Friday,
August 22,
2014

ഇന്‍ടെക്‌സിന്റെ ഐ-ബഡി ടാബ്‌

  
പി.എസ്.രാകേഷ്
    |    Aug 13, 2013

രാജ്യത്തെ ഏറ്റവും വലിയ കമ്പ്യൂട്ടര്‍ അനുബന്ധ ഉപകരണ നിര്‍മാതാക്കളും വിതരണക്കാരുമാണ് ഇന്‍ടെക്‌സ്. കമ്പ്യൂട്ടര്‍ യു.പി.എസ്. മുതല്‍ മള്‍ട്ടിമീഡിയ സ്പീക്കറും മൗസും ഹെഡ്‌ഫോണും വരെ കമ്പനി വിപണിയിലിറക്കുന്നുണ്ട്. ഇന്ത്യയില്‍ ഏറ്റവും കൂടുതല്‍ വിറ്റഴിയുന്ന യു.പി.എസ്. ഇന്‍ടെക്‌സിന്റേതാണ്. ഇന്നിപ്പോള്‍ 250 ലേറെ ഉല്പന്നങ്ങള്‍ ഇന്‍ടെക്‌സിന്റേതായുണ്ട്. കഴിഞ്ഞ സാമ്പത്തികവര്‍ഷത്തില്‍ കമ്പനിയുടെ മൊത്തം വിറ്റുവരവ് 1069 കോടി രൂപയുടേതാണെന്നറിയുമ്പോഴേ ഇന്‍ടെക്‌സിന്റെ വലിപ്പം മനസിലാകൂ.

ഇന്‍ടെക്‌സ് മൊബൈല്‍ ഫോണ്‍ വിപണിയിലേക്കിറങ്ങിയിട്ട് ഏതാനും വര്‍ഷങ്ങളേ ആയിട്ടുളളൂ. മറ്റെല്ലാ ഇന്ത്യന്‍ കമ്പനികളെയും പോലെ വിലകുറഞ്ഞ ഡ്യുവല്‍ സിം മോഡലുകള്‍ അവതരിപ്പിച്ചുകൊണ്ടായിരുന്നു ഇന്‍ടെക്‌സിന്റെയും തുടക്കം. തൊട്ടതെല്ലാം പൊന്നാക്കുന്ന കമ്പനിയുടെ വിപണന മികവ് മൊബൈല്‍ രംഗത്തും വിജയകഥ രചിച്ചു. ഇപ്പോള്‍ പ്രതിവര്‍ഷം നാല് ലക്ഷം ഇന്‍ടെക്‌സ് ഹാന്‍ഡ്‌സെറ്റുകള്‍ ഇന്ത്യയില്‍ ചെലവാകുന്നുണ്ട്. കമ്പനി മൊത്തം വിറ്റഴിച്ച ഹാന്‍ഡ്‌സെറ്റുകളുടെ എണ്ണം അഞ്ച് കോടി കവിയും.

മൊബൈല്‍ വില്പനയില്‍ വിജയിച്ച എല്ലാ കമ്പനികളും ചെയ്യുന്നത് പോലെ ഇപ്പോഴിതാ ഇന്‍ടെക്‌സ് ടാബ്‌ലറ്റ് രംഗത്തേക്കും കടന്നിരിക്കുകയാണ്. കമ്പനി ഏറ്റവും ഒടുവിലിറക്കിയ ടാബ്‌ലറ്റ് മോഡലിന്റെ പേര് ഐ-ബഡി കണക്ട് II. വില 7500 രൂപ. ഐ-ബഡി സീരീസില്‍ ഇന്‍ടെക്‌സ് ഇറക്കുന്ന നാലാമത്തെ ടാബ്‌ലറ്റ് മോഡലാണ് കണ്ക്ട് കക. വലിയ പരസ്യകോലാഹലങ്ങള്‍ക്കൊന്നും മുതിരാതെ ബജറ്റ് ടാബ് രംഗത്ത് ചുവടുറപ്പിച്ച് നീങ്ങാനാണ് കമ്പനിയുടെ തീരുമാനമെന്ന് വ്യക്തം.

ഏഴിഞ്ച് ഡബ്ല്യൂ.വി.ജി.എ. ഡിസ്‌പ്ലേയോടു കൂടിയ ഈ ടാബ്‌ലറ്റിന്റെ സ്‌ക്രീന്‍ റിസൊല്യൂഷന്‍ 800 X 480 പിക്‌സല്‍സ്. ഒരു ഗിഗാഹെര്‍ട്‌സ് ഡ്യൂവല്‍-കോര്‍ കോര്‍ടക്‌സ് എ5 പ്രൊസസറോടു കൂടിയ ഈ ടാബ്‌ലറ്റില്‍ 512 എം.ബി. റാമാണുളളത്. നാല് ജി.ബി. ഇന്‍ബില്‍ട്ട് മെമ്മറിയും 32 ജി.ബി. എസ്.ഡി. കാര്‍ഡ് ഉപയോഗിക്കാനുള്ള സൗകര്യവും ഇതിലുണ്ട്.

ത്രിജി സംവിധാനമുള്ളതിനാല്‍ സിംകാര്‍ഡിട്ട് വോയ്‌സ് കോളിങ് നടത്താനും ഐ-ബഡിയില്‍ സാധിക്കും.ലൈറ്റ് സെന്‍സര്‍, മോഷന്‍ സെന്‍സര്‍, പ്രോക്‌സിമിറ്റി സെന്‍സര്‍, ജി-സെന്‍സര്‍ എന്നിവയെല്ലാം ഇതിലുണ്ട്. ഫെയ്‌സ്ബുക്ക്, സ്‌കൈപ്പ്, ജി-ടോക്ക് തുടങ്ങി നിരവധി ഇന്‍ബില്‍ട്ട് ആപ്ലിക്കേഷനുകളോടെയാണ് ഐ-ബഡി കണക്ട് കകവിന്റെ വരവ്.

രണ്ട് മെഗാപിക്‌സല്‍ ബാക്ക് ക്യാമറയും 0.3 മെഗാപിക്‌സല്‍ ഫ്രണ്ട് ക്യാമറയുമുളള ഐ-ബഡി ആന്‍ഡ്രോയ്ഡ് 4.0 ഐസ്‌ക്രീം സാന്‍വിച്ച് വെര്‍ഷനിലാണ് പ്രവര്‍ത്തിക്കുന്നത്. ആന്‍ഡ്രോയ്ഡ് ജെല്ലിബീന്‍ 4.3 വെര്‍ഷനിലെത്തി നില്‍ക്കുമ്പോള്‍ ഐസ്‌ക്രീം സാന്‍വിച്ച് എന്ന പഴഞ്ചന്‍ വെര്‍ഷന്‍ പലരെയും നിരാശപ്പെടുത്തിയേക്കും.

3500 എം.എ.എച്ച്. ബാറ്ററിയാണ് ഇതില്‍ ഉപയോഗിച്ചിരിക്കുന്നത്. അഞ്ച് മണിക്കൂര്‍ തുടര്‍ച്ചയായ സംസാരസമയവും 300 മണിക്കൂര്‍ സ്റ്റാന്‍ഡ്‌ബൈയുമാണ് കമ്പനി അവകാശപ്പെടുന്ന ബാറ്ററി ആയുസ്സ്.


x