കെ.എം. ഷാജഹാൻ, ഷാജർഖാൻ ആദിയായവർ ചെയ്യാൻ ശ്രമിച്ച കുറ്റകൃത്യം ആസ്ട്രൽ പ്രൊജക്ഷനാണെന്ന് ഒടുവിൽ ബോധ്യമായി. ശരീരത്തിൽനിന്ന് ആത്മാവിനെ വേർപെടുത്തുന്ന സാത്താൻ സേവ. കുടുംബത്തെ കൊന്ന കേഡൽ ജിൻസൺ രാജ പറഞ്ഞ കെട്ടുകഥപോലെയല്ലിത്. സംസ്ഥാനത്തെ മുഖ്യ മേലാവി പിണറായി വിജയനും പാർട്ടിമേലാവി കോടിയേരി ബാലകൃഷ്ണനും ഇത് സ്ഥിരീകരിച്ചിട്ടുണ്ട്. ജിഷ്ണുവിന്റെ കുടുംബത്തിന്റെ കമ്യൂണിസ്റ്റ് ആത്മാവിനെ സി.പി.എം. ശരീരത്തിൽനിന്ന് റാഞ്ചിയെടുക്കാനാണ് ഇവർ ശ്രമിച്ചത്. പിണറായിയുടെ പേടിസ്വപ്നങ്ങളിൽ പണ്ടൊരു കൊടിയ സാത്താനുണ്ടായിരുന്നു-വി.എസ്. അച്യുതാനന്ദൻ. ആ സാത്താന്റെ കളരിഗുരുവായിരുന്ന ഷാജഹാൻ ഇത് ചെയ്തില്ലെങ്കിലല്ലേ അതിശയിക്കേണ്ടതുള്ളൂ. 

ഒരു വീഴ്ചയ്ക്ക് ഒന്നെന്നനിലയ്ക്ക് മുഖ്യമന്ത്രിക്ക് പണ്ഡിതരും ‘സ്വയംസേവ’കരുമായ ഉപദേശകരെ യഥേഷ്ടംവെയ്ക്കാം. മരിച്ച മകന് നീതിതേടി സമരംചെയ്യാനിറങ്ങിയ ജിഷ്ണുവിന്റെ കുടുംബം ചിലരിൽനിന്ന് സൗജന്യമായി ഉപദേശം തേടിയത് മഹാപരാധവും. ഈ സമരത്തിന്റെ ബാക്കിപത്രമായി നാട്ടുകാർ നിർബന്ധമായും പഠിച്ചിരിക്കേണ്ട ഗുണപാഠമുണ്ട്.  കമ്യൂണിസ്റ്റ് കുടുംബങ്ങൾ തിങ്ങിപ്പാർക്കുന്ന നാടാണ് കേരളം. നിങ്ങളുടെ അയലത്തൊക്കെ ഇത്തരം കുടുംബങ്ങളെക്കാണാം. അവർക്ക് എന്തെങ്കിലും വിഷമങ്ങളും കാണും. ഇതുകണ്ട് സഹാനുഭൂതി തോന്നി കയറി ഇടപെട്ടുകളയരുത്. കമ്യൂണിസ്റ്റ് കണ്ണീർ മുതലെടുക്കുന്നത് ജാമ്യമില്ലാത്ത കുറ്റമാണ്. വെറുതെ അഴിയെണ്ണാൻ നിൽക്കണ്ട. ഈ കുടുംബങ്ങളിൽ ഏതെങ്കിലും വിഷമിക്കുന്നതായി അറിഞ്ഞാൽ ഏറ്റവും അടുത്തുള്ള പാർട്ടി ഓഫീസിൽ വിവരം അറിയിക്കുകയേ ചെയ്യാവൂ. ഇതിനായി ഉടൻതന്നെ ഒരു ടോൾഫ്രീ നമ്പർ നിലവിൽവരുന്നതായിരിക്കും. 

