ഗുരു ഗോപാലകൃഷ്ണന് അന്തരിച്ചു
Posted on: 06 Sep 2012
ചെന്നൈ: നൃത്താചാര്യനും ചലച്ചിത്ര നൃത്തസംവിധായകനുമായ ഗുരുഗോപാലകൃഷ്ണന് (86) അന്തരിച്ചു. കൊടുങ്ങല്ലൂര് സ്വദേശിയായ ഇദ്ദേഹം നിരവധി മലയാളം, തമിഴ്, തെലുങ്ക് സിനിമകളില് നൃത്തസംവിധാനം നിര്വഹിച്ചിട്ടുണ്ട്. പതിറ്റാണ്ടുകള് നീണ്ട കലാജീവിതത്തിനുശേഷം ചെന്നൈ തുറൈപാക്കത്തെ 'ഇഗ്രെറ്റ് വില്ല'യില് വിശ്രമജീവിതത്തിലായിരുന്നു. പ്രമേഹം രോഗം മൂര്ച്ഛിച്ച് ഹൃദയവാല്വിനുണ്ടായ ബലക്ഷയമാണ് മരണകാരണം. മൂന്നു ദിവസമായി പെരുങ്കുടിയിലെ ആസ്പത്രിയില് ചികിത്സയിലായിരുന്നു. ബുധനാഴ്ച പുലര്ച്ചെ മൂന്നുമണിയോടെ മരിച്ചു. ആരാധകരുടെയും ബന്ധുക്കളുടെയും സാന്നിധ്യത്തില് മൃതദേഹം വേളാച്ചേരി ശ്മശാനത്തില് സംസ്കരിച്ചു.കൊടുങ്ങല്ലൂര് നന്ദിയലത്ത് മാധവമേനോന്റെയും അമ്മാളുഅമ്മയുടെയും മകനാണ്. മകന് വിനോദ്കുമാര് വിയറ്റ്നാമില് ബാങ്ക് ജീവനക്കാരനാണ്. മകള് അപ്സര കോലാലമ്പൂരില് 'ക്ഷേത്ര അക്കാദമി' എന്ന നൃത്തവിദ്യാലയം നടത്തുന്നു.
സംസ്ഥാന സര്ക്കാറിന്റെ നാട്യശ്രേഷ്ഠ പുരസ്കാരം, സംഗീത നാടക അക്കാദമി പുരസ്കാരം എന്നിവ ഉള്പ്പെടെ നിരവധി പുരസ്കാരങ്ങള് നേടിയിട്ടുണ്ട്. 'എന്റെ സിനിമാനുഭവങ്ങള്' എന്ന ആത്മകഥാപരമായ പുസ്തകം രചിച്ചിട്ടുണ്ട്. പി.ഭാസ്കരനും ഒന്നിച്ചാണ് സിനിമാലോകത്ത് പ്രവേശിച്ചത്. നൃത്തത്തോടുള്ള ഒടുങ്ങാത്ത അഭിനിവേശവുമായി 1946-ലാണ് ചെന്നൈയില് എത്തുന്നത്. ആര്ട്ട് ഡയറക്ടര് ശങ്കര് വഴി ജെമിനി സ്റ്റുഡിയോയിലേക്കുള്ള കലാകാരന്മാരുടെ തിരഞ്ഞെടുപ്പില് പങ്കെടുത്തു. ആദ്യ ബാച്ചില്ത്തന്നെ തിരഞ്ഞെടുക്കപ്പെടുകയും ചെയ്തു. പ്രതിഭ തിരിച്ചറിഞ്ഞ് ഗുരു ഗോപിനാഥ് ശിഷ്യത്വം നല്കി.
നീലക്കുയില്, ലൈലമജ്നു, ജീവിതനൗക, കരുണ, ഡോക്ടര് തുടങ്ങി നിരവധി മലയാള സിനിമകളിലും ഔവ്വയാര്, സീതാരാമകല്യാണം, മയാബസാര് ചന്ദ്രലേഖ തുടങ്ങി തെലുങ്ക്, തമിഴ് ചിത്രങ്ങളിലും നൃത്തസംവിധാനം നിര്വഹിച്ചു. ഇതിനൊപ്പം ചില സിനിമകളില് നര്ത്തകവേഷവും അണിഞ്ഞു.
