ഊട്ടിയുടെ കുളിരില്‍ തന്റെ ഹിറ്റ് സിനിമകള്‍ പിറന്ന വീടുകളിലൂടെ പഴയ ഓര്‍മകളുമായി മോഹന്‍ലാല്‍...



ഊട്ടിയിലെത്തുമ്പോള്‍ എപ്പോഴും സ്വന്തം വീട്ടില്‍ എത്തുന്ന പോലെയാണ്. ഇവിടെ എനിക്ക് സ്വന്തമായി ഒരു വീട് ഉള്ളതുകൊണ്ടല്ല ഈ തോന്നല്‍. നീലഗിരിയും അതിന്റെ താഴ്‌വാരങ്ങളും പൈന്‍മരങ്ങളും പൊയ്കകളും പൂന്തോട്ടങ്ങളുമെല്ലാം എത്രയോ വര്‍ഷങ്ങള്‍ക്കു മുമ്പേ ഞാനുമായി പ്രണയത്തിലായതാണ്. ഇവിടുത്തെ തണുപ്പില്‍ ഞാന്‍ സ്വസ്ഥനാണ്. ഇതുകൊണ്ടൊക്കെയാണ് ഞാന്‍ ഇവിടെ ഒരു വീടുവെച്ചത്.


'കിലുക്ക'ത്തിന്റെ ഓര്‍മ്മകളില്‍ ഫേണ്‍ഹില്‍ പാലസ്‌

ഒരുപാട് വര്‍ഷങ്ങള്‍ക്കു മുമ്പ് തേനും വയമ്പും എന്ന ചിത്രത്തില്‍ അഭിനയിക്കാനാണ് ഞാന്‍ ആദ്യമായി ഊട്ടിയില്‍ എത്തുന്നത്. പരിമിതമായ സൗകര്യങ്ങള്‍ മാത്രമുള്ള ഒരു സുഖവാസകേന്ദ്രം മാത്രമായിരുന്നു അന്ന് ഇവിടം. പിന്നീട് എന്റെ വളര്‍ച്ചയ്‌ക്കൊപ്പം ഊട്ടിയും വളര്‍ന്നു എന്നു പറയുന്നതാവും ശരി. കാരണം എന്റെ അഭിനയ ജീവിതത്തിലെ നാഴികകല്ലുകളായ ഒരുപാട് സിനിമകള്‍ ഇവിടെ ചിത്രീകരിച്ചു. ഇവിടെ തുടങ്ങുന്നു, എങ്ങിനെ നീ മറക്കും, കുയിലിനെത്തേടി, താളവട്ടം, ചിത്രം, ദശരഥം, കിലുക്കം, മിന്നാരം, കളിപ്പാട്ടം, ഉള്ളടക്കം, ഇരുവര്‍, ഹലോ... ഒറ്റനിമിഷം ഓര്‍ത്താല്‍ ഇത്രയും പറയാം. ജീവിത്തില്‍ ഏറ്റവും അധികം തവണ ഞാന്‍ വന്നു താമസിച്ച കേരളത്തിനു പുറത്തുള്ള സ്ഥലം ഊട്ടിയായിരിക്കും. ഒരു വീടു കൂടി വച്ചപ്പോള്‍ അതെന്റെ സ്വദേശം തന്നെയായി.

എന്റെ വീടുകളെ കുറിച്ച് ഒരുപാട് പ്രചരണങ്ങള്‍ ഒരു കാലത്ത് കേരളത്തില്‍ നിറയെ ഉണ്ടായിരുന്നു. പലതും കേട്ട് ഞാന്‍ അമ്പരക്കുകയും ചിരിക്കുകയും ചെയ്തിട്ടുണ്ട്. എവിടെ ആഡംബരപൂര്‍ണമായ ഒരു പുതിയ വീട് ഉയര്‍ന്നാലും 'അത് മോഹന്‍ലാലിന്റേതാണ്.' എന്ന് പറഞ്ഞുപരന്നു. സത്യം പറഞ്ഞാല്‍ തിരുവനന്തപുരത്തെ പഴയ വീടും ചെന്നെയിലെ വീടും മാത്രമാണ് അന്നെനിക്കുണ്ടായിരുന്നത്. വളരെ കഴിഞ്ഞാണ് ഞാന്‍ ഊട്ടിയിലും എറണാകുളത്തും വീട് വെച്ചത്.

