കോളം
- ജി. ഷഹീദ്
വേഴാമ്പല് കുടീരം
Posted on: 11 Oct 2010
G Shaheed. Photos: N A Naseer
ആഗസ്ത് മാസത്തിലെ നെല്ലിയാംപതി.
സുഖകരമായ തണുപ്പ്. മഴയും വെയിലും മാറി മാറി വരും.
വഴി നീളെയും മലമുകളിലുമായി മൂടല്മഞ്ഞിന്റെ കനത്ത വലയം...
ശക്തമായ ചിറകടി. സൂക്ഷ്മമായി കാതോര്ത്താല് ആവിയന്ത്രത്തിന്റെ ശബ്ദം. വേഴാമ്പല് പറന്നെത്തുമ്പോള് നെല്ലിയാംപതിയിലെ ആയിരം സ്വര്ഗ കവാടങ്ങള് തുറക്കുന്ന പ്രതീതി.
വഴി നീളെയും മലമുകളിലുമായി മൂടല്മഞ്ഞിന്റെ കനത്ത വലയം. ആഗസ്ത് മാസത്തിലെ നെല്ലിയാംപതിയിലെ കാഴ്ച ഇതാണ്. സുഖകരമായ തണുപ്പ്. മഴയും വെയിലും മാറി മാറി വരും.
കാട്ടുപാതയിലൂടെ ജീപ്പ് ഓടിയപ്പോള് പ്രകൃതി സ്നേഹിയായ ലത്തീഫ് പറഞ്ഞു: ''ഇല പൊഴിഞ്ഞു കിടക്കുന്നു. അവ കുതിര്ന്നതിനാല് ജീപ്പിന്റെ ചക്രങ്ങളും വഴുതിപ്പോകുന്നു.''
അല്പ്പം ശ്രമകരമായ ഡ്രൈവിങ്ങ്. വഴിയില് മരചില്ലകള് ഒടിഞ്ഞു വീണു കിടക്കുന്നു. കാറ്റും ആനയും ഒടിച്ചതാണ്. വന്യജീവി ഫോട്ടോഗ്രാഫര് നസീറും വനം വകുപ്പിലെ വാച്ചറും വഴികാട്ടിയുമായ ദിവാകരനും ചേര്ന്ന് റോഡിലേക്ക് വീണു കിടക്കുന്ന മരചില്ലകള് ബലമായി പിടിച്ചുമാറ്റി. എന്നാല് അവര് കൈകള് പെട്ടെന്ന് വലിച്ചു. നിറയെ മുള്ളുകള് നിറഞ്ഞ ചില്ല. തുണി കൂട്ടിപിടിച്ചാണ് അത് നീക്കിയത്.
ഫോറസ്റ്റ് റസ്റ്റ് ഹൗസില് നിന്ന് അല്പ്പം അകലെയാണ് വിക്ടോറിയ പാറക്കൂട്ടം. ഇംഗഌഷുകാര് പണി തീര്ത്ത കുരിശുപള്ളി കാണാം. ഇന്ന് ഉപേക്ഷിക്കപ്പെട്ട നിലയിലാണ്. സന്ദര്ശകര് മാത്രമേ അവിടെ എത്താറുള്ളു. ''നോക്കൂ അതാണ് പറമ്പിക്കുളം.'' വഴികാട്ടിയായ ദിവാകരന് പറഞ്ഞു. ഹരിതവനത്തിന്റെ മുകള്ത്തട്ട് മാത്രം കാണാം. നോക്കെത്താത്ത പര്വ്വതനിരകള്. അഗാധമായ താഴ്വരകള്. മഞ്ഞിന്റെ വലയം നീങ്ങുമ്പോള് പറമ്പിക്കുളം, തൂണക്കടവ്, പെരുവാരപ്പള്ളം എന്നീ അണക്കെട്ടുകളുടെ ജലസംഭരണിയും കാണാം.
