Mathrubhumi - Sanchari POST OF THE WEEK

______________________________________________

ന്റെ ജീവിതത്തിലെ അധിക സഞ്ചാരങ്ങളും ഉടലെടുക്കാറ് ദുഃഖങ്ങളില്‍ നിന്നാണ്. ഈ കഴിഞ്ഞ ചെറിയ പെരുന്നാളിന്റെ രണ്ട് ദിവസം മുന്‍പാണ് മനസ്സിനെ വേദനിപ്പിക്കുന്ന ചില സംഭംവങ്ങള്‍ നടന്നത്. അത് പിന്നെ പടച്ചോന്‍ ഞമ്മക്ക് ഇടക്കിടെ തരുന്നതാണ്.

ചെറുപ്പകാലങ്ങളല്‍ ഇങ്ങനെ വിഷമം വരുന്ന സമയത്ത് നേരെ വീട്ടിന് മുന്നിലുള്ള കടലുണ്ടി കടപ്പുറത്തേക് അങ്ങട്ട് ഇറങ്ങും. ആ കടപ്പുറത്തെ കാറ്റും വൈകുന്നേരങ്ങളിലെ കളര്‍ഫുള്‍ സൂര്യനും വല വീശുന്ന ചായിചേട്ടനെയും സൂപ്പികാക്കെയും ഒക്കെ കണ്ടാല്‍ എല്ലാ വിഷമവുംഅതില്‍ അലിഞ്ഞ് പോകും. അന്നത്തെ പ്രശ്‌നങ്ങള്‍ എന്ന് പറഞ്ഞാല്‍ ഉമ്മച്ചിയുമായോ പെങ്ങള്‍മാരുമായോ അടി ഉണ്ടാക്കിലാണ്. 

പക്ഷെ ഈയിടെയായി എന്തേങ്കിലും വിഷമം വന്നാല്‍ ആദ്യം ചെയ്യാറ് നമ്മുടെ പുന്നാര ഉമ്മച്ചിയെ വിളിക്കാറാണ്. അത് ഈയടുത്ത് തുടങ്ങിയതാട്ടോ. ഉമ്മച്ചിന്റെ അനുവാദമില്ലാതെ ഇറങ്ങിയാല്‍ പണിയാ സഞ്ചാരികളെ. സമ്മതത്തോടെ ഇറങ്ങിയാല്‍ പിന്നെ അങ്ങട്ട് പോയാല്‍ മതി, പടച്ചോന്‍ നമ്മളെ ഓളം പോലെ കൊണ്ട് പോകും.

ഉമ്മച്ചിയോട് സംസാരിച്ചാല്‍ കിട്ടുന്ന പവറും പിന്നെ ബേഗും എടുത്ത് ഏതെങ്കിലും മലയുടെ മണ്ടയില്‍ കയറുകയാണ് പിന്നത്തെ പരിപാടി. പെരുന്നാള്‍ ദിവസം ഞാന്‍ ഉമ്മച്ചിയെ വിളിച്ചു. 'ഇമ്മാ....ഞാന്‍ പോവാണ് രണ്ടോസം ഫോണില്‍ കിട്ടൂലാട്ടോ'... ഏത് മലയുടെ മുകളിലേക്കാണെങ്കിലും സൂക്ഷിച്ച് പോണെ പൊന്നുമോനെ എന്നുള്ള സ്ഥിരം ഉപദേശവും കിട്ടി. പെരുന്നാള് കഴിഞ്ഞ് മൂന്നു ദിവസം കഴിഞ്ഞാല്‍ നമ്മുടെ പിറന്നാളും! എന്തായാലും ഇവിടുന്ന് മുങ്ങാന്‍ പറ്റിയ സമയം, അല്ലെങ്കില്‍ പാര്‍ട്ടി കോര്‍ട്ടി എന്ന് പറഞ്ഞ് പല ടൈപ്പ് സാധനങ്ങള്‍ ഫാം ഹൗസില്‍ കയറി വരും.
 
