TOP STORIES TODAY
  Jan 31, 2013
വഴിവക്കില്‍ വീണ 'ഭാഗ്യം'വാരിയെടുത്ത് ജനം മുങ്ങി

തൃപ്പൂണിത്തുറ: വാനില്‍ നിന്ന് നടുറോഡിലേക്ക് തെറിച്ചുവീണ പെട്ടി പൊട്ടിയപ്പോള്‍ ഭാഗ്യക്കുറികള്‍ ചിതറിപ്പറന്നു. ഓടിയെത്തിയ വഴിപോക്കരും വാഹന യാത്രക്കാരുമെല്ലാം 'ഭാഗ്യം' വാരിക്കൂട്ടി കടന്നു.
നോട്ടുകെട്ടുകളാണെന്ന് കരുതിയാണ് കൂടുതലും പേരും ഓടിയെത്തിയത്. ടിക്കറ്റുകള്‍ നഷ്ടപ്പെട്ടതറിഞ്ഞ് വാനിലുണ്ടായിരുന്നവര്‍ തിരിച്ചെത്തിയപ്പോഴേക്കും ഭൂരിഭാഗവും അപ്രത്യക്ഷമായിരുന്നു.
തൃപ്പൂണിത്തുറ വടക്കേക്കോട്ട കവലയ്ക്കടുത്ത് പോപ്പുലര്‍ മാരുതിക്ക് മുന്നില്‍ ബുധനാഴ്ച വൈകീട്ട് നാലിനായിരുന്നു സംഭവം. സംസ്ഥാന ഭാഗ്യക്കുറി വകുപ്പിന്റെ ഫിബ്രവരി 9ന് നറുക്കെടുക്കുന്ന കെ. ആര്‍-73 'കാരുണ്യ' ഭാഗ്യക്കുറി ടിക്കറ്റുകളാണ് റോഡില്‍ വീണത്. കാക്കനാട് കെ.പി.ബി.എസ്സില്‍ നിന്ന് കൊല്ലം ജില്ലാ ഭാഗ്യക്കുറി ഓഫീസിലേക്ക് കൊണ്ടുപോയതാണ് ഒരു കോടി രൂപ ഒന്നാം സമ്മാനമുള്ള ടിക്കറ്റുകള്‍. വാനിന്റെ പിറകിലെ ലോക്കിന്റെ വെല്‍ഡിംഗ് വിട്ടതിനെ തുടര്‍ന്നാണ് ഡോര്‍ താനേ തുറന്ന് ഭാഗ്യക്കുറി ടിക്കറ്റടങ്ങിയ കാര്‍ഡ് ബോര്‍ഡ് പെട്ടി വഴിയില്‍ വീണത്. വാഹനത്തിലുണ്ടായിരുന്നവര്‍ ആദ്യം ഇതറിഞ്ഞില്ല. പിന്നാലെ വന്ന മറ്റൊരു വാഹനം പെട്ടിയില്‍ കയറിയതോടെ പെട്ടി പൊട്ടി വഴിയില്‍ 'ഭാഗ്യപ്രളയ'മായി. ഇതുകണ്ട് അന്തംവിട്ട ജനം ടിക്കറ്റ് വാരിക്കൂട്ടി. അതുവഴി വന്ന ഒരു സ്വകാര്യബസ്സിലെ ജീവനക്കാര്‍ വണ്ടി നിര്‍ത്തി 'കോടി' കൈക്കലാക്കി.
രണ്ടുലക്ഷം ഭാഗ്യക്കുറി ടിക്കറ്റുകളാണ് വാനില്‍ ആകെ ഉണ്ടായിരുന്നത്. അതില്‍ മുപ്പതിനായിരം ടിക്കറ്റുകളടങ്ങിയ പെട്ടിയാണ് റോഡില്‍ വീണത്. കുറെ ടിക്കറ്റുകള്‍ തിരികെ കിട്ടിയിട്ടുണ്ട്. സംഭവത്തെക്കുറിച്ച് അന്വേഷണം നടത്തുന്നുണ്ടെന്ന് തൃപ്പൂണിത്തുറ പോലീസ് അറിയിച്ചു.