ആല്മരങ്ങള് ആയിരക്കണക്കിനാണ് നെല്ലിയാംപതി വനങ്ങളിലുള്ളത്. ആലിന്റെ ഇരുപതില് കൂടുതല് ഇനങ്ങള് അവിടെയുണ്ടെന്ന് മലമുഴക്കി വേഴാമ്പലിനെ പറ്റി ഗവേഷണം നടത്തുന്ന മീര പറഞ്ഞു. ആല്പ്പഴങ്ങള് പഴുത്ത് നില്ക്കുമ്പോള് അവ കൊത്തിയെടുത്ത് തിന്നാന് വേഴാമ്പലുകള് കൂട്ടത്തോടെ പറന്നെത്തുന്ന കാഴ്ച ആകര്ഷകമാണ്. ഒരു കൂട്ടത്തില് ചിലപ്പോള് നൂറോ അതില് കൂടുതലോ വേഴാമ്പലുകള് കാണാം. മുഴക്കത്തോടെ അവ പറക്കും. മരച്ചില്ലകളില് വിശ്രമിക്കുമ്പോഴും കൊടും കാട്ടില് പ്രതിധ്വനി. വേഴാമ്പലുകളുടെ കൂടുകളും വാസസ്ഥലവും പറമ്പിക്കുളത്തും തമിഴ്നാട്ടിലെ ടോപ്പ് സ്ലിപ്പിലുമായി വ്യാപിച്ചു കിടക്കുന്നു. ഇര തേടാന് കൂടുതലായി എത്തുന്നത് നെല്ലിയാംപതിയിലാണ്.
വിക്ടോറിയ പാറക്കൂട്ടത്തിനിടയില് കുത്തനെയുള്ള കയറ്റങ്ങളിലും ആനപ്പിണ്ടങ്ങള് ചിതറിക്കിടക്കുന്നു. ചിലത് മണിക്കൂറുകള്ക്ക് മുമ്പുള്ളത്. മറ്റ് ചിലതിന് ദിവസങ്ങളുടെ പഴക്കം. വേനല്ക്കാലത്ത് ഇവിടെ രാത്രി ക്യാമ്പ് ചെയ്യാം. ദിവാകരന് പറഞ്ഞു. പുല്ലുകള് മുറിച്ചെടുത്ത് പാറയില് ഒരടി കനത്തില് ഇടുക. ഒരു ഷീറ്റ് വിരിച്ചാല് കിടക്കയുടെ സുഖം. രാത്രി തണുത്ത കാറ്റ് വീശുമ്പോള് സുഖകരമായ അനുഭവം. മൃഗങ്ങള് പലതും ഇവിടെയുണ്ട്. പക്ഷെ ഉപദ്രവം ഇല്ല. അദ്ദേഹം പറഞ്ഞു.
കേശവന് പാറയാണ് മറ്റൊരു ആകര്ഷകമായ സങ്കേതം. അവിടെ നിന്നാല് ഏററവും ഉയര്ന്ന ശൃംഗം- ഹില്ടോപ്പ് കാണാം. മേഘങ്ങള് മൂടിക്കിടക്കുന്നു. കാറ്റില് മേഘങ്ങള് നീങ്ങുമ്പോള് വരയാടിന്റെ കൂട്ടം. മൂന്നാറിലും ഇരവികുളത്തുമുള്ള വരയാടിന്റെ മറ്റൊരു കുടുംബമാണ് നെല്ലിയാംപതിയിലും പറമ്പിക്കുളത്തുമുളളത്. നെല്ലിയാംപതിയിലെ വരയാടുകളെ പലപ്പോഴും നിരീക്ഷിച്ചിട്ടുള്ള തോമസ് നെല്സണ് വനം വകുപ്പിലെ മുന് ഉദ്യോഗസ്ഥനും തികഞ്ഞ പ്രകൃതി സ്നേഹിയുമാണ്. വളരെ ദൂരെ മുകള്ത്തട്ടില് എട്ടു വരയാടുകളെ ഫോട്ടോഗ്രാഫര് നസീര് കണ്ടു. നെല്ലിയാംപതിയില് ഏതാണ്ട് 80 ഓളം വരയാടുകള് ഉണ്ടെന്ന് നെന്മാറ ഡി എഫ് ഒ ധനേഷ് പറഞ്ഞു. സ്കൂള്- കോളേജ് വിദ്യാര്ഥികള്ക്കുള്ള പരിസ്ഥിതി ബോധവത്കരണ കഌസുകള്ക്കും യാത്രാ പരിപാടിയ്ക്കും അദ്ദേഹം പ്രാമുഖ്യം നല്കുന്നു.
