തിരുവനന്തപുരം: പ്രതിമ തകര്‍ക്കുന്ന സംഭവവുമായി ബന്ധപ്പെട്ട് തന്റെ പേരില്‍ നവമാധ്യമങ്ങളില്‍ പ്രചരിപ്പിക്കുന്ന സന്ദേശം വ്യാജമാണെന്ന് വി.എസ്.അച്യുതാനന്ദന്‍ അറിയിച്ചു.

''ഇ.എം.എസിന്റെയും എ.കെ.ജി.യുടെയും സ്മാരകങ്ങള്‍ തകര്‍ത്താല്‍ മെഡിക്കല്‍ കോളേജില്‍ ഡി.വൈ.എഫ്.ഐ. നല്‍കുന്ന പൊതിച്ചോറിന്റെ എണ്ണം കൂടും' എന്ന് ഞാന്‍ പറഞ്ഞതായാണ് സാമൂഹികമാധ്യമങ്ങളില്‍ പ്രചരിപ്പിച്ചുകൊണ്ടിരിക്കുന്നത്. ഇത്തരത്തില്‍ പ്രസ്താവനയോ, പരാമര്‍ശമോ നടത്തിയിട്ടില്ല. തികച്ചും വാസ്തവവിരുദ്ധവും ദുരുദ്ദേശത്തോടെയുമുള്ള പ്രചാരണമാണിത്. ഇത്തരം വ്യാജസന്ദേശങ്ങള്‍ ആരും വിശ്വസിക്കരുത്, ഇതിനു പിന്നില്‍ പ്രവര്‍ത്തിക്കുന്നവര്‍ ഇതില്‍നിന്നു പിന്തിരിയണം''- അദ്ദേഹം പത്രക്കുറിപ്പില്‍ വ്യക്തമാക്കി.