മുംബൈ: കേരളത്തിന്റെ ബ്രാന്‍ഡ് അംബാസഡറായി തന്നെ നിയമിക്കുന്നതു സംബന്ധിച്ച് സര്‍ക്കാറാണ് തീരുമാനം അറിയിക്കേണ്ടതെന്ന് ബോളിവുഡ് താരം അമിതാഭ് ബച്ചന്‍ പ്രതികരിച്ചു. ബച്ചനെ കേരള ടൂറിസത്തിന്റെ ബ്രാന്‍ഡ് അംബാസഡറാക്കരുതെന്ന് സി.പി.എം. കേന്ദ്രനേതൃത്വം തീരുമാനിച്ചതായുള്ള വാര്‍ത്തയോട് പ്രതികരിക്കുകയായിരുന്നു അദ്ദേഹം. ഒരു പരിപാടിയില്‍ പങ്കെടുത്തശേഷം വാര്‍ത്തലേഖകരോടാണ് ബച്ചന്‍ ഇക്കാര്യം പറഞ്ഞത്. കേരള സര്‍ക്കാറിനു താത്പര്യമില്ലെങ്കില്‍ അവര്‍ ഇക്കാര്യം തന്നെ അറിയിക്കട്ടെയെന്ന് അദ്ദേഹം പറഞ്ഞു.

കേരള ടൂറിസത്തിന്റെ ബ്രാന്‍ഡ് അംബാസഡറാകാന്‍ താത്പര്യമാണെന്ന് അമിതാഭ് പറഞ്ഞിരുന്നു. തുടര്‍ന്ന് ആഭ്യന്തരമന്ത്രി കോടിയേരി ബാലകൃഷ്ണന്‍ ഇക്കാര്യത്തില്‍ ചര്‍ച്ചയ്ക്കായി അദ്ദേഹത്തിന് കത്ത് എഴുതി. ബച്ചന്‍ അനുകൂലമറുപടിയും നല്‍കി. നരേന്ദ്രമോഡി ഭരിക്കുന്ന ഗുജറാത്തിലെ ടൂറിസത്തിന്റെ ബ്രാന്‍ഡ് അംബാസഡറായ ബച്ചന് കേരളം ആ പദവി നലേ്കണ്ടെന്ന നിലാപാടാണ് സി.പി.എം. കേന്ദ്രനേതൃത്വം സ്വീകരിച്ചത്.

ഗുജറാത്ത് ടൂറിസത്തിന്റെ അംബാഡറായതില്‍ തെറ്റൊന്നും കാണുന്നില്ലെന്നും ഗുജറാത്തിലെ രാഷ്ട്രീയത്തെയല്ല ടൂറിസത്തെയാണ് താന്‍ പ്രതിനിധാനം ചെയ്യുന്നതെന്നും ബച്ചന്‍ നേരത്തേ പറയുകയുണ്ടായി.