***

ഈ സർക്കാരിനെതിരേ ആരെങ്കിലും ഗൂഢാലോചന നടത്തുന്നുവെങ്കിൽ അത് സി.പി.ഐ. ആണ്. കാനം രാജേന്ദ്രനും കണ്ടാൽ തിരിച്ചറിയാവുന്ന മറ്റ്  പ്രതികളും. പിണറായിയെ സാത്താൻ സേവക്കാരനായി ചിത്രീകരിക്കാനാണ് ഇവരുടെ ശ്രമം. കമ്യൂണിസ്റ്റ് ശരീരത്തിൽനിന്ന് ഇടതുപക്ഷത്തിന്റെ ആത്മാവ് അടർത്തിമാറ്റുന്ന ആസ്ട്രൽ പ്രൊജക്ഷൻ മുഖ്യമന്ത്രി നടത്തുന്നുവത്രേ. ധൈര്യമുണ്ടെങ്കിൽ ഇവരെയാണ് പിടിച്ച് അകത്തിടേണ്ടത്. പക്ഷേ, ചെയ്യില്ല. കാരണം സി.പി.എം.-സി.പി.ഐ. ഗലാട്ട പുതുമയുള്ള സംഗതിയല്ല. അരനൂറ്റാണ്ടായി പരസ്പരധാരണയോടെ തുടരുന്ന കലാപരിപാടിയാണ്.  സഹോദരങ്ങളായതിനാൽ ഇവരുടെ പോരാട്ടത്തിന് മഹാഭാരത യുദ്ധംപോലെ ഇതിഹാസമാനമുണ്ടെന്ന് നമ്മൾ ധരിച്ചുകളയും. ചരിത്രം അറിയാത്തതിന്റെമാത്രം കുഴപ്പം. 

കാനം രാജേന്ദ്രൻ മുഖ്യമന്ത്രി പിണറായി വിജയനെ മുതലാളിയോട് ഉപമിച്ചത് അമേരിക്ക അഫ്ഗാനിലിട്ട  മദർ ബോംബിനെക്കാൾ മാരകമായി ചിത്രീകരിച്ച് ആഘോഷിക്കുകയാണ് മാധ്യമങ്ങൾ. ഇ.എം.എസിനെ എം.എൻ. ഗോവിന്ദൻനായർ തരംകിട്ടിയപ്പോഴൊക്കെ ജന്മി എന്നുവിളിച്ച് അധിക്ഷേപിച്ചിട്ടുണ്ട്. അന്നൊക്കെ ഈ ചാനലുകൾ ഇല്ലാഞ്ഞത് നന്നായി. സി.പി.ഐ.യുടെ നെടുംതൂണായ ടി.വി. തോമസിനെ ഐ.ആർ.എട്ടിന് വളമാക്കുമെന്ന് സി.പി.എമ്മുകാർ വീമ്പിളക്കിയിട്ടുണ്ട്. കോൺഗ്രസ് ബാന്ധവം കൊതിച്ച സി.പി.ഐ.യെ വർഗശത്രുവെന്ന് വിളിച്ച് വധിച്ചിട്ടുണ്ട് ഇ.എം.എസ്. 

ഈ തമ്മിലടി ഒരു തന്ത്രമോ കുതന്ത്രമോ ആണ്. സി.പി.എമ്മും സി.പി.ഐ.യും മോരും മുതിരയുമായിരിക്കണമെന്ന് സി.പി.ഐ.ക്ക് നല്ല നിർബന്ധമുണ്ട്. ഇടതുപക്ഷത്തിന് ഭരണം കിട്ടുമ്പോഴൊക്കെ സി.പി.ഐ.ക്ക് പേടിയാവും. ന്യൂനപക്ഷമായ തങ്ങളെ സി.പി.എം. വിഴുങ്ങിക്കളയുമോയെന്ന ചെറുതല്ലാത്ത പേടി. 1967-ൽ സപ്തകക്ഷി മുന്നണിയുണ്ടാക്കിയപ്പോൾ അച്യുതമേനോൻ സി.പി. ഐ.ക്കാർക്ക്  ഇങ്ങനെയൊരു മുന്നറിയിപ്പ് നൽകിയിരുന്നുവത്രേ. ഭിന്നിപ്പെല്ലാം മറന്ന് സി.പി.എമ്മും സി.പി.ഐ.യും ഒന്നാണെന്ന് കരുതിയാൽ നമ്മൾ പിന്നെ ബാക്കിയുണ്ടാവില്ല, ഓർമവേണം. കാനവും ചെയ്യുന്നത് ഇതുതന്നെ. ഇടയ്ക്കിടെ ഭിന്നിപ്പ് ഓർമപ്പെടുത്തിക്കൊണ്ടിരിക്കണം. എന്നാലേ സി.പി.ഐ.യ്ക്ക് രക്ഷയുള്ളൂ. ഇതൊന്നും കണ്ട് ആരും മനപ്പായസമുണ്ണേണ്ടതില്ലെന്ന് കോടിയേരി പറഞ്ഞില്ലേ, അതുമാത്രമാണ് സത്യം.