ഊട്ടിയില്‍ ആദ്യകാലത്ത് വന്നപ്പോഴേ ഞാന്‍ ജോണ്‍ സള്ളിവനെക്കുറിച്ച് കേട്ടിരുന്നു. ബ്രിട്ടീഷ് ഇന്ത്യയിലെ കോയമ്പത്തൂര്‍ ഗവര്‍ണ്ണറായിരുന്ന അദ്ദേഹമാണ് ഊട്ടിയുടെ ശില്‍പി എന്നു പറയാം. തോടന്‍മാര്‍ എന്ന ഗോത്രവര്‍ഗക്കാരില്‍ നിന്നാണ് സള്ളിവന്‍ ഊട്ടി ഏറ്റെടുത്തത്. ചായയും തേക്കുമടക്കമുള്ള കൃഷികളെ അദ്ദേഹം പ്രോത്സാഹിപ്പിച്ചു. തോടന്‍മാര്‍ അദ്ദേഹത്തെ സ്‌നേഹിച്ചു. അദ്ദേഹവുമായി സഹകരിച്ചു. തോടന്‍മാരുടെ സാംസ്‌കാരികമായ അംഗീകാരത്തിനും ഭൂമിയിലുള്ള അവകാശത്തിനും വേണ്ടി സള്ളിവന്‍ ശ്രമിച്ചു. ഇതു പക്ഷെ ബ്രിട്ടീഷ് സര്‍ക്കാരിന് ഇഷ്ടപ്പെട്ടില്ല. അദ്ദേഹത്തെ എല്ലാതരത്തിലും അവര്‍ ശിക്ഷിച്ചു. ഊട്ടിയിലെ ഒരോ മഞ്ഞുതുള്ളിയും സള്ളിവന്റെയും അദ്ദേഹത്തെ സ്‌നേഹിച്ച തോടന്‍മാരുടെയും കണ്ണുനീരാണ്.

ഊട്ടിയിലെ തന്റെ പ്രിയപ്പെട്ട വാസകേന്ദ്രങ്ങളിലൊന്നായ സള്ളിവന്‍ കോര്‍ട്ടിലെ ലിഫ്റ്റില്‍ മോഹന്‍ലാല്‍
നിരവധി വര്‍ഷങ്ങളിലെ വന്നുപോവലുകള്‍ക്കിടെ എപ്പോഴോ ഒരിക്കലാണ് ഊട്ടിയില്‍ ഒരു വീടുവെക്കണം എന്ന തോന്നല്‍ എനിക്കുണ്ടായത്. ഒരുപാടന്വേഷിച്ചപ്പോള്‍ ഒരു വിദേശിയായ അമ്മൂമ്മയുടെ സ്ഥലം ഉണ്ടെന്നറിഞ്ഞു. ലൗഡെയ്ല്‍ എന്ന സ്ഥലത്തായിരുന്നു അത്. വലിയ മലകള്‍ക്കഭിമുഖമായി ഒരു ചെറുവനത്തിനു നടുവിലുളള ആ സ്ഥലത്താണ് ഞാന്‍ വീട് വെച്ചത്.
അപൂര്‍വ്വമായ ശാന്തതയും മധുരമായ പ്രഭാതങ്ങളുമാണ് ഈ വീടിന്റെ സൗഖ്യം. രാവിലെ മലകള്‍ക്കപ്പുറത്ത് ഉഷസുണര്‍ന്നു വരുന്നത് നേരിട്ടു കാണാം. താഴെ ഉറഞ്ഞ തണുപ്പിലേക്ക് ഇളം ചൂടുള്ള രശ്മികള്‍ തെറിച്ചുവീഴും. വീടിനു ചുറ്റുമുള്ള വനവഴികളിലൂടെ സ്വസ്ഥമായി നടക്കാം. നടന്നുപോകുമ്പോള്‍ തൊട്ടരികിലൂടെ മേട്ടുപാളയത്തേക്കുള്ള നീലഗിരി പാസഞ്ചര്‍ കടന്നു പോകും. കുറേ നടന്നു കഴിയുമ്പോഴേക്കും വനത്തില്‍ നിറയെ വെയില്‍ പരന്നിരിക്കും.
++++++++++

