ടിട്ടുണ്ടായിരുന്നില്ല. കുഴപ്പം ചൈനയുടേതല്ല, എന്റെയാണ്. ബിസിനസ് ജോലി തിരക്കുകള്‍ക്കിടയില്‍ ഇതൊന്നും ശ്രദ്ധയില്‍പെടാത്തതില്‍ എനിക്കൊരു കുറ്റബോധം തോന്നി. എന്നാലിതൊന്ന് കണ്ടിട്ടു തന്നെ കാര്യം എന്നും ഞാനുറച്ചു. ലിയോ തന്നെ യാത്ര ഏര്‍പ്പാടാക്കി. ബിസിനസിനായും അല്ലാതെയും ചൈനയില്‍ പലയാത്രകളും നടത്തിയിട്ടുണ്ടെങ്കിലും ഈ അനുഭവം തികച്ചും വ്യത്യസ്തമായിരുന്നു.

ഞാന്‍ താമസിച്ചിരുന്ന ഫ്യൂജിയാന്‍ പ്രവിശ്യയിലെ നാന്‍ജിങ് എന്ന സ്ഥലത്തേക്കാണ് യാത്ര. ഏകദേശം ഒരു മണിക്കൂര്‍ നീണ്ട ഹൈവേയാത്രയ്ക്കു ശേഷം നാന്‍ജിങ് ഉള്‍വീഥികളിലേക്ക് കടന്നപ്പോള്‍ വിനോദസഞ്ചാരവകുപ്പിന്റെ സ്വാഗതമോതുന്ന ബോര്‍ഡുകള്‍. വഴിക്ക് ഇരുവശവും ഗ്രീന്‍ടീ കൃഷിയുള്ള മലമ്പ്രദേശങ്ങള്‍. അപ്രതീക്ഷിതമായ മഴയില്‍ മണ്ണിടിഞ്ഞ് വഴിയില്‍ ഗതാഗതകുരുക്ക്് ഉണ്ടായിരുന്നു. യാത്ര ചെറുതായി തടസ്സപ്പെട്ടെങ്കിലും കുളിര്‍മ്മയുള്ള ഒരിളം കാറ്റ് കൂട്ടിനെത്തിയതുകൊണ്ട് വിരസതയില്ല.

വലിയൊരു പ്രവേശന കവാടവും ടിക്കറ്റ് കൗണ്ടറും എത്തിയപ്പോള്‍ വണ്ടി നിര്‍ത്തി. സുഹൃത്ത് ഞങ്ങള്‍ക്കുള്ള ടിക്കറ്റ് വാങ്ങി. കൂടെ ഒരു ഗൈഡിനേയും കൂട്ടി യാത്ര തുടര്‍ന്നു. വീണ്ടും നാല് കിലോമീറ്ററോളം യാത്രയുണ്ട് സ്ഥലത്തേക്ക്. വളവുകളും കയറ്റിറക്കങ്ങളും നിറഞ്ഞ വഴികള്‍. മരങ്ങളും മുളകളും നിറഞ്ഞ പ്രദേശം. മലകളുടെ ഇടയില്‍ നിന്ന് ചെറിയരീതിയില്‍ വെള്ളം താഴേക്ക് ഒഴുകുന്നു. കാണാത്ത ചിലയിനം പക്ഷികള്‍. ഒരു ഉയര്‍ന്ന പ്രദേശത്ത് വണ്ടി നിര്‍ത്തി ഞാന്‍ താഴോട്ട് നോക്കി. താഴ്‌വരയില്‍ വൃത്താകൃതിയിലും ചതുരാകൃതിയിലും ഉള്ള ഹക്ക ഹൗസുകള്‍. തുറന്നുവെച്ച ഉരുളികള്‍ പോലെ. കൊച്ചുകൊച്ചു കോട്ടകള്‍ പോലെ. ശരിക്കും ഒരു വിസ്മയലോകം. ഹക്കവീടുകളുടെ ചിമ്മിനിയിലൂടെ പുകയുയരുന്നുണ്ട്. ഉച്ചഭക്ഷണത്തിനുള്ള തയ്യാറെടുപ്പിലാണവര്‍. ഗൈഡ് വിശദീകരിച്ചു..

