ന്യൂഡല്‍ഹി: അഴിമതി കേസില്‍ ശിക്ഷിക്കപ്പെട്ട പാകിസ്താന്‍ മുന്‍ പ്രധാനമന്ത്രി നവാസ് ഷെരീഫിനെ അറസ്റ്റിലായതിനു പിന്നാലെ ഇന്ത്യന്‍ പ്രധാനമന്ത്രി നരേന്ദ്ര മോദിക്കെതിരെ വിമര്‍ശവുമായി കോണ്‍ഗ്രസ് രംഗത്തെത്തി. മോദിയും ഷരീഫും തമ്മിലുണ്ടായിരുന്ന സൗഹൃദത്തെ പരാമര്‍ശിച്ചാണ് കോണ്‍ഗ്രസിന്റെ വിമര്‍ശം.

ഷെരീഫ് പ്രധാനമന്ത്രിയായിരുന്നപ്പോള്‍ മോദി പാകിസ്താനിലേക്ക് നടത്തിയ അപ്രതീക്ഷിത സന്ദര്‍ശനത്തെ ഓര്‍മിപ്പിച്ചുകൊണ്ടാണ് സുഹൃത്തിന് സംഭവിച്ചതില്‍ എന്താണ് പറയാനുള്ളതെന്ന് കോണ്‍ഗ്രസ് ഔദ്യോഗിക ട്വിറ്ററില്‍ ചോദിക്കുന്നത്. നവാസ് ഷെരീഫ് അഴിമതി കേസില്‍ അറസ്റ്റിലായിരിക്കുന്നു. അദ്ദേഹത്തിന്റെ പ്രിയപ്പെട്ട സുഹൃത്ത് പ്രധാനമന്ത്രി മോദിക്ക് എന്താണ് ഇതിനെക്കുറിച്ച് പറയാനുള്ളതെന്ന് അറിഞ്ഞാല്‍ കൊള്ളാം- മോദിയും ഷെരീഫും കൈകോര്‍ത്ത് നടന്നുനീങ്ങുന്ന 2015ലെ ചിത്രത്തിനൊപ്പമുള്ള ട്വീറ്റില്‍ കോണ്‍ഗ്രസ് ചോദിക്കുന്നു.

അതിനിടെ, പ്രധാനമന്ത്രി മോദിക്കെതിരെ വിമര്‍ശവുമായി പാകിസ്താന്‍ തെഹ്‌രീക് ഇ ഇന്‍സാഫ് (പി.ടി.ഐ) നേതാവും മുന്‍ ക്രിക്കറ്റ് താരവുമായ ഇമ്രാന്‍ ഖാനും രംഗത്തെത്തി. നവാസ് ഷെരീഫും ഇന്ത്യന്‍ പ്രധാനമന്ത്രി മോദിയും ചേര്‍ന്നാണ് പാകിസ്താനിലും അതിര്‍ത്തിയിലും ക്രമസമാധാന പ്രശ്‌നങ്ങള്‍ സൃഷ്ടിക്കുന്നതെന്ന് ഇമ്രാന്‍ ഖാന്‍ ആരോപിച്ചു. ഓരോ തവണ നവാസ് ഷെരീഫ് രാഷ്ട്രീയ പ്രതിസന്ധി നേരിടുമ്പോഴും അതിര്‍ത്തിയില്‍ പ്രശ്‌നങ്ങള്‍ ഉണ്ടാകുകയും തീവ്രവാദ പ്രവര്‍ത്തനങ്ങള്‍ വര്‍ധിക്കുകയും ചെയ്യും. ഇത് വെറും യാദൃശ്ചികമായി സംഭവിക്കുന്നതല്ലെന്നും ഇമ്രാന്‍ ആരോപിച്ചു.

നവാസ് ഷെരീഫ് അറസ്റ്റിലായതിനു പിന്നാലെ ബിജെപിയും ട്വീറ്റിലൂടെ പ്രതികരിച്ചിരുന്നു. ഇന്ത്യയിലെയും അഴിമതിക്കാരായ രാഷ്ട്രീയക്കാര്‍ ജയിലിലേക്കു പോകുന്നത് ഇവിടുത്തെ ജനങ്ങളും കാത്തിരിക്കുകയാണെന്നായിരുന്നു ബിജെപിയുടെ ട്വീറ്റ്.

മോദി സര്‍ക്കാരിന്റെ വിദേശകാര്യ നയത്തെ വിമര്‍ശിച്ചുകൊണ്ടും കഴിഞ്ഞദിവസം കോണ്‍ഗ്രസ് രംഗത്തെത്തിയിരുന്നു. വിദേശ ശക്തിയുടെ സമ്മര്‍ദ്ദത്തിനു മുന്നില്‍ വണങ്ങി നില്‍ക്കുകയാണ് മോദി എന്ന് പ്രത്യേക അജണ്ടകള്‍ കൂടാതെ ചൈന സന്ദര്‍ശിച്ച പ്രധാനമന്ത്രിയുടെ നടപടി ചൂണ്ടിക്കാട്ടി കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി ആരോപിച്ചിരുന്നു.

Content Highlights: Nawaz Sharif arrested, Imran Khan, Congress, Modi-Sharif friendship, rahul gandhi