ആഗസ്ത് ക്ലബ്
posted on:07 Aug 2012
വിടപറയാന് ഒരുങ്ങുന്ന വേനല്, മുന്നില് പരിഭവത്തോടെ ആര്ത്തലയ്ക്കുന്ന കടല്. തീരത്തിനടുത്തുള്ള വീട്ടില് സാവിത്രി ആദ്യമായി ഒറ്റയ്ക്കാവുന്നു. അനന്തമായ കടലിലേക്ക്, രണ്ട് കുട്ടികളുടെ അമ്മയായ സാവിത്രി നോക്കിനിന്നു, ഒരു ഉത്തരം കിട്ടാന്. യശശ്ശരീരനായ പി. പത്മരാജന്റെ മകന് പി. അനന്തപത്മനാഭന് ആദ്യമായി എഴുതുന്ന തിരക്കഥയായ 'ഓഗസ്റ്റ് ക്ലബ്ബ്' എന്ന ചിത്രത്തിലെ നായികാ കഥാപാത്രമാണ് സാവിത്രി. നടനും മാധ്യമ പ്രവര്ത്തകനുമായ കെ.ബി. വേണു ആദ്യമായി സംവിധാനം ചെയ്യുന്ന ഓഗസ്റ്റ് ക്ലബ്ബിന്റെ ചിത്രീകരണം കലവൂരില് ആരംഭിച്ചു. പ്രശസ്ത സംവിധായകന് കെ.ജി. ജോര്ജ് ഓഗസ്റ്റ് ക്ലബ്ബിന്റെ സ്വിച്ചോണ് കര്മം നിര്വഹിച്ചപ്പോള്, ആദ്യ ക്ലാപ്പടിച്ചത് സംവിധായകന് ബ്ലെസിയായിരുന്നു.ദര്ശിനി കോണ്സെപ്റ്റസിന്റെ ബാനറില് വി.എസ്. അതീഷ് നിര്മിക്കുന്ന ഈ ചിത്രത്തില് മുരളി ഗോപി, തിലകന്, കൃഷ്ണ, മാള അരവിന്ദന്, ടി.ജി. രവി, ബാലചന്ദ്രന് ചുള്ളിക്കാട്, ശശി കലിംഗ, പ്രവീണ് അനിടിന്, മോനിഷ സാഗര്, സുനില് സുഖദ, നന്ദു പൊതുവാള്, കെ.പി. എ.സി. ലളിത, സുകുമാരി, ടൊവിനൊ തോമസ്, ഡോക്ടര് ബിനി തുടങ്ങിയവര് പ്രധാന കഥാപാത്രങ്ങളെ അവതരിപ്പിക്കുമ്പോള് നായിക സാവിത്രിയായി റിമ കല്ലിങ്കല് എത്തുന്നു.
ഒരുപാട് സ്വപ്നങ്ങളുള്ള സുന്ദരിയായ സാവിത്രി രണ്ട് കുട്ടികളുടെ അമ്മയാണ്. ജീവിതസാഹചര്യങ്ങളുടെ കുത്തൊഴുക്കില് അവള് ഒറ്റപ്പെട്ടപ്പോള് ഭാവിയെ തരണം ചെയ്യാന് ഒരു തീരുമാനമെടുക്കേണ്ടി വന്നു. സാവിത്രിയുടെ ഏകാന്തമായ ലോകത്തേക്ക് പലരും കടന്നുവന്നു.
പക്ഷേ, സാവിത്രിക്ക് ഇപ്പോള് ഒരു ലക്ഷ്യമുണ്ട്. ചെസ്സ് കളിയില് പുരുഷനെ തോല്പിക്കണം. അവിടെ പുരുഷന്റെ കുത്തക തകര്ക്കണം. അതിനുള്ള ബുദ്ധിയും ജീവിത സാഹചര്യവുമുണ്ടായിരുന്ന സാവിത്രി, പുരുഷന്മാര് കൈയടക്കിവെച്ചിരുന്ന ചെസ്സ് കളിയുടെ ലോകത്തേക്ക് കടന്നുചെല്ലുന്നു. അതിന്റെ കേന്ദ്രമായ ഓഗസ്റ്റ് ക്ലബ്ബില് സാവിത്രി എത്തുന്നതോടെ പുതിയ ചരിത്രത്തിന് തുടക്കം കുറിക്കുകയായിരുന്നു.
ലക്ഷ്യം നേടാനുള്ള ശ്രമത്തില് സാവിത്രിയുടെ മനസ്സിലേക്ക് മറ്റൊരു പുരുഷന് കടന്നുകൂടുന്നു. തുടര്ന്നുള്ള സാവിത്രിയുടെ വികാരവിചാരങ്ങള് വളരെ ഹൃദയസ്പര്ശിയായി ദൃശ്യവത്കരിക്കുകയാണ് ഓഗസ്റ്റ് ക്ലബ്ബിലൂടെ സംവിധായകന് കെ.ബി. വേണു.
നായികാ പ്രാധാന്യമുള്ള ഈ ചിത്രം വളരെ ഹ്യൂമര് ശൈലിയിലാണ് വേണു അവതരിപ്പിക്കുന്നത്. പി. അനന്തപത്മനാഭന് എഴുതിയ ഒരു കഥയുടെ പശ്ചാത്തലത്തില് തന്നെയാണ് ഈ സിനിമയുടെ തിരക്കഥ വികസിപ്പിച്ചെടുത്തത്.
സാവിത്രിയുടെ ഭര്ത്താവിന്റെ വേഷത്തില് മുരളി ഗോപി അഭിനയിക്കുന്നു. സാവിത്രിയുടെ ജീവിതത്തിലേക്ക് പുതുതായി കടന്നുവരുന്ന ചെറുപ്പക്കാരനായി യുവനടന് പ്രവീണ് അഭിനയിക്കുന്നു.
പ്രതാപ് നായരാണ് ക്യാമറാമാന്. റഫീഖ് അഹമ്മദിന്റെ വരികള്ക്ക് ഈണം പകരുന്നത് ബെനറ്റ് വീതരാഗ് ആണ്. കല-അജയന് മാങ്ങാട്, മേക്കപ്പ്- ഹസ്സന് വണ്ടൂര്, വസ്ത്രാലങ്കാരം-കുമാര് എടപ്പാള്, സ്റ്റില്സ്-നജീബ് എം. ബാവ, പരസ്യകല-ഗായത്രി, എഡിറ്റര്-മനോജ് കണ്ണോത്ത്, ചീഫ് അസോസിയേറ്റ് ഡയറക്ടര്-മുരളി ഗോവിന്ദ്, ലിനു ആന്റണി, അസോസിയേറ്റ് ഡയറക്ടര്-സുരേഷ് ഒളരി, രാജേ കന്നഡത്തില്, സംവിധാന സഹായികള്-സനൂപ് കരുവന്തൂര്, സൂരജ്, പ്രൊഡക്ഷന് എക്സിക്യൂട്ടീവ്-സുധര്മന് വള്ളിക്കുന്ന്, ഷിബു പന്തലക്കോട്, പ്രൊഡക്ഷന് കണ്ട്രോളര്-ശശി പൊതുവാള്.
എ.എസ്. ദിനേശ്
mathrubhumi.com
Quick links
© Copyright 2013 Mathrubhumi. All rights reserved.