ലണ്ടന്‍: ഭൗതിക ശാസ്ത്രത്തിലെ അടിസ്ഥാന നിയമങ്ങളാണ് പ്രപഞ്ചസൃഷ്ടിക്ക് വഴിവെച്ചതെന്നും അതിന് ദൈവത്തിന്റെ സഹായം ആവശ്യമായി വന്നിട്ടില്ലെന്നും വിഖ്യാത ഭൗതിക ശാസ്ത്രജ്ഞന്‍ സ്റ്റീഫന്‍ ഹോക്കിങ് അഭിപ്രായപ്പെട്ടു. ഈ മാസം പുറത്തിറങ്ങുന്ന 'ദ ഗ്രാന്‍ഡ് ഡിസൈന്‍' എന്ന പുസ്തകത്തിലാണ് അദ്ദേഹം ദൈവത്തെ പൂര്‍ണമായും തള്ളിപ്പറയുന്നത്.

''ഒന്നുമില്ലായ്മയില്‍നിന്ന് ഞൊടിയിടയില്‍ പ്രപഞ്ചം സൃഷ്ടിക്കപ്പെട്ടത് ഭൂഗുരുത്വബലംപോലുള്ള ഭൗതിക നിയമങ്ങള്‍ കാരണമാണ്. പ്രപഞ്ചസൃഷ്ടിയിലേക്കും നടത്തിപ്പിലേക്കും ദൈവത്തെ വലിച്ചിഴക്കേണ്ട കാര്യമില്ല''-ടൈംസ് ദിനപത്രത്തില്‍ ഭാഗികമായി പ്രസിദ്ധീകരിച്ച പുസ്തകത്തില്‍ ഹോക്കിങ് പറയുന്നു.

'എ ബ്രീഫ് ഹിസ്റ്ററി ഓഫ് ടൈം' എന്ന മുന്‍ പുസ്തകത്തില്‍ ഹോക്കിങ് ദൈവസാന്നിധ്യം തീര്‍ത്തും നിരാകരിച്ചിരുന്നില്ല. ഒരു സൃഷ്ടാവുണ്ടായിരിക്കുകയെന്നത് ശാസ്ത്രതത്ത്വങ്ങള്‍ക്ക് വിരുദ്ധമായിരിക്കണമെന്നില്ല എന്നും പ്രപഞ്ചത്തെക്കുറിച്ച് സമ്പൂര്‍ണ സിദ്ധാന്തം രൂപവത്കരിക്കാനായാലേ നമുക്ക് ദൈവത്തിന്റെ മനസ്സറിയാനാവൂവെന്നുമാണ് അന്ന് അദ്ദേഹം അഭിപ്രായപ്പെട്ടിരുന്നത്.

എന്നാല്‍ ജീവന് സഹായകരമായ ഘടകങ്ങളെല്ലാം ഭൂമിയില്‍ യാദൃച്ഛികമായി ഒത്തുവന്നതാണെന്ന് വ്യക്തമാണെന്ന് ജ്യോതിശ്ശാസ്ത്ര ഗവേഷണങ്ങള്‍ ഉദ്ധരിച്ച് ഹോക്കിങ് പുതിയ പുസ്തകത്തില്‍ പറയുന്നു. മനുഷ്യനുവേണ്ടി കണക്കുകൂട്ടി നിര്‍മിച്ചെടുത്തതല്ല ഭൂമിയെന്ന് ഇതില്‍നിന്ന് വ്യക്തമാണെന്ന് അദ്ദേഹം അഭിപ്രായപ്പെടുന്നു.

യു.എസ്. ഭൗതിക ശാസ്ത്രജ്ഞന്‍ ലിയോനാര്‍ഡ് മ്ലോഡിനോവുമായി ചേര്‍ന്നാണ് ഹോക്കിങ് 'ദ ഗ്രാന്‍ഡ് ഡിസൈന്‍' എഴുതിയത്. സപ്തംബര്‍ ഒമ്പതിന് പുസ്തകം പുറത്തിറങ്ങും.