KERALA INDIA WORLD SPECIAL
മലയാളിയുടെ ആദ്യത്തെ റേഡിയോ അനുഭവം

 

എം. ജയരാജ്‌

 


1927 ഒക്ടോബര്‍. ആകാശവാണിക്ക് കേരളത്തില്‍ നിലയങ്ങളില്ലാത്ത കാലം. ആകാശത്തിലൂടെ ഒഴുകിവരുന്ന സംഗീതം ഒരു യന്ത്രം വഴി വീട്ടിലിരുന്ന് കേള്‍ക്കാമെന്ന് പറഞ്ഞുകേട്ടറിവേ ജനങ്ങള്‍ക്ക് ഉണ്ടായിരുന്നുള്ളൂ. ഈ അദ്ഭുതം തന്റെ നാട്ടുകാര്‍ക്കൊന്ന് കാണിച്ചുകൊടുക്കാന്‍ ചാര്‍ട്ടേഡ് ഇലക്ട്രിക്കല്‍ എഞ്ചിനിയര്‍ കെ.സി. മേനോന്‍ നിശ്ചയിച്ചു. കോഴിക്കോട് സാമൂതിരി കോളേജ് അങ്കണമാണ് റേഡിയോ പ്രദര്‍ശനത്തിന്റെ വേദിയായി തിരഞ്ഞെടുത്തത്. വൈകീട്ട് ആറിനും ഒന്‍പതിനും രണ്ടു പ്രദര്‍ശനങ്ങള്‍ നടത്താനുള്ള ഏര്‍പ്പാടുകളും പൂര്‍ത്തിയാക്കി. ടിക്കറ്റ് വെച്ചായിരുന്നു പ്രദര്‍ശനം. ബോംബെയില്‍നിന്ന് പുറപ്പെടുന്ന സംഗീതം നൂറുകണക്കിന് കിലോമീറ്റര്‍ അന്തരീക്ഷത്തിലൂടെ സഞ്ചരിച്ച് കോഴിക്കോട് സാമൂതിരി കോളേജില്‍ സ്ഥാപിച്ച യന്ത്രത്തിലൂടെ കേള്‍ക്കുന്നതിനായി ജനങ്ങള്‍ ടിക്കറ്റ് എടുത്ത് ഹാളിലേക്ക് തള്ളിക്കയറി. എഞ്ചിനിയര്‍ മേനോന്‍ കൃത്യം ആറു മണിക്കു തന്നെ ആദ്യപ്രദര്‍ശനത്തിനുവേണ്ട ഒരുക്കങ്ങള്‍ തുടങ്ങി (രണ്ട് പെട്ടികളും ഒരു ആംപ്ലിഫയറുമാണ് ഈ സന്നാഹത്തിന് ഉണ്ടായിരുന്നത്). കമ്പികള്‍കൊണ്ട് ഇവയെല്ലാം പരസ്പരം ബന്ധിച്ചശേഷം സദസ്യരോട് നിശ്ശബ്ദരായിരിക്കാന്‍ മേനോന്‍ ആജ്ഞാപിച്ചു. മഹാദ്ഭുതം കേള്‍ക്കാനായി എല്ലാവരും ശ്വാസമടക്കിയിരുന്നു. എന്തോ ചില ശബ്ദങ്ങള്‍ കേട്ടുവെന്ന് ചിലര്‍, ഒന്നും കേള്‍ക്കാനായില്ലെന്ന് മറ്റു ചിലരും പറഞ്ഞതോടെ ബഹളമായി. പ്രശ്‌നം ഗുരുതരമാകുന്നതിനു മുന്‍പെ മേനോന്‍ ഇടപെട്ടു. ശബ്ദം കേള്‍ക്കാതിരുന്നത് ആകാശത്ത് കാര്‍മേഘങ്ങള്‍ ഉള്ളതുകൊണ്ടും സൂര്യന്‍ അസ്തമിക്കാത്തതുകൊണ്ടുമാണെന്നും രാത്രി ഒന്‍പതു മണിക്കുള്ള പ്രദര്‍ശനത്തില്‍ എല്ലാം ശരിയാകുമെന്നുമുള്ള മേനോന്റെ വിശദീകരണത്തില്‍ സദസ്സ് തത്കാലത്തേക്ക് ശാന്തമായി.