ഗ്രീന്ലാന്ഡ് ഫാം ഹൗസിനു സമീപമാണ് സീതാര്കുണ്ട്. ഉയരത്തിലുളള മലനിര. ഇവിടെ നിന്നാല് മലമ്പുഴയും ചുള്ളിയാര്, മീങ്കര ജല സംഭരണികളും കാണാം. ഇടത്തേക്കു നീങ്ങിയാല് വന്വൃക്ഷങ്ങളുടെ വേരുകള് ചവിട്ടുപടി പോലെ നില്ക്കും. മെല്ലെ ഇറങ്ങാം. ചിലപ്പോള് ശീതക്കാറ്റ് ആഞ്ഞ് വീശും. കുത്തനെയുള്ള ഇറക്കവും ഒപ്പമുണ്ട്. അല്പ്പം നടന്നാല് വിസ്മയം അടുത്ത് കാണാം. ആകാശത്തെ എത്തിപ്പിടിക്കാന് നില്ക്കുന്ന കൂറ്റന് പാറക്കെട്ട്! തൊട്ടടുത്തായി വെള്ളച്ചാട്ടം. താഴോട്ട് നോക്കിയാല് അഗാധത. കൊല്ലങ്കോട് വനങ്ങള് നോക്കെത്താ ദൂരത്തിലാണ്. ഇവിടെ കുത്തനെയുള്ള പാറക്കൂട്ടങ്ങളിലും വരയാടിനെ കാണാം. ചെറിയ ശബ്ദം കേട്ടാല് മതി. അവ കുതിച്ചു മറയും.സിനിമാ ഷൂട്ടിങിന് പേരു കേട്ട ശൃംഗവും നെല്ലിയാംപതിയിലുണ്ട്. മിന്നാംപാറയും മാമ്പാറയും മാട്ടുമലയും സാഹസികരെ ആകര്ഷിക്കും. കരിമലയും പെരിയചോലയുമാണ് മറ്റ് സ്ഥലങ്ങള്. പുലയമ്പാറയിലെത്തി ജീപ്പില് വേണം ഈ സ്ഥലങ്ങളിലേക്ക് പോകാന്.
അഭിപ്രായമെഴുതുന്നവര് ശ്രദ്ധിക്കേണ്ട ചില വസ്തുതകള്:
അസഭ്യങ്ങളും അധിക്ഷേപങ്ങളും പാടേ നിരസിക്കും. ഒന്നുകില് ഇംഗ്ലീഷിലോ അല്ലെങ്കില് മലയാളത്തിലോ വേണം അഭിപ്രായം. മംഗ്ലീഷ് വേണ്ട. മലയാളം ടൈപ്പ് ചെയ്യാന് അറിയാത്തവര്ക്ക് ഇംഗ്ലീഷില് ടൈപ്പ് ചെയ്ത് മലയാളമാക്കുന്നതിനുള്ള സംവിധാനം ഏര്പ്പെടുത്തിയിട്ടുണ്ട്. അത് ഉപയോഗപ്പെടുത്താം.
അസഭ്യങ്ങളും അധിക്ഷേപങ്ങളും പാടേ നിരസിക്കും. ഒന്നുകില് ഇംഗ്ലീഷിലോ അല്ലെങ്കില് മലയാളത്തിലോ വേണം അഭിപ്രായം. മംഗ്ലീഷ് വേണ്ട. മലയാളം ടൈപ്പ് ചെയ്യാന് അറിയാത്തവര്ക്ക് ഇംഗ്ലീഷില് ടൈപ്പ് ചെയ്ത് മലയാളമാക്കുന്നതിനുള്ള സംവിധാനം ഏര്പ്പെടുത്തിയിട്ടുണ്ട്. അത് ഉപയോഗപ്പെടുത്താം.