പക്ഷേ, കാനത്തിന് പറ്റിയ തെറ്റ് മാപ്പാക്കാവുന്നതല്ല. സർക്കാരിനെ വെള്ളംകുടിപ്പിച്ച മഹിജയുടെ സമരം ഒത്തുതീർക്കാൻ സീതാറാം യെച്ചൂരി ഫോണിലൂടെ സമരക്കാരുടെ കാലുപിടിച്ചത് മുഖ്യമന്ത്രിതന്നെ വെളിപ്പെടുത്തിയിരുന്നു. മഹിജയെ വളയത്ത് തിരിച്ചെത്തിക്കാൻ വലിച്ച ചരടുകളുടെ എണ്ണവും കരാറിന്റെ അപ്പക്കഷ്ണമുണ്ടാക്കാൻ ഒഴുക്കിയ വിയർപ്പിന്റെ അളവും മുഖ്യമന്ത്രിക്കറിയാം. കാര്യങ്ങളുടെ കിടപ്പ് ഇതായിരിക്കേ, സമരം തീർന്നുവെന്ന് ഉറപ്പാക്കിയശേഷം എന്തുനേടിയെന്ന് മുഖ്യമന്ത്രി ചോദിച്ചത് കാനം പറയുന്നതുപോലെ മുതലാളിമാരുടെ ഭാഷയല്ല, പാലം വലിക്കാരുടെ ഭാഷയാണ്. ഒരുതരം കൂരായണാ പ്രസ്ഥാനം.  ഇതിനെ മുതലാളിത്തത്തിന്റെ ലക്ഷണമായി കാനം വ്യാഖ്യാനിച്ചത് മുതലാളിമാരോടുള്ള പഴയ ശത്രുതകൊണ്ട് മാത്രമായിരിക്കണം.  

ദേശാഭിമാനിയിലെ ലേഖനത്തിൽ അട്ടിമറിക്കാരെ ആനന്ദമാർഗികളോട് കോടിയേരി ഉപമിച്ചത് പ്രതിപക്ഷത്തിന് ആയുധം കൊടുക്കുന്ന സി.പി.ഐ.ക്കാരെ ഉദ്ദേശിച്ചാവില്ല.  ബംഗാളിലെ കമ്യൂണിസ്റ്റ് സർക്കാരിനെ അട്ടിമറിക്കാൻ ആകാശത്തുനിന്ന് വിദേശികൾ എ.കെ.47 തോക്കുകൾ ഇട്ടുകൊടുത്ത കൂട്ടരാണ് ആനന്ദമാർഗികൾ. തോക്കുകേസിൽ കുരുങ്ങിപ്പോയ ഇവരെ കാത്തിരുന്ന് നിരാശരായ ബംഗാളിലെ സി.പി.എം. ഒടുവിൽ ആത്മഹത്യചെയ്യാൻ നിർബന്ധിതരാവുകയായിരുന്നു. എന്നാലും കോടിയേരി പറഞ്ഞതിൽ ലേശം സത്യമുണ്ട്. ഇവിടത്തെ സി.പി.ഐ.ക്കാരുടെ മാർഗം ആനന്ദമാർഗികളുടേതുപോലെ സായുധകലാപമല്ല,  ഉത്തരവാദിത്വമില്ലാത്ത ആനന്ദമാണ്. ഭരണത്തിന്റെ വണ്ടി ഉന്തിത്തള്ളി കൊണ്ടുപോകേണ്ട  ഉത്തരവാദിത്വം സി.പി.എമ്മിന്. വണ്ടിക്കകത്തിരുന്ന് പൂരപ്പാട്ട് പാടി ആനന്ദിക്കുന്ന പണി സി.പി.ഐ.ക്കും. 