ഹക്ക വീടുകളുടെ ചരിത്രത്തിലേക്കയാള്‍ കടന്നു. ചൈനയുടെ മധ്യഭാഗത്ത് പലയിടങ്ങളില്‍ താമസിച്ചിരുന്ന ഹക്ക ഭാഷ സംസാരിക്കുന്ന ഹാന്‍ ചൈനീസ് വംശജരുടേതാണീ വീടുകള്‍. ചൈനയുടെ തെക്കുഭാഗമായ ഗ്വാങ്ങ്‌ദോങ്ങ്, ഫ്യൂജിയാന്‍ പ്രവിശ്യകളിലേക്ക് ഇവര്‍ കുടിയേറിയകാലത്താണ് ഇവ പണിതത്. പരിചയമില്ലാത്ത സ്ഥലത്ത് കുടിയേറി ജീവിതം ഉറപ്പിക്കുമ്പോഴുള്ള അരക്ഷിതാവസ്ഥയില്‍ അവര്‍ കൂട്ടമായി ജീവിച്ചു, വീട് ശരിക്കും ഒരു കോട്ടപോലെതന്നെയായിരുന്നു തുളോ (Tulou) എന്നറിയപ്പെടുന്ന ഈ വീടുകള്‍. വട്ടത്തിലും ചതുരാകൃതിയിലും ഇവ നിര്‍മ്മിക്കുന്നു. താഴത്തെ നിലയില്‍ പുറത്തേക്ക് ജനലുകള്‍ ഇല്ല. പ്രവേശനകവാടം ഒന്നു മാത്രം. ഓരോ നിലകള്‍ക്കും ഓരോ ഉദ്ദേശ്യവുമുണ്ട്. താഴത്തെ നിലയില്‍ കന്നുകാലികളെ പാര്‍പ്പിക്കുന്നു. ഗൈഡ് ഇത് പറഞ്ഞപ്പോള്‍ അത് ചരിത്രം മാത്രമാണെന്നു ഞങ്ങള്‍ക്ക് മനസിലായി. കാരണം ഇപ്പോള്‍ അവിടെ വിനോദസഞ്ചാരികള്‍ക്കു വില്‍പ്പനയ്ക്കായി പല വസ്തുക്കളും നിരത്തിയിരിക്കുന്നു. രണ്ടാമത്തെ നില ഭക്ഷ്യവസ്തുക്കള്‍ സൂക്ഷിക്കുന്ന അറകളാണ്. മൂന്നാമത്തെ നില മുതലാണ് താമസവും മറ്റ് കാര്യങ്ങളും.

പ്രവേശനത്തിനുള്ള ഏകകവാടത്തിലൂടെ അകത്തുചെല്ലുമ്പോള്‍ ഒരു വലിയ നടുമുറ്റവും അതില്‍ ഒരു കിണറും കാണാം. പുറംഭിത്തി മാത്രമേ മണ്ണുകൊണ്ടും കല്ലുകൊണ്ടും നിര്‍മ്മിച്ചിട്ടുള്ളു എന്നു തോന്നി. കാരണം അകത്ത് എല്ലാം മരങ്ങള്‍ കൊണ്ടുള്ള നിര്‍മ്മാണ രീതി ആണ്. വലിയ തൂണുകളും ഭിത്തികളും മേല്‍ക്കൂരകളും വാതിലും ജനലും ഗോവണിപ്പടികളും എല്ലാം പൂര്‍ണമായും മരത്തില്‍ ആണ്. വളരെ വീതി കൂടിയ പുറംഭിത്തി ശക്തിയായ കാറ്റ്, ഭൂചലനം, അതി ശീതശൈത്യ കാലാവസ്ഥ എന്നിവയില്‍ നിന്ന് സംരക്ഷണം നല്‍കുന്നതിലുപരി, ശത്രുക്കളുടെ ആക്രമണങ്ങളില്‍ നിന്ന് സംരക്ഷണവും നല്‍കുന്നു എന്ന് തത്വം.

വൃത്താകൃതിയിലുള്ള വീടുകള്‍ മൂന്നായി തിരിച്ചിരിക്കുന്നു. ചെറുത്, വലുത്, ഇടത്തരം വൃത്തവലിപ്പത്തില്‍ ഭൂരിഭാഗം വീടുകളും മൂന്നുനിലകളുള്ളതാണ്. ഇതില്‍ ഏകദേശം 20 കുടുംബങ്ങള്‍ (നൂറോളം അംഗങ്ങള്‍) താമസിക്കുന്നു. അവരുടെ എല്ലാ ആഘോഷങ്ങളും വിവാഹാദി കര്‍മ്മങ്ങളും ഈ നടുമുറ്റങ്ങളില്‍ ആഘോഷിക്കുന്നു.
Go to Pages »
1| 2 |
TAGS:
HAKKA  |  CHINA  |  MUD BUILDINGS  |  YONGDING 

അഭിപ്രായമെഴുതുന്നവര്‍ ശ്രദ്ധിക്കേണ്ട ചില വസ്തുതകള്‍:
അസഭ്യങ്ങളും അധിക്ഷേപങ്ങളും പാടേ നിരസിക്കും. ഒന്നുകില്‍ ഇംഗ്ലീഷിലോ അല്ലെങ്കില്‍ മലയാളത്തിലോ വേണം അഭിപ്രായം. മംഗ്ലീഷ് വേണ്ട. മലയാളം ടൈപ്പ് ചെയ്യാന്‍ അറിയാത്തവര്‍ക്ക് ഇംഗ്ലീഷില്‍ ടൈപ്പ് ചെയ്ത് മലയാളമാക്കുന്നതിനുള്ള സംവിധാനം ഏര്‍പ്പെടുത്തിയിട്ടുണ്ട്. അത് ഉപയോഗപ്പെടുത്താം.




http://whos.amung.us/stats/readers/ufx72qy9661j/