മുംബൈ: ഏഴുമാസം പ്രായമുള്ള കുഞ്ഞും അമ്മയും കാറിനുള്ളിലിരിക്കെ ഗതാഗത നിയമം ലംഘിച്ചതിന് കാര്‍ കെട്ടിവലിച്ച് മുംബൈ പോലീസ്. ഏഴ് മാസം പ്രായമുള്ള കുഞ്ഞിന് അമ്മ പാലു കൊടുത്തുകൊണ്ടിരിക്കവെയാണ് നിയമം പാലിക്കാന്‍ സഹാനുഭൂതി നഷ്ടപ്പെട്ട പോലീസ് ഒരുമ്പെട്ടിറിങ്ങിയത്.

മുംബൈ മാലാഡിലെ എസ് വി റോഡിലാണ് സംഭവം. സംഭവത്തിന്റെ വീഡിയോ കഴിഞ്ഞ ദിവസമാണ് ഫെയ്സ്ബുക്കില്‍ പ്രത്യക്ഷപ്പെട്ടത്. വ്യാപകമായി ഷെയര്‍ ചെയ്യപ്പെട്ട വീഡിയോ ശ്രദ്ധയില്‍പെട്ടതോടെ അന്വേഷണത്തിന് ഉത്തരവിട്ടിരിക്കുകയാണ് മഹാരാഷ്ട്ര സര്‍ക്കാര്‍.

'ഞാന്‍ കുഞ്ഞിന് പാല് കൊടുക്കുകയാണ്. എന്റെ കുഞ്ഞിന് സുഖമില്ല. ഈ കാര്‍ കെട്ടി വലിക്കുന്നത് നിര്‍ത്താന്‍ നിങ്ങള്‍ പോലീസിനോട് പറയൂ' എന്ന് കാറിനുള്ളിലെ സ്ത്രീ വിളിച്ചു പറയുന്നത് കേള്‍ക്കാം. സ്ത്രീയുടെ നിലവിളി കേട്ട് വഴിയാത്രക്കാര്‍ പോലീസിനെ ചോദ്യം ചെയ്യുന്നതും ദൃശ്യങ്ങളില്‍ വ്യക്തമാണ്.

കുഞ്ഞിനെ ഡോക്ടറെ കാണിച്ച് മടങ്ങിവരുന്ന വഴിയാണ് താന്‍ എന്ന് സ്ത്രീ പറയുന്നുണ്ട്. നിയമം തെറ്റിച്ച മറ്റ് വാഹനങ്ങളുണ്ടായിട്ടും തന്നോടും കുഞ്ഞിനോടും പോലീസ് നിര്‍ദയമായി പെരുമാറുന്നുവെന്ന് സ്ത്രീ പറയുന്നതും പ്രചിക്കുന്ന വീഡിയോയിലുണ്ട്.

VIDEO - NEWS UPDATE

നോ പാര്‍ക്കിങ് മേഖലയില്‍ കാര്‍ നിര്‍ത്തിയിട്ടതിനാണ് പോലീസ് ഇത്തരത്തില്‍ കാര്‍ കെട്ടി വലിച്ചു കൊണ്ടു പോവുന്നത്. ചലാന്‍ നല്‍കി പിഴ അടപ്പിക്കാനുള്ള വ്യവസ്ഥ നിലനില്‍ക്കെ പാലൂട്ടുന്ന അമ്മയെയും കുഞ്ഞിനെയും കെട്ടി വലിച്ചു കൊണ്ടു പേവേണ്ട അടിയന്തിര സാഹചര്യം പോലീസ് കൈക്കൊണ്ടതെന്തിനാണെന്നാണ് ഉയരുന്ന ചോദ്യം.

യൂണിഫോമില്‍ പേര് വെളിപ്പെടുത്തുന്ന നെയിം പ്ലേറ്റ് പോലും ധരിക്കാതെയാണ് പോലീസ് നിയമ പാലത്തിനിറങ്ങിയത്.