കോഴിക്കോട്: കോഴിക്കോട് ഇരട്ട സ്‌ഫോടനക്കേസിലെ പ്രധാന പ്രതിയും ലഷ്‌കര്‍ ഇ തൊയ്ബ നേതാവുമായ കണ്ണൂര്‍ തയ്യില്‍ പൗണ്ട് വളപ്പ് സ്വദേശി ഷഫാസിനെ (29) തെളിവെടുപ്പിനായി കോഴിക്കോട്ടെത്തിച്ചു. കേസന്വേഷണം നടത്തുന്ന ദേശീയ അന്വേഷണ ഏജന്‍സി (എന്‍.ഐ.എ.) സൂപ്രണ്ട് ടി.കെ. രാജ്‌മോഹന്റെ നേതൃത്വത്തിലുള്ള സംഘമാണ് വിയ്യൂര്‍ സെന്‍ട്രല്‍ ജയിലില്‍നിന്ന് ഇയാളെ റോഡുമാര്‍ഗം കോഴിക്കോട്ടെത്തിച്ചത്. കോഴിക്കോട്, കണ്ണൂര്‍ ജില്ലകളില്‍ തെളിവെടുപ്പ് നടത്തുന്നതിനായി ഷഫാസിനെ നാലു ദിവസം കോഴിക്കോട്ട് കസ്റ്റഡിയില്‍ സൂക്ഷിക്കുമെന്നാണ് അറിയുന്നത്.

ചൊവ്വാഴ്ച രാവിലെ പതിനൊന്നു മണിയോടെ കോഴിക്കോട്ടെത്തിച്ച ഷഫാസിനെ വെസ്റ്റ്ഹില്‍ ഗവ. റസ്റ്റ്ഹൗസില്‍ പ്രവര്‍ത്തിക്കുന്ന എന്‍.ഐ.എ. ഓഫീസില്‍ പകല്‍ മുഴുവന്‍ ചോദ്യം ചെയ്തു. രാത്രിയോടെ നടക്കാവ് പോലീസ്‌സ്റ്റേഷനില്‍ ലോക്കപ്പ് ചെയ്യുകയും ചെയ്തു.

ബുധനാഴ്ച കണ്ണൂരിലും കോഴിക്കോട്ടുമുള്ള വിവിധ സ്ഥലങ്ങളില്‍ തെളിവെടുപ്പിനായി കൊണ്ടുപോകും. കേസിലെ ഒന്നാംപ്രതിയായ തടിയന്റവിട നസീറിനെ കഴിഞ്ഞാഴ്ച തെളിവെടുപ്പിനായി കോഴിക്കോട്ട് എത്തിച്ചിരുന്നു. വന്‍ സുരക്ഷാക്രമീകരണങ്ങളോടെ കോഴിക്കോട്ടെത്തിച്ച ഷഫാസിന്റെ മുഖവും മങ്കിക്യാപ്‌കൊണ്ട് മറച്ചിരുന്നു.