നോബേല്‍ പുരസ്‌കാരം നേടിയ അമര്‍ത്യ സെന്നിനുശേഷം ഇന്ത്യയില്‍നിന്ന് ഹാര്‍വാര്‍ഡ് സര്‍വകലാശാലയിലെ ഫുള്‍ പ്രൊഫസ്സറായി നിയമിക്കപ്പെടുന്ന വ്യക്തി. ലോകത്തെ മികച്ച സാമ്പത്തിക വിദഗ്ധരില്‍ ഒരാളായി പരിഗണിക്കപ്പെടുന്ന ഡോ.ഗീത ഗോപിനാഥിന് ഇത് അര്‍ഹിച്ച സ്ഥാനലബ്ധിതന്നെ. പക്ഷേ, ഇന്ത്യയ്ക്കും, മലയാളിയെന്ന നിലയ്ക്ക് കേരളത്തിനും തീര്‍ത്തും അഭിമാനാര്‍ഹമായ നേട്ടമാണിത്. കണ്ണൂര്‍ സ്വദേശിയായ ഗീത ഗോപിനാഥ് അടുത്ത മാസം മുതല്‍ക്ക് ഹാര്‍വാര്‍ഡിലെ അധ്യാപക സംഘത്തില്‍ പങ്കാളിയാകുമ്പോള്‍ അക്കാദമിക് രംഗത്ത് കേരളത്തിന്റെ വലിയ നേട്ടങ്ങളിലൊന്നായി ഇതു മാറും. യൂറോപ്പിലെ സാമ്പത്തിക പ്രതിസന്ധിയെക്കുറിച്ചുള്ള ഗവേഷണവും രാജ്യാന്തര സമ്പദ് വ്യവസ്ഥയിലെ ഗതിവിഗതികളെക്കുറിച്ചുള്ള നിരീക്ഷണങ്ങളുമാണ് ഗീത ഗോപിനാഥിനെ പ്രശസ്തയാക്കിയത്. സമീപകാലത്തുണ്ടായ സാമ്പത്തിക മാന്ദ്യത്തെത്തുടര്‍ന്ന് ഏറെ പഠനങ്ങള്‍ നടന്ന ഇന്റര്‍നാഷണല്‍ മാക്രോഇക്കണോമിക്‌സ് മേഖലയിലെ വിദഗ്ധയായാണ് അവര്‍ പരിഗണിക്കപ്പെടുന്നത്. ഇന്റര്‍നാഷണല്‍ മാക്രോഇക്കണോമിക്‌സ് ആന്‍ഡ് ഫിനാന്‍സില്‍ ജോലിചെയ്യുമ്പോഴാണ് ഈ മേഖലയില്‍ നടത്തിയ നിര്‍ണായക ഗവേഷണങ്ങള്‍ക്കുള്ള അംഗീകരമെന്നോണം ഹാര്‍വാര്‍ഡിന്റെ ക്ഷണം ഗീതയെ തേടിയെത്തുന്നത്. ലോകത്തെ മികച്ച സാമ്പത്തികശാസ്ത്ര പഠന കേന്ദ്രമായ ഹാര്‍വാര്‍ഡ് ഇക്കണോമിക്‌സ് ഡിപ്പാര്‍ട്ട്‌മെന്റില്‍ ഫുള്‍ പ്രൊഫസ്സറായി നിയമിക്കപ്പെടുന്ന മൂന്നാമത്തെ മാത്രം വനിതയാണ് ഗീത ഗോപിനാഥ്. അതും 38-ാം വയസ്സില്‍. കണ്ണൂര്‍ മയ്യില്‍ സ്വദേശിയായ ടി.വി.ഗോപിനാഥിന്റെയും വി.സി.വിജയലക്ഷ്മിയുടെയും മകളാണ് ഗീത. കൊല്‍ക്കത്തയിലാണ് ജനിച്ചത്. പഠിച്ചതും വളര്‍ന്നതും മൈസൂരില്‍. ഡല്‍ഹിയിലെ ലേഡി ശ്രീരാം കോളേജില്‍നിന്ന് കോളേജില്‍നിന്ന് ബിരുദം നേടിയത് രാഷ്ട്രപതിയുടെ സ്വര്‍ണമെഡലോടെയാണ്. ഡല്‍ഹി സ്‌കൂള്‍ ഓഫ് ഇക്കണോമിക്‌സില്‍നിന്ന് ബിരുദാനന്തര ബിരുദം. സിവില്‍ സര്‍വീസാണ് ആദ്യം ഉന്നമിട്ടതെങ്കിലും, പിന്നീട് സാമ്പത്തിക ശാസ്ത്രത്തില്‍ ഉന്നത ഗവേഷണത്തിലേക്ക് തിരിഞ്ഞു. 