നര്ത്തകിയായ കുസുമം ഗോപാലകൃഷ്ണനാണ് ഭാര്യ. 1971 മുതല് രണ്ടുപതിറ്റാണ്ടിലേറെക്കാലം ഇവര് പുണെയിലെ പാഞ്ച്ഗണി അമേരിക്കന് സ്കൂളില് നൃത്താധ്യാപകരായിരുന്നു. വിരമിച്ചശേഷം കൊടുങ്ങല്ലൂരിലായിരുന്നു. രണ്ടു വര്ഷം മുമ്പാണ് വീണ്ടും ചെന്നൈയിലെത്തിയത്.
വിടവാങ്ങിയത് ലോകം അറിയുന്ന നര്ത്തകന്
കൊടുങ്ങല്ലൂര്: ജന്മസിദ്ധമായ പ്രതിഭയും മടികൂടാത്ത പരിശ്രമവുമാണ് നന്ത്യേലത്ത് മാധവമേനോന്റെയും ശങ്കരാടി അമ്മാളുഅമ്മയുടെയും മകനായ ഗോപാലകൃഷ്ണനെ ലോകം അറിയുന്ന ഗുരു ഗോപാലകൃഷ്ണന് എന്ന നര്ത്തകനാക്കിയത്.
ഗുരു ഗോപിനാഥിന്റെ ശിഷ്യത്വം സ്വീകരിച്ച് തന്റെ ജീവിതം നൃത്തത്തിനുവേണ്ടി സമര്പ്പിക്കുകയായിരുന്നു അദ്ദേഹം. ഗുരു ഗോപിനാഥിന്റെ നൃത്തസംഘത്തില് ഒരുപതിറ്റാണ്ടുകാലം പ്രവര്ത്തിച്ചു. ഈ കാലയളവില് നിരവധി തമിഴ്, തെലുങ്ക്, കന്നഡ, മലയാളം, ഹിന്ദി, സിംഹളഭാഷാ സിനിമകളില് നൃത്തം അവതരിപ്പിച്ചു. വാഴേങ്കട കുഞ്ചുനായരുടെ ശിഷ്യത്വത്തില് കഥകളികൂടി അഭ്യസിച്ച് നൃത്തരംഗത്ത് അവതരിപ്പിച്ചു.
1953ല് മഹാകവി വള്ളത്തോളിന്റെ നേതൃത്വത്തിലുള്ള ചൈനാപര്യടനസംഘത്തില് ഗുരു ഗോപാലകൃഷ്ണന് അംഗമായിരുന്നു. ഗുരു ഗോപിനാഥ് ശ്രീകൃഷ്ണനായും ഗുരു ഗോപാലകൃഷ്ണന് അര്ജുനനായും ഭഗവദ്ഗീത എന്ന നൃത്തനാടകം പണ്ഡിറ്റ് ജവാഹര്ലാല് നെഹ്രുവിന്റെ വസതിയായ തീന്മൂര്ത്തി ഭവനില് അവതരിപ്പിച്ചു. മേക്കപ്പ് കഴിഞ്ഞ് തണുത്തുവിറച്ചിരുന്ന ഗുരു ഗോപാലകൃഷ്ണന് ഇന്ദിരാഗാന്ധി പുതയ്ക്കാന് ഷാള് നല്കി. ഇത് ഒരു നിധിപോലെ ഏറെക്കാലം ഇദ്ദേഹം സൂക്ഷിച്ചു.
ഗുരുവായൂരില് ഹിന്ദുമഹാസമ്മേളനത്തില് വള്ളത്തോളിന്റെ 'ഭക്തിയും വിഭക്തിയും' അവതരിപ്പിച്ചു.
