കോളം
- ജി. ഷഹീദ്
മൈ ഡിയര് കരടി
Posted on: 12 Sep 2011
Photos: N A Naseer
കരടി അപകടകാരിയല്ല. ഒരു ഫോട്ടോഗ്രാഫറുടെ അനുഭവ സാക്ഷ്യം...
രോമക്കുപ്പായം അണിഞ്ഞ ആള്പ്പിടിയന്. മനുഷ്യരൂപമുള്ള അപകടകാരി. കരടിയെക്കുറിച്ച് ഇങ്ങനെ പല തെറ്റിദ്ധാരണകളുമുണ്ട്. മനുഷ്യനെ കണ്ടാല് കൂര്ത്ത നഖങ്ങള്കൊണ്ട് കീറിമുറിക്കും എന്നതാണ് കഥകള്. പക്ഷെ നീണ്ട പതിനഞ്ച് വര്ഷങ്ങളായി കരടിയുമായി കാട്ടില്വെച്ച് മുഖാമുഖം കണ്ടിട്ടുള്ള പ്രശസ്ത വന്യജീവി ഫോട്ടോഗ്രാഫര് എന്.എ.നസീര് പറയുന്നത് ഇങ്ങനെയാണ് 'കരടിയുടെ സൗഹൃദം എന്നെ പലപ്പോഴും അത്ഭുതപ്പെടുത്തിയിട്ടുണ്ട്'
പറമ്പിക്കുളത്തെ കുരിയാര്ക്കുട്ടിയില് വെച്ച് വര്ഷങ്ങള്ക്ക് മുന്പ് നസീറിന്റെ ക്യാമറ കണ്ടപ്പോള് ആദിവാസിയായ സോമനാഥന് പറഞ്ഞു; 'ഇന്ന് കരടിയെ ക്യാമറയില് കിട്ടും' വാക്കുകള് ഫലിച്ചു. സ്വാമിനാഥന്റെ ശബ്ദം ഇപ്പോഴും നസീറിന്റെ കാതുകളില് മുഴങ്ങുന്നു. കാട്ടില് പോകുന്ന പലരും കരടിയെ ഭയപ്പെടുന്നു. കുരിയാര്ക്കുട്ടിയില് കരടിയുടെ ഭീകര ആക്രമണത്തിന് വിധേയനായ ഒരു ഫോറസ്റ്റ് വാച്ചര് ആരുടെയും മനസ്സിനെ വേദനിപ്പിക്കും. ഒരു കണ്ണ് നഷ്ടപ്പെട്ടു. മുഖം വികൃതമായി...വാച്ചറെ കരടി കൊല്ലാതെ കൊന്നതു പോലെ.
നസീര് ഓര്മ്മിച്ചു; ഒരിക്കല് ചാറ്റല് മഴ പെയ്തപ്പോഴാണ് കരടിയെ കണ്ടത്. ചെറിയ ചിതല്പ്പുറ്റുകള് ഇളക്കി കരടി തിന്നുന്നു. കരടിയുടെ അടുത്ത് നസീര് നിശബ്ദനായിരുന്നു. ചിതല് തിന്നുകൊണ്ടു തന്നെ തലയുയര്ത്തി നോക്കി. രോമക്കെട്ടു പോലുള്ള ശരീരം കുടഞ്ഞു. മഴത്തുള്ളികള് പോലെ വെള്ളം നസീറിന്റെ ദേഹത്തും വീണു. കുറച്ച് കഴിഞ്ഞ് തീറ്റമതിയാക്കി. കരടി കാട്ടിലേക്ക് വലിഞ്ഞു. പറമ്പിക്കുളത്തും നെല്ലിയാംപതിയിലും തേക്കടിയിലും വയനാട്ടിലും ബന്ദിപ്പൂരിലും മുതുമലയിലുമായി നിരവധിതവണ കരടിയുമായി മുഖാമുഖത്തിന് അവസരം നസീറിന് കിട്ടിയിരുന്നു. 'ഒരിക്കലും കരടി തന്നെ ഭീഷണിപ്പെടുത്താന് വന്നിട്ടില്ല. അത് അതിന്റെ വഴിക്ക് മാറിനടക്കും'.
കാട് കരടിയുടെയും മറ്റ് വന്യമൃഗങ്ങളുടെയും വീടാണ്. അച്ചടക്കവും മര്യാദയുമില്ലാതെ കാട്ടില് നടക്കുമ്പോള് ചിലപ്പോള് മൃഗങ്ങള്ക്ക് ഭീഷണിയാകാം. ബഹളം വെക്കുകയോ മൃഗങ്ങളെ ഉപദ്രവിക്കുകയോ ചെയ്താല് അന്തരീക്ഷം മാറും. കാട്ടുയാത്രയെ കുറിച്ച് തനിക്ക് അറായാവുന്ന പാഠം ഇതാണ്. മൃഗങ്ങളെ ശല്യപ്പെടുത്തിയാല് അനിഷ്ട സംഭവങ്ങള് ഉണ്ടായേക്കാം. കാടിനെ സ്നേഹിച്ച്, നിശബ്ദനായി പ്രകൃതി സൗന്ദര്യം ആസ്വദിച്ചാല് അത് വിഭിന്നമായ അനുഭവമായിരിക്കും. 
അഭിപ്രായമെഴുതുന്നവര് ശ്രദ്ധിക്കേണ്ട ചില വസ്തുതകള്:
അസഭ്യങ്ങളും അധിക്ഷേപങ്ങളും പാടേ നിരസിക്കും. ഒന്നുകില് ഇംഗ്ലീഷിലോ അല്ലെങ്കില് മലയാളത്തിലോ വേണം അഭിപ്രായം. മംഗ്ലീഷ് വേണ്ട. മലയാളം ടൈപ്പ് ചെയ്യാന് അറിയാത്തവര്ക്ക് ഇംഗ്ലീഷില് ടൈപ്പ് ചെയ്ത് മലയാളമാക്കുന്നതിനുള്ള സംവിധാനം ഏര്പ്പെടുത്തിയിട്ടുണ്ട്. അത് ഉപയോഗപ്പെടുത്താം.
അസഭ്യങ്ങളും അധിക്ഷേപങ്ങളും പാടേ നിരസിക്കും. ഒന്നുകില് ഇംഗ്ലീഷിലോ അല്ലെങ്കില് മലയാളത്തിലോ വേണം അഭിപ്രായം. മംഗ്ലീഷ് വേണ്ട. മലയാളം ടൈപ്പ് ചെയ്യാന് അറിയാത്തവര്ക്ക് ഇംഗ്ലീഷില് ടൈപ്പ് ചെയ്ത് മലയാളമാക്കുന്നതിനുള്ള സംവിധാനം ഏര്പ്പെടുത്തിയിട്ടുണ്ട്. അത് ഉപയോഗപ്പെടുത്താം.
