ഒഴിമുറി
posted on:13 Jul 2012
നടന് മധുപാല് സംവിധാനംചെയ്യുന്ന പുതിയ ചിത്രമായ 'ഒഴിമുറി'യുടെ ചിത്രീകരണം കന്യാകുമാരി ജില്ലയിലെ തക്കല, തിരുവട്ടാര് ഭാഗങ്ങളിലായി പൂര്ത്തിയായി. കേരളം വിഭജിക്കപ്പെടുന്നതിനു മുന്പ് ഇന്നത്തെ കന്യാകുമാരി ജില്ല കേരളത്തിലായിരുന്നു. ഇന്നും കേരളീയ സംസ്കാരം നിലനില്ക്കുന്ന അനേകം മലയാളി കുടുംബങ്ങള് ഇവിടെയുണ്ട്. പ്രത്യേകിച്ചും നായര് കുടുംബങ്ങള്. ഈ നായര്കുടുംബങ്ങളില് ഒരുകാലത്ത് നിലനിന്നുപോന്നിരുന്ന ചില വ്യവസ്ഥിതികളിലൂടെയാണ് ഈ ചിത്രത്തിന്റെ കഥാവികസനം.
ഈ നാട്ടുകാരനും തമിഴ് സാഹിത്യകാരനും 'അങ്ങാടിത്തെരു', 'നാന് കടവുള്' എന്നീ ചിത്രങ്ങളുടെ തിരക്കഥാകൃത്തും ഇപ്പോള് മണിരത്നത്തിന്റെ 'കടല്' എന്ന ചിത്രത്തിന്റെ തിരക്കഥാകൃത്തുമായ ജയമോഹന്റെ അനുഭവക്കുറിപ്പിലൂടെയാണ് ഈ ചിത്രത്തിന്റെ തിരക്കഥ ഉണ്ടായിരിക്കുന്നത്.
അക്കാലത്ത് ഇവിടങ്ങളിലെ നായര്കുടുംബങ്ങളില് സ്ത്രീമേധാവിത്വമാണ് നിലനിന്നുപോന്നിരുന്നത്. പുരുഷന്മാര്ക്ക് സ്ഥാനം കുറവ്. അങ്ങനെയൊരു കുടുംബത്തില് പിറന്നതാണ് താണുപിള്ള. ചെറുപ്പംമുതല്തന്നെ താണുപിള്ള കണ്ടുവളര്ന്നത് ഈ സ്ത്രീമേധാവിത്വമാണ്. അച്ഛന് അമ്മയുടെ മുന്നില് ഭയഭക്തിബഹുമാനത്തോടെ നില്ക്കുന്നത് കാണുമ്പോള് അച്ഛനോട് അനുകമ്പയും അമ്മയോട് ദേഷ്യവുമാണ് താണുപിള്ളയ്ക്ക് തോന്നിയത്. ഈ ദേഷ്യം ഒരുതരം പ്രതികാരത്തോടെയാണ് താണുപിള്ള വീക്ഷിച്ചത്. അങ്ങനെ വളര്ന്ന താണുപിള്ള വിവാഹംകഴിച്ചപ്പോഴും ഭാര്യയോട് ഇങ്ങനെയൊരു അമര്ഷം പ്രകടിപ്പിച്ചുപോന്നു. ഭാര്യ മീനാക്ഷിയോട് ഉള്ളില് സ്നേഹവും പുറമെ പരുക്കന് സ്വഭാവവും പ്രകടിപ്പിക്കുന്ന രീതി. ഇതു കണ്ട് മറ്റൊരാള് ആ കുടുംബത്തില് വളരുന്നുണ്ടായിരുന്നു. താണുപിള്ളയുടെ മകന് ശരത്ചന്ദ്രന്.
കുടുംബത്തിലെ സ്വത്തിന്റെപേരില് വ്യവഹാരവും കോടതിയും നിയമങ്ങളുമൊക്കെയായി. അങ്ങനെ വ്യവഹാരങ്ങളുമായി ബന്ധപ്പെട്ടാണ് അഡ്വ. ബാലാമണി എത്തുന്നത്. നിരന്തരമായി ബാലയുടെ ഈ സാന്നിധ്യം ശരത്ചന്ദ്രനുമായി പുതിയ ബന്ധത്തിനും വഴിതെളിയിക്കുന്നതായിരുന്നു. ഇതെല്ലാം ഏറെ രസകരമായ രംഗങ്ങളിലൂടെ അവതരിപ്പിക്കുകയാണ് മധുപാല് 'ഒഴിമുറി' എന്ന ചിത്രത്തിലൂടെ.
ഇവിടെ ലാല്, താണുപിള്ളയെ അവതരിപ്പിക്കുന്നു.ശരത്ചന്ദ്രന്, ബാല എന്നിവരെ അവതരിപ്പിക്കുന്നത് ആസിഫ് അലിയും ഭാവനയുമാണ്. മല്ലികയാണ് മീനാക്ഷിയെ അവതരിപ്പിക്കുന്നത്. ജഗദീഷ്, കൊച്ചുപ്രേമന്, ഇന്ദ്രന്സ്, നന്ദുലാല്, എം.ആര്. ഗോപകുമാര്, ബാലാജി, കൃഷ്ണന് എന്നിവരും നിരവധി അമെച്വര് താരങ്ങളും ഈ ചിത്രത്തില് അണിനിരക്കുന്നു.
വയലാര് ശരത്ചന്ദ്രവര്മയുടെ ഗാനങ്ങള്ക്ക് എം. ജയചന്ദ്രന് ഈണം പകരുന്നു. അഴകപ്പന് ഛായാഗ്രഹണവും വി. സാജന് എഡിറ്റിങ്ങും നിര്വഹിക്കുന്നു. കലാസംവിധാനം-സിറിള് കുരുവിള. മേക്കപ്പ്-രതീഷ് അമ്പാടി. വസ്ത്രാലങ്കാരം-എസ്.ബി. സതീശന്. അസോസിയേറ്റ് ഡയറക്ടര്- കെ.ആര്. ഉണ്ണി. പ്രൊഡക്ഷന് കണ്ട്രോളര്-എ.ഡി. ശശികുമാര്. പ്രൊഡക്ഷന് ഡിസൈനര്-ജയ്സണ് എളങ്ങുളം. പ്രൊഡക്ഷന് എക്സിക്യൂട്ടീവ് സുദര്ശനന്. പ്രൊഡക്ഷന് മാനേജര്-ജയശീലന് കുടവട്ടൂര്. പി.എന്.വി. അസോസിയേറ്റ്സിന്റെ ബാനറില് പി.എന്. വേണുഗോപാല് നിര്മിക്കുന്നു.
വാഴൂര് ജോസ്
mathrubhumi.com
Quick links
© Copyright 2013 Mathrubhumi. All rights reserved.