കോളം - ജി. ഷഹീദ്‌

അഞ്ചരയ്ക്കുള്ള പോത്ത്‌

Photos: N A Naseer

 


കാടിന്റെ ഘനഗംഭീരമായ ആത്മാവിന്റെ പ്രതിരൂപമാണ് കാട്ടുപോത്തുകള്‍. കാട്ടുപോത്തുകളെത്തേടിയുള്ള യാത്രകള്‍ വൈല്‍ഡ്‌ലൈഫ് ഫോട്ടോഗ്രാഫര്‍ എന്‍.എ. നസീര്‍ ഓര്‍ത്തെടുക്കുന്നു



മൂന്നാര്‍-കൊടൈക്കനാല്‍റൂട്ടിലാണ് ഏറ്റവും വലിയ കാട്ടുപോത്തുകളെ ഞാന്‍ കണ്ടിട്ടുള്ളത്. അവിടെ ഞങ്ങള്‍ അഞ്ചരയ്ക്കുള്ള പോത്തെന്ന് വിളിക്കുന്ന ഒരു കൂറ്റനുണ്ടായിരുന്നു. അഞ്ചരയ്ക്കുള്ള ബസ് പോയ്കഴിയുമ്പം അവന്‍ കൃത്യമായി റോഡിലിറങ്ങും. അതു വഴി പോകുന്ന യാത്രികര്‍ക്കും ഗൈഡുകള്‍ക്കും അവന്‍ സുപരിചിതനായി. പിന്നീടെപ്പെഴോ വേട്ടക്കാരുടെ തോക്കിനിരയായി. ഇപ്പോഴും അഞ്ചരയ്ക്കാ വഴി കടന്നുപോകുമ്പോള്‍ അറിയാതെ കാത്തിരുന്നു പോകും അവനെ.'' ആനയെയും കരടിയെയും കടുവയെയും ക്യാമറയുമായി പിന്തുടര്‍ന്നിട്ടുള്ള നസീറിന് കാട്ടുപോത്തുകളും നിരവധി അവിസ്മരണീയമായ അനുഭവങ്ങള്‍ സമ്മാനിച്ചിട്ടുണ്ട്.

''നെല്ലിയാംപതിയിലെ കാട്ടില്‍ കാട്ടുപോത്തുകളെ തേടി നടക്കുകയായിരുന്നു. കൂടെ വനംവകുപ്പിലെ വാച്ചര്‍ മണികണ്ഠനും. മണികണ്ഠനെ കണ്ടാല്‍ കാട്ടുപോത്തുകള്‍ക്ക് കലിയിളകും എന്നു കേട്ടിട്ടുണ്ടായിരുന്നു. കാട്ടുപോത്തിനെ ദൂരെ നിന്ന് കണ്ടപ്പോഴേ മണികണ്ഠന് ടെന്‍ഷന്‍.
''സാര്‍ അതിപ്പം വരും നമുക്ക് ജീപ്പില്‍ കയറാം.''
''നിങ്ങള്‍ മിണ്ടാണ്ടിരി അതൊന്നും ചെയ്യില്ല.''
''അല്ല സാര്‍ അതിപ്പം വരും.''
പറഞ്ഞു തീര്‍ന്നതും അവനൊന്ന് ചീറി, പിന്നൊരു കുതിപ്പായിരുന്നു. കാളപ്പോരിന്റെ കരുത്തും ശൗര്യവും ഒരു കൊടുംകാറ്റ് പോലെ.... മണികണ്ഠന്‍ ഓടി. തൊട്ടു തൊട്ടില്ലെന്ന മട്ടില്‍ ഞാനൊഴിഞ്ഞുമാറി. ഡ്രൈവര്‍ ജീപ്പ് സ്റ്റാര്‍ട്ട് ചെയ്തതു. അതിന്റെ മുരള്‍ച്ച കേട്ടപ്പോള്‍ അവന്‍ നിന്നു. പിന്നെ മടങ്ങി. ഒരു ചുഴലി ഒഴിഞ്ഞപോലെ ഞങ്ങള്‍ ആശ്വസിച്ചു. ജീപ്പില്ലായിരുന്നെങ്കില്‍ മണികണ്ഠന്റെ കഥ അന്നു കഴിയുമായിരുന്നു.'' വന്യജീവി ഫോട്ടോഗ്രാഫറായ എന്‍. എ. നസീറിന്റെ അനുഭവങ്ങളില്‍ ഒരിക്കലും മറക്കാനാവാത്ത ഒന്നാണ് മണികണ്ഠനുമായുള്ള കാട്ടുപോത്തുകളുടെ ഈ സംഘര്‍ഷം. മണികണ്ഠന്‍ ഓടി രക്ഷപ്പെടുന്ന കാഴ്ച ഇന്നും നസീറിന്റെ കണ്മുന്നിലുണ്ട്.

മണികണ്ഠന് കാട്ടിനടുത്ത് കൃഷിയുണ്ടായിരുന്നു. മൃഗങ്ങളെ ഓടിക്കാന്‍ ശബ്ദമുണ്ടാക്കുകയും തീ കൂട്ടുകയുമൊക്കെ ചെയ്യുമായിരുന്നു. ഇതിന്റെ പകയാവണം ഇതിനു പിന്നിലെന്ന് എനിക്കു തോന്നുന്നു. ചില മണങ്ങളും ശബ്ദങ്ങളും അവ ഒരിക്കലും മറക്കില്ല.