***
കാനം അല്പംകൂടി ക്ഷമിക്കണം. എല്ലാം ശരിയാവും. മുൻ ഡി.ജി.പി. രമൺ ശ്രീവാസ്തവ വരുന്നുണ്ട്. ജ്യോതിഷത്തിൽ അസാമാന്യ പാണ്ഡിത്യമുള്ള അദ്ദേഹം കളംവാഴുന്നതോടെ മുഖ്യമന്ത്രിയുടെ രാശിക്കുറ്റം മാറിക്കിട്ടും. ഈ കഥാപാത്രം കുറേക്കാലമായി വിശ്രമത്തിലാണ്. അതിനാൽ പുതുതലമുറയ്ക്ക് അത്ര പരിചയമുണ്ടാവില്ല.  ഇദ്ദേഹത്തെക്കുറിച്ച് അറിയാൻ ചാരക്കേസിന്റെ കാലത്ത് പാർട്ടിപ്പത്രത്തിൽ വന്ന ഭയാനകമായ ഈ  സാമ്പിൾ ഉപകരിച്ചേയ്ക്കും ‘‘ശവംതീനികളെ മാത്രമല്ല കൊടുംകുറ്റവാളികളെയും മുഖ്യമന്ത്രി കരുണാകരന് പഥ്യം. കൊലയാളിയായ മന്ത്രി രാഘവനെയും കൊടുംകുറ്റവാളിയെന്ന് സംശയിക്കുന്ന ശ്രീവാസ്തവയെയും കരുണാകരൻ ഒരുപോലെ ന്യായീകരിക്കുന്നു.’’ വിസ്തരഭയത്താലും മാനനഷ്ടക്കേസ് ഭയന്നും അന്നത്തെ പാർട്ടിസാഹിത്യം ഉദ്ധരിക്കുന്നത് ഒറ്റ പാരയിൽ നിർത്തട്ടെ. ഈ ശ്രീവാസ്തവയുടെ കാലത്ത് പാലക്കാട്ട് പോലീസ് വെടിവെപ്പിൽ പതിനൊന്നുവയസ്സുള്ള സിറാജുന്നിസ കൊല്ലപ്പെട്ട വാസ്തവം കാനം ഇപ്പോഴും ഓർമിക്കുന്നുണ്ട്. ആ പെൺകുട്ടി ഇരുനൂറുപേരുടെ കലാപം നയിച്ചെന്ന അവാസ്തവക്കേസ് അന്നെടുത്തത് കാനം എടുത്തുപറഞ്ഞി​െല്ലന്നേയുള്ളൂ.  പോലീസുപദേശി ഇല്ലാഞ്ഞിട്ടും അസംബന്ധ ഗൂഢാലോചനകൾ കെട്ടിയെഴുന്നള്ളിക്കുന്ന ഇക്കാലത്ത് ഈ രംഗത്ത് മുൻപരിചയമുള്ള ഒരു ഉപദേശികൂടിവന്നാൽ എന്തെല്ലാം സംഭവിക്കുമോ എന്തോ?   

പ്രതിഫലമല്ലാതെ, പദവിമാത്രം കൊതിക്കുന്ന വിദ്വൽ സദസ്സിന്റെ ആധിക്യം നമ്മുടെ മുഖ്യമന്ത്രിയെ ഗിന്നസ് ബുക്കിൽ കേറ്റുമെന്ന് ഉറപ്പാണ്. ചന്ദ്രഗുപ്ത വിക്രമാദിത്യനും അക്ബർ ചക്രവർത്തിയും കല്ലറപൊക്കി വന്നാലേ ഇക്കാര്യത്തിൽ പിണറായിക്ക് ചെറിയൊരു മത്സരമെങ്കിലും ഉണ്ടാവൂ. കെ. കരുണാകരന്റെ ഇടംകൈയായിരുന്ന തോമസ് ചാണ്ടി ഈ മന്ത്രിസഭയിൽ മന്ത്രിയായതും വലംകൈ ആയിരുന്ന ശ്രീവാസ്തവ ഉപദേശിയായതും ഒരേകാലത്തായത് യാദൃച്ഛികം മാത്രം. മരണാനന്തരമാണെങ്കിലും കരുണാകരൻ ഇടതുപക്ഷക്കാർക്കും ലീഡറായതിൽ മുരളീധരനും പത്മജയുമെങ്കിലും ആഹ്ലാദിക്കുമെന്ന് കരുതട്ടെ. 