ഇതെന്റെ വീട്: ഊട്ടിയിലെ തന്റെ വീടിന് മുന്നില്‍



ഒരു വീടാണ് ഞാന്‍ ഊട്ടിയില്‍ വെച്ചത്. എന്നാല്‍ ഒരുപാട് വീടുകള്‍ ഈ സ്ഥലം എനിക്ക് സ്വന്തമെന്ന പോലെ തന്നു. എപ്പോഴും വരികയും ഷൂട്ട് ചെയ്യുകയും ഉറങ്ങുകയും എല്ലാം ചെയ്ത വീടുകള്‍. ഊട്ടിയിലെ സ്വന്തം വീട്ടില്‍ ചെലവഴിച്ചതിനേക്കാള്‍ സമയം ഞാന്‍ ഒരു പക്ഷെ ഈ വീടുകളില്‍ കഴിഞ്ഞിട്ടുണ്ടാകാം. അത്രയുമധികം സിനിമകള്‍ അവയുടെ മേല്‍ക്കൂരയ്ക്ക് കീഴില്‍ വെച്ച് ചിത്രീകരിച്ചിട്ടുണ്ട്.

ബോബിയെ ഓര്‍മ്മയില്ലേ, 'മിന്നാര'ത്തിലെ ആ രംഗം ഇവിടെയായിരുന്നു
'കിലുക്കം' ചിത്രീകരിച്ച ഫേണ്‍ഹില്‍ പാലസ് ആണ് അതില്‍ പ്രമുഖം. വിശാലമായ പുല്‍ത്തകിടിക്കു നടുവില്‍ ഒരു രത്‌നം വെച്ചതുപോലെ മനോഹരമാണ് ആ സമുച്ചയം. 1844ല്‍ നിര്‍മ്മിച്ച ഈ കൊട്ടാരത്തിന്റെ അറിയപ്പെടുന്ന ആദ്യത്തെ ഉടമയില്‍ ജെ. ഗ്രോവ്‌സ് എന്ന ബ്രിട്ടീഷുകാരനാണ്. പിന്നീടത് പലപല കൈകള്‍ മറിഞ്ഞ് മൈസൂര്‍ രാജാവിന്റെ കയ്യിലെത്തി. പതിനായിരം രുപയ്ക്കാണ് മൈസൂര്‍ രാജാവ് ഈ സ്വപ്‌നസൗധം വാങ്ങിയത്!

ഫേണ്‍ഹില്‍ പാലസിന്റെ ഉള്‍ത്തളങ്ങിലെ ചുമരുകളില്‍ പഴയകാലത്തെ ബഌക്ക് ആന്റ് വൈറ്റ് ചിത്രങ്ങള്‍ ഫ്രെയിമിട്ട് വച്ചിരിക്കുന്നത് കാണാം. ഷൂട്ടിങ്ങിന്റെ ഇടവേളകളില്‍ ഞാന്‍ വെറുതെ അവ കണ്ടു നടക്കും. ആ കാലത്തെ ഫേണ്‍ഹില്‍ പാലസ് അവയില്‍ നോക്കി സങ്കല്‍പിച്ചെടുക്കാം. നായ്കളുടെ വന്‍ സംഘത്തോടൊപ്പം കുതിരപ്പുറത്തിരിക്കുന്ന വെള്ളക്കാരെ ആ ചിത്രങ്ങളില്‍ കാണാം. ദശരഥം ചിത്രീകരിക്കുമ്പോള്‍ ഒരു ദിവസം ഞാന്‍ തനിച്ച് ഫേണ്‍ഹില്‍ പാലസില്‍ കിടന്നുറങ്ങി. അന്നു രാത്രി, ആ ചിത്രങ്ങളില്‍ കണ്ട പലരും എന്റെ സ്വപ്‌നങ്ങളില്‍ വന്നുപോയി.