സുഹൃത്ത് ആപ്പിയും അന്ന് കൂടെയുണ്ട്. 'ആപ്പിയെ...ഒരു അഞ്ച് ദിവസത്തിനുള്ള ഡ്രസ് ഒക്കെ പേക് ചെയ്‌തോ, നമുക്ക് ഒരു സ്ഥലം വരെ പോകാന്ന്'. പറഞ്ഞിരിക്കുമ്പോളാണ് ദുഫായില്‍ നിന്ന് ഞമ്മളെ ആത്മമിത്രം അജുവിന്റെ ഫോണ്‍. 'ബാവുക്ക ങ്ങള് പറഞ്ഞ ട്രക്കിങ്ങിനും റൈടിങ്ങിനും ഉള്ള എല്ലാ സാധനങ്ങളും വാങ്ങി കൂട്ടിയിട്ടുണ്ട് ഞാന്‍, നാളെ രാവിലെ ചണ്ഡിഗഡ് എത്തും. രാജുഭായന്റെ വണ്ടി എയര്‍പോര്‍ട്ടില്‍ വരാന്‍ പറയോ' എന്ന് ചോദിച്ചു. ഉടനെ തന്നെ ഞാന്‍ ആപ്പിയെയും രാജുവിനെയും എയര്‍പോര്‍ട്ടിലേക്ക് പറഞ്ഞയക്കാന്‍ ഏര്‍പാടാക്കി. ഉഷാറായി. 

സഞ്ചാരികളെ... ട്രിപ്പിന് ഇറങ്ങാന്‍ നേരത്ത് നല്ല പിരാന്തനാണ് വരുന്നത്. അജു ഭായ്. ട്രക്കിങ്ങും റൈഡിങ്ങുമാണ് പുള്ളിയുടെ മെയ്ന്‍ ഹോബി. എങ്ങനെ ആകാതിരിക്കും. കുറ്റ്യാടിക്കാര്‍ക്ക് അറിയാം, 'കരാട്ടെ ബഷീര്‍ക്കാനെ'. വയനാട്ടിലെ കാട്ടില്‍ വച്ച് ബുള്ളറ്റിന്റെ കിക്കര്‍ അടിക്കുമ്പം കടിച്ച മുര്‍ഖനെ പിടിച്ച് സഞ്ചിയിലാക്കി അതേ ബുള്ളറ്റില്‍ ഹോസ്പ്പിറ്റലില്‍ എത്തി, രണ്ടു ദിവസം കഴിഞ്ഞ് മുപ്പത്തി അഞ്ചാം വയസ്സില്‍ വീരമൃത്യു വരിച്ച കരാട്ടെ ബഷീര്‍ക്ക!

മൂപ്പരുടെ മോനാ ഞങ്ങള്‍ കിഡ് എന്ന് വിളിക്കുന്ന അജു. ദുഫായില്‍ ജോലി ചെയ്ത് മടുക്കുമ്പം ഒരു വിളിയാണ്. 'ബാവുക്ക റെഡിയായിക്കോളി ഞാന്‍ നാളെ അങ്ങട്ട് വരുന്നുണ്ട് '. പിന്നെ ഞങ്ങള്‍ എതേങ്കിലും മലേടെ മുകളില്‍ എത്താറാണ് പതിവ്. അതേ പോലത്തെ ഒരു വരവാണ് ഇതും അതും കറക്റ്റ് സമയത്ത്.

ഞാനും ആപ്പിയും ജീപ്പും ടെന്റും പാത്രങ്ങളും വാരി കെട്ടി റോഹ്താങ്ങ് പാസ് ക്രോസ് ചെയ്ത് ബാക്കി പിന്നെ കോക്‌സറില്‍ വച്ച് തീരുമാനിക്കാം എന്നായിരുന്നു ആദ്യത്തെ പ്‌ളാന്‍. അജു വന്നത്തോടെ പ്‌ളാന്‍ എല്ലാം മാറി. അവന് 500 സിസി ബുള്ളറ്റില്‍ പോണം എന്ന്. പക്ഷെ എന്തില്‍ പോയാലും റോഹ്താങ്ങ് കഴിഞ്ഞേ എവിടേക്കാണ് പോണത് എന്ന് തീരുമാനിക്കൂ എന്ന് പറഞ്ഞ് ഞാന്‍ ആദ്യമേ ജാമ്യം എടുത്തു.