***
മൂന്നാറിലെ കൈയേറ്റം തടയാൻ ഇനിയും നിയമമുണ്ടാക്കി കടലാസ് പാഴാക്കേണ്ടതില്ല. അവിടെ വിപ്ലവകരമായ പുത്തൻ ടൂറിസംമാതൃക നടപ്പാക്കുകയാണ്‌ വേണ്ടത്-കൈയേറ്റ ടൂറിസം. കൈയേറ്റക്കാരുടെ സ്വന്തംനാടെന്ന് പരസ്യപ്പെടുത്താം.  രാഷ്ട്രീയക്കാർ കൈയേറിയാൽ അത് കുടിയേറ്റമാണെന്ന് മനസ്സിലാവാത്ത സബ്കളക്ടർ ശ്രീറാം വെങ്കിട്ടരാമനെ ആദ്യം നാടുകടത്തണം. കൈയേറ്റ ടൂറിസത്തിന് പാക്കേജുകൾ പ്രഖ്യാപിക്കണം. ഉദാഹരണത്തിന് രണ്ടും രാത്രിയും മൂന്നുപകലും തിരഞ്ഞെടുത്താൽ രണ്ടുസെന്റ് കൈയേറാം. രാത്രി നാലായാൽ സെന്റ് അഞ്ചാക്കാം. വാഷിങ്ടൺ ഡി.സി.യിൽ മന്ത്രി കടകംപള്ളി സുരേന്ദ്രൻ റോഡ് ഷോ നടത്തിയാൽ ട്രംപുവരെ മൂന്നാർ കൈയേറാൻ വന്നോളും. കൈയേറാൻ താത്പര്യമില്ലാത്തവർക്ക് കൈയേറ്റം കണ്ടുമടങ്ങാം. ജനപ്രതിനിധികളും  പ്രതിപക്ഷക്കാരും കൈയേറിയ സ്ഥലങ്ങളെ  ബന്ധിപ്പിച്ച് കണ്ടക്ടഡ് ടൂറും വേണം.

സഞ്ചാരികൾക്കായി ഒന്നാന്തരം രണ്ട് തദ്ദേശീയ ഗൈഡുകൾ ഇപ്പോൾത്തന്നെ തയ്യാറാണ്. ഒരാൾ മന്ത്രി, മറ്റൊരാൾ എം.എൽ.എ.യും. മണിയാശാനും എസ്‌. രാജേന്ദ്രനും. കുട്ടികൾ ഉൾപ്പെടുന്ന സംഘങ്ങളെ ആശാന്റെ അടുത്തേക്ക്‌ വിടരുത്. ആശാന്റെ  ജീവശാസ്ത്രവിജ്ഞാനം കേട്ട് പിള്ളേർ വഴിതെറ്റിപ്പോവും. ഇവിടെയൊരു കൈയേറ്റ മ്യൂസിയവും സ്ഥാപിക്കണം. ജാലിയൻവാലാബാഗ് മ്യൂസിയത്തിൽ ജനറൽ ഡയറിന്റെ പടമുള്ളതുപോലെ ഇവിടെ വി.എസ്. അച്യുതാനന്ദന്റെ പടം വെയ്ക്കണം. അടിയിൽ ഇങ്ങനെ എഴുതണം ‘ഇത് നിഷ്കളങ്കരും നിരായുധരുമായ കൈയേറ്റക്കാരെ ജെ.സി.ബി. കൊണ്ട് നേരിടാമെന്ന് വ്യാമോഹിച്ച പമ്പരവിഡ്ഢി! ചരിത്രം ഇയാൾക്ക് മാപ്പുകൊടുക്കില്ല’. 
nakhasikantham@gmail.com