ഫേണ്‍ഹില്‍ പാലസിലെ ഷൂട്ടിങ്ങിനിടയില്‍ തന്നെയാണ് ഞാന്‍ അതിന്റെ വിളിപ്പാടകലെ താമസിക്കുന്ന ഗുരു നിത്യചൈതന്യയതിയെ കാണുകയും പരിചയപ്പെടുകയും ചെയ്തത്. എന്‍.എല്‍ ബാലകൃഷ്ണനും അന്ന് എന്നോടൊപ്പമുണ്ടായിരുന്നു. അന്ന് ഞാനാ യതിവര്യന്റെ ഒരുപാട് ഫോട്ടോകള്‍ എടുത്തു. രസികനായ ഒരു സംന്യാസി.
താളവട്ടവും ഉള്ളടക്കവും ചിത്രീകരിച്ചത് വൃന്ദാവന്‍ പാലസിലാണ്. ആ പഴയ വീട്ടില്‍, വ്യത്യസ്ത സിനിമകളില്‍ ഭ്രാന്തനായുംഡോക്ടറായും ഞാന്‍ അഭിനയിച്ചു. രണ്ടു സിനിമകളും ഭ്രാന്തിന്റെ ലോകത്തെ അടിസ്ഥാനമാക്കിയുള്ളതായിരുന്നു എന്നത് യാദൃശ്ചികമാവാം.

ഫേണ്‍ഹില്‍ പാലസിന്റെ യാത്രയും പുരാതനമോ പ്രൗഢിയുള്ളതോ അല്ല വൃന്ദാവന്‍ പാലസ്. നോട്ടക്കുറവിന്റെ പാടുകള്‍ എല്ലായിടത്തുമുണ്ട്. എങ്കിലും അതിന്റെ മുറ്റവും തണലുവിരിച്ച നടവഴികളും എനിക്കിഷ്ടമാണ്.

സള്ളിവന്‍ കോര്‍ട്ടിന് മുന്നില്‍
'മിന്നാരവും' കളിപ്പാട്ടവും കണ്ടവര്‍ നവനഗര്‍ പാലസിനെ മറക്കില്ല. പ്രത്യേകിച്ചും മിന്നാരത്തിലെ മണിയന്‍പിള്ള രാജുവും ഞാനും തിലകന്‍ ചേട്ടനും ശോഭനയും ശങ്കരാടി ചേട്ടനും ചേര്‍ന്നുള്ള കുട്ടിയുടെ പേര് ചോദിക്കുന്ന രംഗം കണ്ടവര്‍. മരം പാകിയ നിലങ്ങളും ചില്ലുകൊണ്ട് മറച്ച ചുറ്റുവഴികളും പ്രൗഢമായ ഗോവണിയും പലനിറങ്ങളില്‍ വെയില്‍ വന്നു വീഴുന്ന മട്ടുപ്പാവും നവനഗര്‍ പാലസിന്റെ പ്രത്യേകതയാണ്. അപൂര്‍വ്വമായ പെയിന്റിങ്ങുകള്‍ ഈ കൊട്ടാരത്തിന്റെ അകത്തളങ്ങളിലെ ചുമരുകളിലുണ്ട്. അവ നോക്കിയിരുന്നു ഞാന്‍ എന്തൊക്കെയോ പകല്‍കിനാവുകള്‍ കാണാറുണ്ട്.

ഹോം എലോണ്‍: നവനഗര്‍ പാലസ്. 'മിന്നാരം' പോലുള്ള നിരവധി ഹിറ്റുകള്‍ ഷൂട്ട് ചെയ്തത് ഇവിടെയാണ്



ഒരു വീട്ടിലും ഒരുപാട് കാലം താമസിക്കാന്‍ യോഗമില്ലാത്തയാളാണ് ഞാന്‍. ഒന്നിലധികം വീടുകളുണ്ടെങ്കിലും ഹോട്ടല്‍ മുറികളാണ് എന്റെ ആലയം. എങ്കിലും ഊട്ടിയിലെത്തുമ്പോള്‍ ഞാന്‍ ഇത്തിരിയിത്തിരി ദൂരങ്ങളുടെ വ്യത്യാസത്തില്‍ ഒരുപാട് വീടുകളുടെ ഉടമസ്ഥനായതു പോലെ. ഒരു വീടും ആത്യന്തികമായി നമ്മുടേതല്ല എന്നറിയും പോലെ തന്നെ എല്ലാ വീടുകളും നമ്മുടേതാണ് എന്ന അറിവും സുഖം തരുന്നതല്ലേ?