OBITUARY
  Jun 16, 2013
സി.പി.ഐ നേതാവ് സത്യപാല്‍ ഡങ് അന്തരിച്ചു
അമൃത്‌സര്‍ : പഞ്ചാബില്‍ സി.പി.ഐ.യുടെ മുന്നണിപ്പോരാളിയും മുന്‍ എം.എല്‍.എ.യുമായിരുന്ന സത്യപാല്‍ ഡങ് (93) അന്തരിച്ചു. ദീര്‍ഘകാലമായി അസുഖബാധിതനായിരുന്നു. ഖാലിസ്താന്‍ ഭീകരവാദത്തിനും വിഘടനവാദത്തിനുമെതിരെ അതിശക്തമായി പോരാടിയ നേതാവായിരുന്നു സത്യപാല്‍.1920-ല്‍ ലാഹോറിലെ ഷെയ്പുര ജില്ലയിലായിരുന്നു ജനനം. ബ്രിട്ടീഷ് ഭരണകാലത്ത് കമ്യൂണിസ്റ്റ് പാര്‍ട്ടിയുടെ തീപ്പൊരി നേതാവായിരുന്ന അദ്ദേഹം 1945-ല്‍ ഓള്‍ ഇന്ത്യ സ്റ്റുഡന്റ്‌സ് ഫെഡറേഷന്റെ ജനറല്‍ സെക്രട്ടറിയായിരുന്നു. പഞ്ചാബില്‍ അനേകം കര്‍ഷകസമരങ്ങള്‍ നയിച്ചിട്ടുള്ള സത്യപാല്‍ നാലുതവണ അമൃത്‌സറില്‍നിന്ന് പഞ്ചാബ് നിയമസഭയിലേക്ക് തിരഞ്ഞെടുക്കപ്പെട്ടിട്ടുണ്ട്. 1967-ല്‍ മുഖ്യമന്ത്രിയായിരുന്ന ഗുര്‍മുഖ് സിങ് മുസാഫിറിനെ കന്നിയങ്കത്തില്‍ തന്നെ പരാജയപ്പെടുത്തിയതോടെ ദേശീയശ്രദ്ധ നേടി. 1967-ലെ കോണ്‍ഗ്രസ്സിതര സര്‍ക്കാറില്‍ ഭക്ഷ്യമന്ത്രിയായിരുന്നു. 1980-ല്‍ പരാജയപ്പെട്ടു. പിന്നീട് സത്യപാലിന്റെ ഭാര്യ വിമല ഡങ് ആണ് പന്ത്രണ്ട് വര്‍ഷത്തിനുശേഷം സി.പി.ഐ.ക്കുവേണ്ടി ഈ സീറ്റ് തിരിച്ചുപിടിച്ചത്.

എണ്‍പതുകളില്‍ സിഖ് തീവ്രവാദം ശക്തമായ കാലത്ത് 'ഹിന്ദുരാഷ്ട്രവും ഖാലിസ്താന്‍ രാഷ്ട്രവും വേണ്ട, എക്കാലവും ഇന്ത്യ മതി' എന്ന മുദ്രാവാക്യവുമായി പ്രചാരണം നടത്തി. ബ്രിട്ടീഷ് ഭരണത്തിനെതിരെ 1946-ല്‍ നടന്ന നാവികകലാപത്തിലും നേതൃസ്ഥാനം വഹിച്ചു. സത്യപാലിന്റെ മൃതദേഹം ഞായറാഴ്ച ഉച്ചതിരിഞ്ഞ് സംസ്‌കരിക്കുമെന്ന് സി.പി.ഐ. നേതാക്കള്‍ പറഞ്ഞു
Other News in this section
കെ.സി. കിടങ്ങൂര്‍ അന്തരിച്ചു
അങ്കമാലി: സ്വാതന്ത്ര്യസമര സേനാനിയും ആദ്യകാല രാഷ്ട്രീയ പ്രവര്‍ത്തകനും സാഹിത്യകാരനുമായ കെ.സി. കിടങ്ങൂര്‍ (അഗസ്റ്റിന്‍-83) അന്തരിച്ചു. രണ്ടുവര്‍ഷമായി കാന്‍സര്‍ രോഗത്തെത്തുടര്‍ന്ന് ചികിത്സയിലായിരുന്നു. തിങ്കളാഴ്ച ഉച്ചയ്ക്ക് 12.30 ന് അങ്കമാലി ലിറ്റില്‍ഫ്ലൂവര്‍ ആസ്പത്രിയിലായിരുന്നു അന്ത്യം. വിമോചന സമരത്തിന് നേതൃത്വം നല്‍കിയ നേതാക്കളിലൊരാളാണ്. 150-ഓളം ട്രേഡ് യൂണിയനുകള്‍ക്ക് ..

Latest news