ഉടനെ തന്നെ സുഹൃത്ത് അനുവിനെ വിളിച്ച് ബുള്ളറ്റ് റെഡിയാക്കി. 'ബാബു ഭായ് 2010, 500 സിസി കിക് സ്റ്റാര്‍ട്ടെ ഉളളൂ, അല്ലെങ്കില്‍ നല്ല 350 തരാമെന്ന് പറഞ്ഞു' കിക്കും ചവിട്ടും ഒന്നും പ്രശ്‌നമില്ല, അജുവിന് 500 സിസി തന്നെ വേണം.

അങ്ങനെ ഞങ്ങള്‍ രണ്ടു കിക്സ്റ്റാര്‍ട്ട് 500 സിസി ബുള്ളറ്റും അതില്‍ ഒന്നില്‍ അനുവിനെ കൊണ്ട് രാത്രിക്ക് രാത്രി ലഡാക് കേരിയര്‍ വെല്‍ഡ് ചെയ്ത് പിടിപ്പിച്ചു. കാരണം, ടെന്റും സ്‌ളീപ്പിങ് ബാഗും, പാത്രങ്ങളും എല്ലാം വാരി വലിച്ച് കെട്ടനുള്ളതാ...

ഉടനെ ഓണ്‍ലൈനില്‍ രണ്ട് വണ്ടി നമ്പറും വെച്ച് പെര്‍മിറ്റ് റെഡിയാക്കി അതിരാവിലെ റോഹ്താങ്ങ് ക്രോസ് ചെയ്യണം എന്ന രീതിയില്‍ ഒരു നാല് മണിക്ക് തന്നെ ഇറങ്ങാമെന്ന് വച്ച് ഞങ്ങള്‍ ഭാണ്ഡങ്ങള്‍ കെട്ടി വരിഞ്ഞ് ഉറങ്ങാന്‍ കിടന്നു. 

അതിരാവിലെ എണീറ്റപ്പം നല്ല ഉഗ്രന്‍ മഴ.... ഒര് രക്ഷയും ഇല്ലാത്ത കാറ്റും മഴയും. തോരുന്ന ലക്ഷണം ഒന്നും ഇല്ല എന്ന് കണ്ടപ്പോള്‍ എല്ലാം വാരി വലിച്ച് കെട്ടി ഞങ്ങള്‍ ഇറങ്ങി. ടെന്റ്, കുക്കര്‍, ഗ്യാസ് എല്ലാം സെറ്റപ്പും കൊണ്ടായിരുന്നു യാത്ര. ഒരു സ്ഥലത്തും ലോഡ്‌ജോ റൂമോ എടുക്കില്ല എന്ന് ഞങ്ങള്‍ ആദ്യമേ തീരുമാനിച്ചിരിന്നു. അതേ പോലെ ഒരു തിരക്കുമില്ലാത്ത വേണ്ടുവോളം സമയമുള്ള ഒരു യാത്ര.

തോന്നുമ്പം ഉറങ്ങി തോന്നുമ്പം ഉറക്കമെണീറ്റിട്ടുള്ള യാത്ര. പക്ഷെ എങ്ങോട്ടാ പോണ് എന്ന് ഇതുവരെ തീരുമാനിച്ചിട്ടില്ല. എന്തായാലും ബിയോണ്ട് റോഹ്താങ്ങ് പാസെടുത്തിട്ടുണ്ട്. ബാക്കി മല ഇറങ്ങി തീരുമാനിക്കാം എന്ന് വിചാരിച്ച് ഞങ്ങള്‍ ഇറങ്ങി.

മഴ എന്ന