ഒന്‍പതു മണിക്കുള്ള പ്രദര്‍ശനവും കൃത്യസമയത്തുതന്നെ ആരംഭിച്ചു. നിറഞ്ഞു കവിഞ്ഞ സദസ്സില്‍ നാലഞ്ച് സ്ത്രീകളും ഉണ്ടായിരുന്നു. പരിപാടി ആരംഭിച്ചെങ്കിലും യന്ത്രത്തില്‍നിന്ന് യാതൊരു ശബ്ദവും പുറത്തുവന്നില്ല. യന്ത്രത്തെ തിരിച്ചും മറിച്ചും തട്ടിമുട്ടി ശരിയാക്കാന്‍ മേനോന്‍ ശ്രമിച്ചെങ്കിലും യന്ത്രം അനങ്ങിയില്ല. ചിലരെ അരികിലേക്ക് വിളിച്ച് യന്ത്രം അവരുടെ ചെവിയോട് ചേര്‍ത്തു പിടിച്ചുകൊടുത്തപ്പോള്‍ ചിലര്‍ക്ക് എന്തൊക്കെയോ ശബ്ദം കേള്‍ക്കാന്‍ സാധിച്ചു. എന്നാല്‍ രണ്ടു സ്ത്രീകളെ മേനോന്‍ അരികിലേക്ക് വിളിച്ചപ്പോഴാണ് പ്രശ്‌നം വഷളായത്. ഒരു പാര്‍സി സ്ത്രീയുടെ ചെവിയോട് ചേര്‍ത്ത് യന്ത്രം പിടിച്ചപ്പോഴും മറ്റൊരു സ്ത്രീയുമായി മേനോന്‍ സംസാരിച്ചപ്പോഴും ഹാളിന്റെ പിന്‍നിരയില്‍ ഉണ്ടായിരുന്ന വിദ്യാര്‍ഥികള്‍ കൂവിയും പൂച്ചയെയും പട്ടിയെയും അനുകരിച്ച് ശബ്ദം ഉണ്ടാക്കിയും ബഹളംവെച്ചു. കിട്ടിയ സന്ദര്‍ഭം ഉപയോഗിച്ച് മേനോന്‍ യുവതികളുമായി ശൃംഗരിക്കുകയാണെന്ന് തെറ്റിദ്ധരിച്ചതാണ് ബഹളത്തിനു കാരണമായത്. ബഹളം നടക്കുന്ന സമയത്ത് പ്രിന്‍സിപ്പല്‍ കൃഷ്ണന്‍ നായര്‍ പുഞ്ചിരിതൂകി ഇരുന്നതല്ലാതെ ബഹളക്കാരെ നിരുത്സാഹപ്പെടുത്താതിരുന്നത് മേനോനെ വേദനിപ്പിച്ചു. 1927 ഒക്ടോബര്‍ 8-ന് 'കോഴിക്കോട്ടെ റേഡിയോ പ്രദര്‍ശനം, ചില വിദ്യാര്‍ഥികളുടെ ലജ്ജാവഹമായ നടപടി' എന്ന തലക്കെട്ടില്‍ വന്ന വാര്‍ത്തയില്‍ മേനോനെയും നിശിതമായി വിമര്‍ശിച്ചിരുന്നു. വേണ്ടത്ര തയ്യാറെടുപ്പില്ലാതെ ടിക്കറ്റുവെച്ച് പ്രദര്‍ശനം നടത്തിയ നടപടിയാണ് വിമര്‍ശനവിധേയമായത്. തന്റെ നിരപരാധിത്വം വിശദീകരിച്ച് അദ്ദേഹം കത്തെഴുതി. 'കോഴിക്കോട് നടന്ന ആകാശവാണി പ്രദര്‍ശനം' എന്ന തലക്കെട്ടില്‍ മേനോന്റെ കത്ത് ഒക്ടോബര്‍ 15-ന് പ്രസിദ്ധീകരിച്ചു. കോഴിക്കോട്ടെ പ്രദര്‍ശനം പരാജയപ്പെടാനിടയായ സാഹചര്യമാണ് കത്തിലെ ഉള്ളടക്കം. പ്രതികൂലകാലാവസ്ഥകാരണമാണ് പ്രദര്‍ശനം പരാജയപ്പെട്ടതെന്ന് വിശദീകരിച്ച ശേഷം തൃശൂര്‍ കോവിലകത്ത് ശ്രീരാമവര്‍മ വലിയ തമ്പുരാന്‍ തിരുമനസ്സിന്റെ മുന്‍പാകെ വിജയകരമായി നടത്തിയ റേഡിയോ പ്രദര്‍ശനത്തിന്റെ കഥയും കത്തില്‍ വിശദീകരിക്കുന്നുണ്ട്. കോവിലകത്തു നടത്തിയ പ്രദര്‍ശനത്തില്‍ ബോംബെയില്‍നിന്നുള്ള സംഗീതം കോവിലകം മുഴുവന്‍ വ്യക്തമായി കേള്‍ക്കുക മാത്രമല്ല ദൂരെയുള്ള നായര്‍ ബ്രിഗേഡിയ ലൈനിലും കേട്ടിരുന്നത്രേ. സന്തുഷ്ടനായ വലിയ തിരുമനസ്സ് തിരുവനന്തപുരത്ത് എത്തുന്നതിനു മുന്‍പായി അവിടേക്കും ഇതുപോലെ ഒരു യന്ത്രം ഉണ്ടാക്കാന്‍ മേനോന് ഉത്തവ് നല്കിയ കാര്യവും അദ്ദേഹം കത്തില്‍ എടുത്തുപറയുന്നുണ്ട്. സത്യാവസ്ഥ ഇതൊക്കെയാണെങ്കിലും നഗരവാസികള്‍ ഇതൊന്നും വിശ്വാസത്തിലെടുക്കുമെന്ന് താന്‍ കരുതുന്നില്ലെന്നും അവരെ ബോധ്യപ്പെടുത്തുന്നതിനായി ഒരു പ്രദര്‍ശനംകൂടി കോഴിക്കോട് നടത്തുമെന്നും പ്രഖ്യാപിച്ചുകൊണ്ടാണ് മേനോന്‍ വിശദീകരണം അവസാനിപ്പിക്കുന്നത്.