മദിരാശിയില്നിന്നുള്ള ആദ്യകാല സിനിമകളിലെ അനിവാര്യഘടകമായിരുന്നു ഡാന്സര് എന്ന നിലയ്ക്ക് ഗുരു ഗോപാലകൃഷ്ണന്. 1954ല് പ്രസിഡന്റിന്റെ രജതകമലം നേടിയ 'നീലക്കുയില്' എന്ന സിനിമയ്ക്കുവേണ്ടി സംഘനൃത്തം കമ്പോസ് ചെയ്തു. തുടര്ന്ന് സീതാരാമകല്യാണം, ശ്രീശൈലമാഹാത്മ്യം, അമ്മ, കരുണ തുടങ്ങി വ്യത്യസ്ത ഭാഷാചിത്രങ്ങളില് നൃത്തം സംവിധാനം ചെയ്തു. എം.ജി.ആറിന്റെ നാം, മായാബസാര്, ഏഴൈ, ഉഴവന്, സുജാത എന്നീ തമിഴ്ചിത്രങ്ങളില് നൃത്താഭിനയവും നടത്തി. 1956ല് ഭാരതി ബാലെ ഗ്രൂപ്പ് എന്ന നൃത്തസംഘത്തിന് രൂപംകൊടുത്തു. എം.ബി. ശ്രീനിവാസനായിരുന്നു ഗ്രൂപ്പിന്റെ സംഗീതസംവിധായകന്. ഗാനരചന നിര്വഹിച്ചിരുന്നത് കൂട്ടുകാരനും ബന്ധുവുമായിരുന്ന പി. ഭാസ്കരനായിരുന്നു. എ.ആര്. റഹ്മാന്റെ പിതാവ് ആര്.കെ. ശേഖറായിരുന്നു ഹാര്മോണിയം വായിച്ചിരുന്നത്.
മലയാള നൃത്തനാടകവേദികളില് സഞ്ചരിക്കുന്ന മേഘങ്ങളും, കുതിച്ചു ചാടുന്ന പൂഞ്ചോലകളും, കടലിലെ തിരമാലകളും ആദ്യമായി വേദിയില് കൊണ്ടുവന്നത് ഇദ്ദേഹമാണ്. കോട്ടയത്ത് നടന്ന സാഹിത്യപരിഷത്ത് സമ്മേളനവേദിയിലെ നൃത്തപരിപാടിക്കാണ് ഇത് പ്രയോഗിച്ചത്. വിദേശത്തുനിന്ന് ഇറക്കുമതി ചെയ്ത 'സൈക്ലോ റാമ' ലൈറ്റിങ് സംവിധാനം ഉപയോഗിച്ചാണ് ഇത് നിര്വ്വഹിച്ചത്.
രാഷ്ട്രപതി സഞ്ജീവറെഡ്ഡിയുടെ മകളുടെ വിവാഹവേദിയില് ഗുരു ഗോപാലകൃഷ്ണന് നൃത്തം അവതരിപ്പിച്ചിട്ടുണ്ട്. ആഫ്രിക്കന് സ്വാതന്ത്ര്യസമരനേതാവായ ലു മുംബയെ ആധാരമാക്കി ചെയ്ത നൃത്തശില്പം ദേശീയശ്രദ്ധ നേടി.
1968ല് മദ്രാസിലെ നവരത്ന തിയ്യറ്ററില് നൂറുദിവസം തുടര്ച്ചയായി വിദേശ ടൂറിസ്റ്റുകള്ക്കുവേണ്ടി നൃത്തം അവതരിപ്പിച്ചു.
ഇടക്കാലത്ത് മഹാരാഷ്ട്രയിലെ ന്യൂ ഇറാ ഇന്റര്നാഷണല് സ്കൂളില് അധ്യാപകനായി 22 വര്ഷം ജോലിചെയ്തു. ജീവിതരേഖ, എന്റെ സിനിമാനുഭവങ്ങള് എന്നീ കൃതികള് രചിച്ചു.
മദ്രാസിലെ ചിന്മയ മിഷന് പുരസ്കാരം, കേരള സംഗീത അക്കാദമി പുരസ്കാരം, മലേഷ്യയിലെ ക്ഷേത്ര അക്കാദമി- നടനകലാരത്നം അവാര്ഡ്, കലാദര്പ്പണത്തിന്റെ നാട്യകുലശ്രേഷ്ഠ അവാര്ഡ്, കേരള ഫിലിം ക്രിട്ടിക്സ് അസോസിയേഷന്റെ ചലച്ചിത്രപ്രതിഭാ അവാര്ഡ് എന്നിവ ലഭിച്ചിട്ടുണ്ട്.
Tags: Mathrubhumi Newspaper Edition. Kerala, India, Asia, World News. Malayalam
»> News in this Section