കാത്തിരിക്കുന്നു; നല്ല വേഷങ്ങള്‍ക്കായി

പി.കെ. രാധ

 

posted on:

27 May 2012


സൗമ്യനും ക്രൂരനുമായ ഈ വില്ലന്‍ മലയാള സിനിമയ്ക്ക് പരിചിതമായ വില്ലന്‍ വേഷങ്ങളില്‍നിന്നെല്ലാം വ്യത്യസ്തമാണ്. രോഗത്തിന്റെ അവശതകളും അദമ്യമായ ലൈംഗികാഭിനിവേശത്തിന്റെ കരുത്തും സമന്വയിക്കുന്നതാണ് '22 ഫീമെയില്‍, കോട്ടയ'ത്തിലെ ഹെഗ്‌ഡെ എന്ന കഥാപാത്രം. അസാധാരണനായ ഈ വില്ലന്‍കഥാപാത്രത്തെ അവിസ്മരണീയമാക്കിക്കൊണ്ട് മലയാള സിനിമയില്‍ ശക്തമായ ഒരു തിരിച്ചുവരവ് നടത്തിയിരിക്കുകയാണ് പ്രതാപ് പോത്തന്‍.

മലയാളത്തില്‍ തകര, ആരവം, ചാമരം തുടങ്ങി അനേകം സിനിമകളിലൂടെഅഭിനയരംഗത്തും ഋതുഭേദം, ഡെയ്‌സി, ഒരു യാത്രാമൊഴി എന്നീ ചിത്രങ്ങളിലൂടെ സംവിധാനരംഗത്തും ശ്രദ്ധേയനായ പ്രതാപ് പോത്തന്‍ പിന്നീട് തമിഴ് സിനിമയിലും പരസ്യചിത്ര സംവിധാനത്തിലും വ്യാപൃതനായി. അതിനിടയില്‍ മലയാള സിനിമയുടെ എല്ലാ മേഖലകളിലും ഒരു പുതിയ തലമുറയുടെ സാന്നിധ്യം പ്രകടമായി. മലയാള സിനിമയിലെ ഏറ്റവും പുതിയ തലമുറയോടൊപ്പം ശ്രദ്ധേയമായ ഒരു ചിത്രത്തില്‍ പങ്കാളിയാകാന്‍ കഴിഞ്ഞതിന്റെ ആഹ്ലാദം പ്രതാപ് പോത്തന്റെ വാക്കുകളില്‍ പ്രകടമാണ്. അദ്ദേഹവുമായി നടത്തിയ അഭിമുഖത്തില്‍നിന്ന്...

'22 ഫീമെയില്‍ കോട്ടയ'ത്തിലൂടെയുള്ള ഈ തിരിച്ചുവരവ് ഗംഭീരമായിരിക്കുന്നു. താങ്കള്‍ക്കെന്തുതോന്നുന്നു?

വളരെ സന്തോഷമുണ്ട്. കുറേ നാളുകളായി മലയാളത്തില്‍ അഭിനയിച്ചിട്ട്. ആരും എന്നെ വിളിക്കാറില്ല. അതെന്തുകൊണ്ടാണെന്ന് എനിക്കറിയില്ല. പിന്നെ എനിക്ക് അത്ര ഇഷ്ടപ്പെട്ടകഥാപാത്രം ചെയ്യാനേ താത്പര്യമുള്ളൂ എന്നതും ഈ ഇടവേള നീണ്ടുപോയതിന് ഒരു കാരണമാകാം. ഞാന്‍ തന്നെ ഈ വേഷം ചെയ്യണമെന്ന് സംവിധായകന്‍ ആഷിക് അബുവിന് നിര്‍ബന്ധമായിരുന്നു. എനിക്കും ആ കഥാപാത്രത്തെ ഇഷ്ടമായി.ഇപ്പോള്‍ പ്രേക്ഷകരും എന്റെ അഭിനയം ഇഷ്ടപ്പെട്ടു എന്നറിയുന്നതില്‍ ആഹ്ലാദമുണ്ട്.