1927-ല്‍ ബോംബെയില്‍നിന്നും കല്‍ക്കത്തയില്‍നിന്നും രണ്ട് സ്വകാര്യ ട്രാന്‍സ്മിറ്ററുകളില്‍ റേഡിയോ പ്രക്ഷേപണം തുടങ്ങി. 1930-ല്‍ 'ഇന്ത്യന്‍ ബ്രോഡ്കാസ്റ്റിങ് സര്‍വീസ്' എന്ന പേരില്‍ സര്‍ക്കാര്‍ നിയന്ത്രണത്തിലായി. 1936-ല്‍ പേര് ഓള്‍ ഇന്ത്യാ റേഡിയോ (അ.ക.ഞ) എന്നാക്കി. 1957 ലാണ് ആകാശവാണി എന്നു പേരുമാറ്റിയത്. 1927 ഒക്ടോബറില്‍ ഇലക്ട്രിക്കല്‍ എഞ്ചിനിയര്‍ കെ.സി. മേനോന്‍ കോഴിക്കോട് നടത്തിയ റേഡിയോ പ്രദര്‍ശനം കഴിഞ്ഞ് ഏഴു വര്‍ഷത്തിനു ശേഷം 1934-ല്‍ ആണ് കേരളത്തില്‍ റേഡിയോ പ്രക്ഷേപണം ആരംഭിക്കുന്നത്.

(മലയാള അച്ചടിമാധ്യമം: ഭൂതവും വര്‍ത്തമാനവും എന്ന പുസ്തകത്തില്‍ നിന്ന്)

