ചെന്നൈ വിമാനത്താവളത്തില് സ്വര്ണവേട്ട
Posted on: 03 Sep 2010
ചെന്നൈ: ദുബായില്നിന്ന് അനധികൃതമായി കടത്താന് ശ്രമിച്ച 536 സ്വര്ണനാണയങ്ങളുമായി യുവാവ് ചെന്നൈ വിമാനത്താവളത്തില് പിടിയിലായി. 76.54 ലക്ഷം രൂപ വിലവരുന്ന 4.28 കിലോ സ്വര്ണനാണയങ്ങളുമായി പുതുച്ചേരി കാരയ്ക്കല് സ്വദേശി സെയ്ദ് ഫാറൂക്ക് (40) ആണ് അറസ്റ്റിലായതെന്ന് എയര്പോര്ട്ട് കസ്റ്റംസ് കമ്മീഷണര് ആര്. പെരിയസ്വാമി പത്രസമ്മേളനത്തില് പറഞ്ഞു. അടുത്ത കാലത്ത് ചെന്നൈ വിമാനത്താവളത്തില് നടത്തിയ ഏറ്റവും വലിയ സ്വര്ണവേട്ടയാണിതെന്ന് അദ്ദേഹം പറഞ്ഞു.വ്യാഴാഴ്ച രാവിലെ എത്തിയ ദുബായ് എമിറേറ്റ്സിന്റെ വിമാനത്തില് നിന്ന് ഇറങ്ങിയ സെയ്ദ് ഫാറൂക്ക് ഗ്രീന്ചാനലിലൂടെ പുറത്തുകടക്കാന് ശ്രമിക്കവേ, സംശയം തോന്നിയതിനെ തുടര്ന്ന് കസ്റ്റംസ് അധികൃതര് പിടികൂടി. പരിശോധനയില് സെയ്ദ് ഫാറൂക്ക് ധരിച്ച കോട്ടിനുള്ളില് സ്വര്ണനാണയങ്ങള് ഒളിപ്പിച്ചുവെച്ച നിലയില് കണ്ടെത്തി. ഫ്രഞ്ച് പൗരത്വമുള്ള ഇയാളെ കസ്റ്റംസ് അധികൃതര് ചോദ്യംചെയ്തു വരികയാണ്. എട്ട് ഗ്രാമിന്റെയും പത്തുഗ്രാമിന്റെയും സ്വര്ണനാണയങ്ങളാണ് പിടിച്ചെടുത്തത്.
Tags: Mathrubhumi Newspaper Edition. Kerala, India, Asia, World News. Malayalam
»> News in this Section