ഹെഗ്‌ഡേ എന്ന ആ കഥാപാത്രത്തെപ്പറ്റി ?

വളരെ വ്യത്യസ്തമായ കഥാപാത്രം. സങ്കീര്‍ണമായ സ്വഭാവമാണ് അയാളുടേത്. അഭിനേതാവിന് ശരിക്കും വെല്ലുവിളിയാകുന്ന കഥാപാത്രം. ഒരു ഭാഗത്ത് അയാള്‍ അവശനായ രോഗിയാണ്. മറുഭാഗത്ത് ഒരു ക്രൂരനായ സെക്‌സ് മാനിയാക്. തകരയിലും ആരവത്തിലുമൊക്കെ ഞാന്‍ അവതരിപ്പിച്ച കഥാപാത്രങ്ങളുടെ ഒരു നേരിയ ഛായ ഹെഗ്‌ഡേയില്‍ കണ്ടെന്നു വരാം. എന്നാല്‍ ആ കഥാപാത്രത്തിന്റെ വ്യക്തിത്വം വ്യത്യസ്തമാണ്.

സംവിധായകന്‍ ആഷിക് അബുവിനെപ്പറ്റി?

മലയാളസിനിമയില്‍ സംഭവിച്ചുകൊണ്ടിരിക്കുന്ന മാറ്റത്തിന്റെ പ്രതിനിധിയാണ് ആഷിക്. പുതുമയുള്ള കഥ, പുതിയ ആവിഷ്‌കരണ ശൈലി എന്നിവയാണ് ആഷിക്കിന്റെ ചിത്രങ്ങളെ വേറിട്ട് നിര്‍ത്തുന്നത്. ആഷിക്കിന്റെ അടുത്ത ചിത്രവും ഈ സവിശേഷതകള്‍ ഉള്ളതാണെന്നാണ് ഞാന്‍ മനസ്സിലാക്കുന്നത്.

ഫഹദ് ഫാസിലും റീമയും?

22 ഫീമെയില്‍ കോട്ടയത്തില്‍ ഫഹദിന്റെ അഭിനയം ശ്രദ്ധേയമായിരുന്നു. വളരെ ഹാര്‍ഡ് വര്‍ക്കിങ് ആണ് ഫഹദ്. പുതിയ നായകന്മാരില്‍ പലരും 10 വില്ലന്മാരെ അടിച്ചുവീഴ്ത്തി ഹീറോയിസം കാണിക്കുന്ന കഥാപാത്രങ്ങളെ ആഗ്രഹിക്കുമ്പോള്‍ ഈ ചെറുപ്പക്കാരന്‍ അഭിനയസാധ്യതയുള്ള, വ്യത്യസ്തമായ വേഷങ്ങള്‍ തേടുന്നു. ഇമേജിനെക്കുറിച്ച് തെല്ലും വേവലാതിപ്പെടാതെ വ്യത്യസ്തമായ കഥാപാത്രങ്ങളെ തെരഞ്ഞെടുക്കാന്‍ ഫഹദ് കാണിക്കുന്ന ധൈര്യം ശ്രദ്ധേയമാണ്. ഒരു നല്ല നടന് ആവശ്യവും അതാണ്.
ഈ ചിത്രത്തിലെ റീമ കല്ലിങ്കലിന്റെ വേഷം മലയാളത്തില്‍ ഇന്ന് അപൂര്‍വമായി മാത്രം സംഭവിക്കുന്ന ഒന്നാണ്. വളരെ ശക്തവും വ്യത്യസ്തവുമാണത്. റീമ ആ റോള്‍ മികച്ചതാക്കി.

മലയാളത്തില്‍ അടുത്ത ചിത്രം?

