നര്മത്തില് പൊതിഞ്ഞ് ഷാഫിയുടെ '101 വെഡ്ഡിങ്'
അശ്വതി കൃഷ്ണ
posted on:
28 Sep 2012
സമൂഹവിവാഹച്ചടങ്ങിലെ താമശകള് കോര്ത്തിണക്കി ഷാഫി സംവിധാനം ചെയ്യുന്ന 'ഹണ്ഡ്രഡ് ആന്ഡ് വണ് വെഡ്ഡിങ്' വരുന്നു. കസ്തൂര്ബ സേവാകേന്ദ്രം നടത്തുന്ന 101 വിവാഹങ്ങളുടെ പശ്ചാത്തലത്തിലാണ് കഥ പുരോഗമിക്കുന്നത്. സമൂഹവിവാഹത്തില് പേര് രജിസ്റ്റര് ചെയ്യാന് എത്തുന്നവരാണ് കൃഷ്ണന്കുട്ടിയും ജ്യോതിഷ്കുമാറും ആന്റപ്പനും. കൂട്ടത്തില് തരികിടയായ കൃഷ്ണന്കുട്ടി സമൂഹവിവാഹത്തില് സ്വന്തം പേരും മേല്വിലാസവും തെറ്റിച്ചാണ് നല്കുന്നത്. നൃത്താധ്യാപകനാണ് ജ്യോതിഷ്. നര്മരസപ്രാധാന്യമുള്ള കഥാപാത്രം. കൂട്ടത്തിലെ റൗഡിയാണ് ആന്റപ്പന്. സമൂഹവിവാഹത്തില് പേര് രജിസ്റ്റര് ചെയ്തവര്ക്ക് വിവാഹത്തിന് രണ്ടാഴ്ച മുമ്പ് ഒരു പ്രത്യേക ക്യാമ്പില് പങ്കെടുക്കുന്നതിനായി ക്ഷണം ലഭിക്കുന്നു. തുടര്ന്നു നടക്കുന്ന രസകരമായ മുഹൂര്ത്തങ്ങളിലൂടെ ചിരിയുടെ പുതിയ രസക്കൂട്ടുകളും കാഴ്ചയും പുതിയ നിറങ്ങളും ഒരുക്കിയാണ് സിനിമ പുറത്തിറങ്ങുക.
യുവതാരങ്ങളായ ജയസൂര്യ ജ്യോതിഷിനെയും കുഞ്ചാക്കോ ബോബന് കൃഷ്ണന്കുട്ടിയെയും ബിജു മേനോന് ആന്റപ്പനെയും ജീവസ്സുറ്റതാക്കുന്നു. പുതിയ രൂപമാറ്റങ്ങളോടെയാണ് കഥാപാത്രങ്ങളായി താരങ്ങള് എത്തുന്നത്. ഓര്ഡിനറിക്കുശേഷം കുഞ്ചാക്കോ ബോബനും ബിജു മേനോനും ഒന്നിക്കുന്ന ചിത്രമാണിത്. ഷാഫിയുടെ തന്നെ 'ലോലിപ്പോപ്പി'ലാണ് ജയസൂര്യ-ചാക്കോച്ചന് ടീം ഒടുവില് വെള്ളിത്തിരയിലെത്തിയത്. ഭാമയും സംവൃതയുമാണ് നായികമാര്. കഥ, തിരക്കഥ, സംഭാഷണം ഒരുക്കിയിരിക്കുന്നത് കലവൂര് രവികുമാറാണ്. ക്യാമറ: അഴകപ്പന്, റാഫി, ഷാഫി, ഷലീല്, ബാവ ഹസൈനാര് എന്നിവര് ചേര്ന്നാണ് നിര്മാണം. ഫിലിം ഫോക്സിന്റെ ബാനറില് ഇറങ്ങുന്ന ചിത്രത്തില് സലിംകുമാര്, സുരാജ് വെഞ്ഞാറമൂട്, വിജയരാഘവന്, വിജീഷ്, ഊര്മിളഉണ്ണി തുടങ്ങിയവരും അണിനിരക്കുന്നുണ്ട്. റഫീഖ് അഹമ്മദിന്റെ ഗാനങ്ങള്ക്ക് ദീപക് ദേവാണ് സംഗീതം നല്കിയിരിക്കുന്നത്. മുരളി ഫിലിംസാണ് വിതരണം.
mathrubhumi.com
Quick links
© Copyright 2013 Mathrubhumi. All rights reserved.