പുസ്തകം വാങ്ങാം


ഇന്റര്‍നെറ്റില്‍ ചരിത്രപരമായ വിവരങ്ങളും ദൃശ്യങ്ങളും ലഭിക്കുന്ന ചില സൈറ്റുകളിലേക്കുള്ള ചൂണ്ടുവിരലാണ് താഴെ.
സമാനമായ സൈറ്റുകളെപ്പറ്റി അറിവുള്ള വായനക്കാര്‍ ആ സൈറ്റുകളുടെ മേല്‍വിലാസം (URL) അയച്ചുതന്നാല്‍ അവയും ഈ വിഭാഗത്തില്‍ ഉള്‍പ്പെടുത്താം
ഡച്ചുകാര്‍ സുഗന്ധവ്യഞ്ജനങ്ങളന്വേഷിച്ച് 1603-ല്‍ കേരളത്തില്‍ വന്നതു മുതല്‍ അവര്‍ കൊച്ചിയില്‍ നിന്നും വിടപറയുന്നതുവരെയുള്ള (1795) ചരിത്രം പ്രതിപാദിക്കുന്ന ഡച്ച് ഇന്‍ കേരള എന്ന സൈറ്റ് സന്ദര്‍ശിക്കാന്‍ ഇവിടെ ക്ലിക്ക് ചെയ്യുക
യൂനിവേഴ്‌സിറ്റി ഓഫ് സൗത്ത് കാലിഫോര്‍ണിയയുടെ ശേഖരത്തിലുള്ള 1850 മുതല്‍ 1950 വരെയുള്ള ബാസല്‍ മിഷന്‍ ചിത്രങ്ങള്‍ കാണാന്‍ ഇവിടെ ക്ലിക്ക് ചെയ്യുക
തിരുവിതാംകൂര്‍ രാജഭരണകാലത്തെ കേരള ചിത്രങ്ങള്‍ കാണാന്‍ ഇവിടെ ക്ലിക്ക് ചെയ്യുക
കോഴിക്കോട് നഗരത്തിന്റെ ചരിത്രവുമായി ബന്ധപ്പെട്ട വിവരങ്ങളും ചിത്രങ്ങളുമായി ഒരു ബ്ലോഗ്‌
പൗരാണിക ഇന്ത്യാ ചരിത്രം ലളിതമായി ഇന്ററാക്റ്റീവ് രീതിയില്‍ അവതരിപ്പിക്കുന്ന ബ്രിട്ടീഷ് മ്യൂസിയത്തിന്റെ സൈറ്റ്‌
ചരിത്രപ്രാധാൈന്യമുള്ള പഴയന്‍ ഇന്ത്യന്‍ ഫോട്ടോകള്‍ പ്രദര്‍ശിപ്പിക്കുന്ന ദ ഓള്‍ഡ് ഇന്ത്യന്‍ ഫോട്ടോസ് എന്ന സൈറ്റ്

Other News in this section:

» നാടുകടത്തലിന്റെയും വിരഹദുഃഖത്തിന്റെയും ഓര്‍മയുമായി... » ഈയംപൂശലുകാരന്റെ വരവ്‌ » തടവുകാരും ഒളിച്ചോട്ടവും » നഗരപരിഷ്‌കര്‍ത്താക്കളെ, ഇതായിരുന്നു അന്നത്തെ തലസ്ഥാനം » ബീച്ചില്‍ നിര്‍ദേശിക്കപ്പെട്ട റെയില്‍വേ സ്‌റ്റേഷന്‍ » സാമ്പത്തിക പ്രതിസന്ധി പരിഹരിക്കാന് അവര് സ്വീകരിച്ച നടപടികള്‌ » വിസ്മൃതിയിലാണ്ടൊരു ചരമവാര്‍ഷികം » നഗരത്തിലെ വെള്ളപ്പൊക്കം അന്നും ഇന്നും » സര്‍. ടി. മാധവറാവുവിന്റെ ഓര്‍മകളുമായി ഹജൂര്‍കച്ചേരിയില്‍ ഒരു ചടങ്ങ്‌ » ഗാന്ധിജിയുടെ ആദ്യ സന്ദര്‍ശനവും അനന്തപുരിയിലെ ഇന്നത്തെ മാറ്റങ്ങളും » ഒന്നാം ലോകമഹായുദ്ധത്തിന് അനന്തപുരിയിലൊരു സ്മാരകം » സാമൂതിരി രാജവംശത്തിലെ പോരാളി » ജഡ്ജിമാര്‍ക്കും അന്ന് ശിക്ഷ » വില്യം ബാര്‍ട്ടന് പിന്‍ഗാമികളെ സൃഷ്ടിച്ച ആദ്യത്തെ എന്‍ജിനിയറിങ് കോളേജ്‌ » കോഴിക്കോട്ട് നിന്ന് നീലഗിരി മലനിരകളിലേക്ക്‌
© Copyright Mathrubhumi 2013. All rights reserved.