സംഭവത്തെ തുടര്‍ന്ന് റോഡില്‍ ഗതാഗതം തടസ്സപ്പെട്ടതോടെ പോലീസും എത്തി. അതിനിടെ വാന്‍ തിരികെ എത്തി. ഇവിടെ വാഹനങ്ങള്‍ കയറിയതടക്കമുള്ള ടിക്കറ്റുകള്‍ വാനിലുണ്ടായിരുന്നവര്‍ എടുത്തു. തുടര്‍ന്ന് തൃപ്പൂണിത്തുറ പോലീസ് സ്‌റ്റേഷനില്‍ വിവരം അറിയിച്ചു.
സ്ത്രീകളും ഭാഗ്യക്കുറി ടിക്കറ്റ് റോഡില്‍ നിന്നെടുക്കാന്‍ ഉത്സാഹിച്ചു. ഭാഗ്യക്കുറി ടിക്കറ്റുകള്‍ ഇവിടെ നിന്ന് ലഭിച്ച ചിലര്‍ ടിക്കറ്റുകള്‍ ബന്ധപ്പെട്ടവരെ ഏല്‍പിക്കുന്നതിനായി 'മാതൃഭൂമി'യുടെ തൃപ്പൂണിത്തുറ ബ്യൂറോയിലെത്തിയിരുന്നു. ടിക്കറ്റുകള്‍ തുടര്‍ന്ന് അവര്‍ പോലീസിലേല്‍പ്പിച്ചു.
Other News in this section
ചന്ദ്രന്റെ ടെറസില്‍ ശീതകാല സമൃദ്ധി
കോഴിക്കോട്: അടുത്ത കാലം വരെ ടെറസില്‍ ശീതകാല പച്ചക്കറി എന്നത് ആലോചിക്കാന്‍ പോലും കഴിയുമായിരുന്നില്ല. എന്നാല്‍ കോഴിക്കോട് സ്വദേശി ചന്ദ്രന്‍ ചാലിയകത്തിന്റെ വീടിന്റെ മട്ടുപ്പാവില്‍ വിളയുന്നത് ക്യാരറ്റും ക്യാബേജും ക്വാളിഫളവറും. പച്ചക്കറിക്കടയില്‍ പോയി അന്യ സംസ്ഥാനങ്ങളില്‍ നിന്നെത്തുന്ന വിഷക്കനി വാങ്ങി കഴിക്കുന്ന നഗരവാസികള്‍ ഈ വീടിന്റെ മട്ടുപ്പാവൊന്ന് കാണണം. ..
ഞാന്‍ ഗാന്ധിയല്ല: വേണമെങ്കില്‍ 'ഫ്രഞ്ച് ഗാന്ധി'യെന്ന് വിളിച്ചോളൂ
കേരളത്തില്‍ കുടി തുടങ്ങുന്ന ശരാശരി പ്രായം 15.2
ചന്ദ്രന്‍ രൂപപ്പെട്ടത് 447 കോടി വര്‍ഷം മുമ്പെന്ന് പഠനം
കര്‍ഷകരെ സാന്ത്വനിപ്പിക്കാന്‍ മനോരോഗ ആസ്പത്രിയില്‍ പ്രത്യേക വിഭാഗം
ശ്രീലങ്കന്‍ പ്രധാനമന്ത്രിക്ക് ഗുരുവായൂരില്‍ ചന്ദനംകൊണ്ട് തുലാഭാരം
ഞാന്‍ ഗാന്ധിയല്ല: വേണമെങ്കില്‍ 'ഫ്രഞ്ച്് ഗാന്ധി'യെന്ന് വിളിച്ചോളൂ...

Latest news