1990-91 കാലയളവില്‍ ഇന്ത്യ നേരിട്ട സാമ്പത്തിക പ്രതിസന്ധിയും മാന്ദ്യവുമാണ് ഈ രംഗത്ത് കൂടുതല്‍ ഗവേഷണം നടത്തണമെന്ന താത്പര്യമുണ്ടാക്കിയത്. അന്താരാഷ്ട്ര സമ്പദ് വ്യവസ്ഥയില്‍ കൂടുതല്‍ പഠനം നടത്തണമെന്ന് തീരുമാനിക്കുന്നതും ഇതോടെ. അമേരിക്കയിലെത്തിയ ഗീത, പ്രിന്‍സ്റ്റണ്‍ സര്‍വകലാശാലയില്‍നിന്ന് ഡോക്ടറേറ്റ് നേടി. ഷിക്കാഗോ സര്‍വകലാശാലയില്‍ അസിസ്റ്റന്റ് പ്രൊഫസ്സറായാണ് കരിയറിന് തുടക്കമിട്ടത്. 2005-ല്‍ ഹാര്‍വാര്‍ഡില്‍ ചേര്‍ന്നു. ലണ്ടന്‍ സ്‌കൂള്‍ ഓഫ് ഇക്കണോമിക്‌സ്, ഓക്‌സ്ഫഡ് സര്‍വകലാശാല, നാഷണല്‍ ബ്യൂറോ ഓഫ് ഇക്കണോമിക്കല്‍ റിസര്‍ച്ച് എന്നിവിടങ്ങിയില്‍ ഗൈഡായി പ്രവര്‍ത്തിക്കുന്നതിനൊപ്പം ഒട്ടേറെ സാമ്പത്തികശാസ്ത്ര പ്രസിദ്ധീകരണങ്ങളുടെ പത്രാധിപസമിതിയിലും അവര്‍ അംഗമാണ്. ഡല്‍ഹി സ്‌കൂളില്‍ സഹപാഠിയായിരുന്ന ഇക്ബാല്‍ ധലിവാളാണ് ഗീതയുടെ ഭര്‍ത്താവ്. മസാച്ചുസെറ്റ്‌സ് ഇന്‍സ്റ്റിറ്റിയൂട്ട് ഓഫ് ടെക്‌നോളജിയിലെ ജമീല്‍ പ്രോവര്‍ട്ടി ആക്ഷന്‍ ലാബില്‍ പോളിസി ഡയറക്ടറായി പ്രവര്‍ത്തിക്കുകയാണ് ഇദ്ദേഹം. ഒരിക്കല്‍ ഹാര്‍വാര്‍ഡിന്റെ വാതില്‍ക്കല്‍ ഗീതയെത്തിയതാണ്. പി.എച്ച്ഡി പഠനത്തിനായി. ഹാര്‍വാര്‍ഡില്‍ പ്രവേശനം കിട്ടിയെങ്കിലും സാമ്പത്തിക സഹായമൊന്നും നല്‍കാന്‍ സര്‍വകലാശാല തയ്യാറായില്ല. അതേത്തുടര്‍ന്നാണ് മറ്റൊരു സര്‍വകലാശാലയിലേക്ക് അവര്‍ക്ക് തിരിയേണ്ടിവന്നത്. സിയാറ്റിലിലെ വാഷിങ്ടണ്‍ സര്‍വകലാശാലയിലാണ് ആദ്യം ഗവേഷണം തുടങ്ങിയത്. രണ്ടുവര്‍ഷത്തിനുശേഷം അവിടം വിട്ടു. ഇപ്പോള്‍, ഹാര്‍വാര്‍ഡിന്റെ ഫുള്‍ പ്രൊഫസ്സറെന്ന നിലയ്ക്ക് ഗീത വീണ്ടും മഹത്തായ ആ പടികള്‍ കയറാന്‍ ഒരുങ്ങിക്കഴിഞ്ഞു. rgirishkumar@gmail.com