കാഴ്ചയില്‍ കാട്ടുപോത്ത് ഭീകരന്‍. കൊടും ഭീകരന്‍. എന്നാല്‍ ഒരിക്കലും ഉപദ്രവകാരിയായി പെരുമാറിയിട്ടില്ലെന്ന് നസീര്‍. പലപ്പോഴും ഓടിയകലുകയാണ് അവന്‍ ചെയ്യുക. ആനകള്‍ക്കിടയിലെന്ന പോലെ കാട്ടുപോത്തുകള്‍ക്കിടയിലും ഒറ്റയാനെ കാണാം. പക്ഷെ അവ അപകടകാരിയല്ല. പ്രായം കൂടുതലുള്ളവയാണ് ഒറ്റയ്ക്ക് സഞ്ചരിക്കുന്നത്.

പറമ്പിക്കുളത്തെ കാട്ടുപോത്തുകള്‍ക്ക് ഒരു പ്രത്യേകതയുണ്ട്. നസീര്‍ പറയുന്നു. ജീപ്പ് കണ്ടാല്‍ വഴിമാറില്ല. 'അല്‍പ്പം കഴിഞ്ഞിട്ട് പോകാം' എന്ന ഭാവം. തുറിച്ചു നോക്കി അല്‍പ്പനേരം നിന്നെന്നും വരാം. പക്ഷെ ഭയപ്പെടേണ്ടതില്ല എന്നാണ് നസീറിന്റെ അനുഭവം. പതുക്കെ അവ പിന്‍വാങ്ങിക്കൊള്ളും.

ജീപ്പില്‍ രാത്രി സഞ്ചരിച്ച് കാട്ടുപോത്തുകളെ ഷൂട്ട് ചെയ്യുന്നതിന്റെ ത്രില്‍ നസീര്‍ ഏറെ ആസ്വദിച്ചിട്ടുണ്ട്. 'അതൊരനുഭവം തന്നെയാണ്. ദൂരെ നിന്ന് ലൈറ്റ് കാണുമ്പോള്‍തന്നെ അവ തലയുയര്‍ത്തും. കണ്ണുകള്‍ തീക്കട്ട പോലെ തിളങ്ങും. പരിചയസമ്പന്നരായ ഡ്രൈവര്‍മാരാണെങ്കില്‍ കാട്ടുപോത്തിന്റെ തൊട്ടുത്തു വരെ ജീപ്പുമായി ചെല്ലും. അപ്പോഴും പരിഭവമില്ലാതെ അവന്‍ നില്‍ക്കും. പിന്നെ, നിശ്ശബ്ദം വനത്തിനുള്ളിലേക്കു കയറിപ്പോകും.

സുദീര്‍ഘമായ വൈല്‍ഡ് ഫോട്ടോഗ്രാഫി കരിയറില്‍ പശ്ചിമഘട്ടത്തിലെങ്ങും കാട്ടുപോത്തുകളെത്തേടി അലഞ്ഞിട്ടുണ്ട് നസീര്‍. വയനാട്ടിലും പറമ്പിക്കുളത്തും നെല്ലിയാമ്പതിയിലും തേക്കടിയിലും ചിന്നാറിലും ഇരവികുളത്തുമെല്ലാം അവയെ പിന്തുടര്‍ന്ന് ഷൂട്ട് ചെയ്തിട്ടുണ്ട്. ഇരവികുളത്താണ് അവയെ കാണാന്‍ ഏറ്റവും പ്രയാസമുള്ളതെന്ന് നസീര്‍ പറയുന്നു.

കാട്ടുപോത്തുകളെത്തേടിയുള്ള യാത്രയിലെ ഏറ്റവും ഹൃദയഹാരിയായ കാഴ്ച തേക്കടിയിലെ പൂവരശിയിലാണ് നസീര്‍ കണ്ടത്. നോക്കെത്താത്ത പുല്‍മേടുകളില്‍ കൂട്ടംകൂട്ടമായി കാട്ടുപോത്തുകള്‍ ഇളംവെയിലില്‍ മേഞ്ഞുനടക്കുന്ന ആ കാഴ്ച ഒരിക്കലും മറക്കില്ല. 60ലേറെ പോത്തുകള്‍ അന്നാ സംഘത്തിലുണ്ടായിരുന്നുവെന്ന് നസീര്‍ ഓര്‍ക്കുന്നു. പറമ്പിക്കുളത്തും ഇതുപോലെ വലിയ കൂട്ടങ്ങളെ കണ്ട ദിവസങ്ങള്‍ നസീര്‍ തന്റെ ഡയറിയില്‍ രേഖപ്പെടുത്തിയിട്ടുണ്ട്.
Go to Pages »
1| 2 |
TAGS:
GAUR  |  BISON  |  NELLIYAMPATHY  |  MUNNAR 

അഭിപ്രായമെഴുതുന്നവര്‍ ശ്രദ്ധിക്കേണ്ട ചില വസ്തുതകള്‍:
അസഭ്യങ്ങളും അധിക്ഷേപങ്ങളും പാടേ നിരസിക്കും. ഒന്നുകില്‍ ഇംഗ്ലീഷിലോ അല്ലെങ്കില്‍ മലയാളത്തിലോ വേണം അഭിപ്രായം. മംഗ്ലീഷ് വേണ്ട. മലയാളം ടൈപ്പ് ചെയ്യാന്‍ അറിയാത്തവര്‍ക്ക് ഇംഗ്ലീഷില്‍ ടൈപ്പ് ചെയ്ത് മലയാളമാക്കുന്നതിനുള്ള സംവിധാനം ഏര്‍പ്പെടുത്തിയിട്ടുണ്ട്. അത് ഉപയോഗപ്പെടുത്താം.




http://whos.amung.us/stats/readers/ufx72qy9661j/