അറിയില്ല. ഇതുവരെ ആരും വിളിച്ചിട്ടില്ല. നല്ല കഥാപാത്രങ്ങള്‍ വന്നാല്‍ ചെയ്യും. നല്ല വേഷങ്ങള്‍ക്കുവേണ്ടി എത്ര കാത്തിരിക്കാനും ഞാന്‍ തയ്യാര്‍.

സംവിധാനരംഗത്തേക്ക് വീണ്ടും?

ഞാന്‍ ഇതുവരെ മൂന്ന് മലയാളചിത്രങ്ങള്‍ സംവിധാനം ചെയ്തു. പിന്നെ തമിഴ് ചിത്രങ്ങളാണ് ചെയ്തത്. ഒരു തെലുഗു ചിത്രവും. ഇനി ഒരു മലയാള ചിത്രം ചെയ്യണമെന്നുണ്ട്. എന്നെ മോഹിപ്പിക്കുന്ന ഒരു സ്‌ക്രിപ്റ്റ് ലഭിച്ചാലേ എനിക്ക് ചെയ്യാന്‍ പറ്റൂ. ഇടക്കാലത്ത് ഞാന്‍ ധാരാളം പരസ്യചിത്രങ്ങള്‍ ചെയ്തു.

തമിഴില്‍ ?

തമിഴില്‍ കാര്‍ത്തി നായകനായ പുതിയ ചിത്രത്തില്‍ ഒരു നല്ല വേഷം ചെയ്യുന്നുണ്ട്. അതിരപ്പള്ളിയില്‍ അതിന്റെ ചിത്രീകരണത്തില്‍ പങ്കെടുക്കാന്‍ പോകാനിരിക്കുകയാണ്.

ഇന്നത്തെ മലയാള സിനിമയെപ്പറ്റി? പുതിയ സിനിമകള്‍ പലതും വിദേശ ചിത്രങ്ങളുടെ അനുകരണമാണെന്ന് വിമര്‍ശനമുണ്ട്?

ഹോളിവുഡ് ചിത്രങ്ങളെപ്പോലെ ബിഗ് ബജറ്റ് ചിത്രങ്ങള്‍ നമുക്ക് സാധ്യമല്ല. എന്നാല്‍ പരിമിതമായ ബജറ്റിലും നല്ല സിനിമയെടുക്കാം. മലയാളത്തില്‍ പണ്ടുമുതലേ പാരലല്‍ സിനിമയുണ്ട്. ഭരതനും പത്മരാജനുമൊക്കെ ഒരുകാലത്ത് അത്തരം നല്ല സിനിമകള്‍ എടുത്തവരാണ്. വളരെ റിയലിസ്റ്റിക് ആയ ചിത്രങ്ങള്‍. അത്തരം ചിത്രങ്ങളും ആഗോളതലത്തില്‍ ശ്രദ്ധിക്കപ്പെടുമെന്നതിന് ഉദാഹരണമാണ് ഇറാനിയന്‍ സിനിമകള്‍. പിന്നെ അനുകരണത്തെപ്പറ്റി...

നല്ല വിദേശസിനിമകള്‍ കാണുമ്പോള്‍ അവയുടെ സ്വാധീനം ഉണ്ടാകുന്നത് സ്വാഭാവികം. അത്തരം സ്വാധീനങ്ങളെ അനുകരണമായി കാണരുത്. ഇത് സിനിമയ്ക്ക് മാത്രമല്ല ബാധകം. ചങ്ങമ്പുഴയുടെ'രമണനി'ലെ ആട്ടിന്‍പറ്റങ്ങളും ഇടയന്മാരും ഒക്കെ കേരളീയമാണോ? പാശ്ചാത്യമായ ഒരു കാവ്യ സങ്കേതത്തെ പിന്തുടരുകയായിരുന്നു അദ്ദേഹം. അതുകൊണ്ട് ആ കൃതിക്ക് മൗലികതയില്ലെന്ന് പറയാമോ? അത് വെറും അനുകരണമാണെന്ന് ആക്ഷേപിക്കാമോ?