പിറന്നാള്‍ സമ്മാനം എത്തിയില്ല; ട്രെയിലറുമായി കമലഹാസന്‍

posted on:

08 Nov 2012

ചെന്നൈ: കമലഹാസന്റെ 'വിശ്വരൂപം' താമസിയാതെ പ്രേക്ഷകര്‍ക്ക് മുന്നിലെത്തും. 58-ാം പിറന്നാള്‍ദിനത്തില്‍ പുതിയ സിനിമയുടെ ട്രെയിലറുമായി മഹാനടന്‍ മാധ്യമങ്ങളുടെ മുന്നിലെത്തി. ഒരേദിവസം രാജ്യത്ത് മുഴുവനുമായി 3000 തിയേറ്ററില്‍ 'വിശ്വരൂപം' റിലീസ്‌ചെയ്യുമെന്ന് കമലഹാസന്‍ പറഞ്ഞു. കമലിന്റെ ജന്മദിനമായ നവംബര്‍ ഏഴിന് ചിത്രം തിയേറ്ററുകളില്‍ എത്തുമെന്ന് പ്രതീക്ഷയുണ്ടായിരുന്നു. പിന്നീട് ഇതേ ദിവസം ഓഡിയോ റിലീസ് ഉണ്ടായേക്കും എന്ന പ്രഖ്യാപനമുണ്ടായി. ഇതുരണ്ടും നീണ്ടുപോയപ്പോഴാണ് കമലഹാസന്‍ ട്രെയിലറുമായി ജന്മദിനത്തില്‍ മാധ്യമങ്ങള്‍ക്ക് മുന്നിലെത്തിയത്.

തമിഴ്, തെലുങ്ക്, ഹിന്ദി ഭാഷകളില്‍ ഒരേസമയം ചിത്രം റിലീസ്‌ചെയ്യും. ഇതിന്റെ ഒരുക്കങ്ങള്‍ പുരോഗമിക്കുകയാണ്. നൂറുകോടിയിലേറെ ചെലവഴിച്ച് നിര്‍മിച്ച സെ്‌പെ ത്രില്ലറാണിത്. സാങ്കേതികത്തികവില്‍ ഹോളിവുഡിനെ വെല്ലുന്ന പുതുമകള്‍ അവകാശപ്പെടുന്ന 'വിശ്വരൂപ'ത്തിന്റെ സംവിധായകനും നായകനും കമലഹാസനാണ്.

ഹോളിവുഡില്‍തന്നെ ഒരുതവണമാത്രം പ്രയോജനപ്പെടുത്തിയിട്ടുള്ള 11.1 ചാനല്‍ ഓറ ത്രീഡി ശബ്ദവിന്യാസമാണ് ചിത്രത്തില്‍ ഉപയോഗിച്ചിട്ടുള്ളത്. അമേരിക്കയിലും പശ്ചിമേഷ്യന്‍ രാജ്യങ്ങളിലുമായാണ് ഈ ത്രിമാനചിത്രത്തിന്റെ മുഖ്യഭാഗങ്ങള്‍ ചിത്രീകരിച്ചത്. അഫ്ഗാന്‍യുദ്ധ പശ്ചാത്തലത്തിലാണ് കഥ. പൂജകുമാര്‍, ആന്‍ഡ്രിയ ജെര്‍മിയ, രാഹുല്‍ ബോസ്, ജയ്ദീപ് അഹ്‌ലാവത് തുടങ്ങിയവരാണ് മറ്റ് താരങ്ങള്‍.

സംഗീതലോകത്തെ ത്രിമൂര്‍ത്തികളായ ശങ്കര്‍-ഇഹ്‌സാന്‍-ലോയ് ടീമാണ് പശ്ചാത്തലം ഒരുക്കിയത്. ഛായാഗ്രഹണം സാനുവര്‍ഗീസ്. സംഘട്ടന യുദ്ധരംഗങ്ങളില്‍ അമേരിക്കയിലും തായ്‌ലന്‍ഡിലുമുള്ള മാര്‍ഷല്‍ ആര്‍ട്‌സ് വിദഗ്ധരുടെ സഹകരണത്തോടെയാണ് പൂര്‍ണതവരുത്തിയതെന്നും കമല്‍ പറഞ്ഞു.

നടന്‍ എന്നനിലയ്ക്കും ഏറെ ശ്രമം വേണ്ടിവന്ന ചിത്രമാണ്. കഥക്‌നൃത്തച്ചുവടുകള്‍ മറന്നുതുടങ്ങിയത് വീണ്ടെടുക്കാന്‍ ഒരുമാസത്തെ പ്രയത്‌നം വേണ്ടിവന്നതായി അദ്ദേഹം പറഞ്ഞു. ഡിസംബറില്‍ റിലീസ് ഉണ്ടാവുമെന്ന വാര്‍ത്ത ശ്രദ്ധയില്‍പ്പെടുത്തിയപ്പോള്‍ ഉടന്‍ ആവാം എന്നു മാത്രമാണ് പ്രതികരിച്ചത്. വിതരണകാര്യങ്ങളില്‍ തീരുമാനമായിട്ടില്ല എന്നാണ് അറിയുന്നത്. പ്രസാദ് വി പോട്‌ലൂരി, ചന്ദ്രഹാസന്‍, കമലഹാസന്‍ ടീമാണ് നിര്‍മാണം.





 



Other News In This Section