AR Rahmanഷാർജ: മാതൃഭൂമി എ.ആർ. റഹ്മാൻ ലൈവിൽ യു. എ.ഇ.യിലെ ആസ്വാദകർക്കുമുന്നിൽ  മലയാളത്തോടുള്ള പ്രിയം റഹ്മാൻ പ്രകടമാക്കി. ഒരേയൊരു മലയാളസിനിമ, യോദ്ധയ്ക്കുവേണ്ടി മാത്രമാണ് റഹ്മാൻ സംഗീതം പകർന്നത്. പക്ഷെ, നാല് മലയാളം ഗാനങ്ങൾ സംഗീതനിശയിൽ വലിയ പ്രാധാന്യം നൽകി അവതരിപ്പിക്കപ്പെട്ടു.

കാൽ നൂറ്റാണ്ടുമുമ്പ് യോദ്ധ എന്ന സിനിമയ്ക്ക് വേണ്ടി ഈണംപകർന്ന ‘പടകാളി ചക്കി ചങ്കരി...’ എന്ന ഗാനം ഹരിചരണും ബെന്നി ദയാലും ചേർന്ന് പാടി.

ഈ സമയത്ത്  സ്റ്റേജിന്റെ പശ്ചാത്തലത്തിലും വശങ്ങളിലുമുള്ള കൂറ്റൻ എൽ.ഇ.ഡി. സ്‌ക്രീനുകളിൽ മലയാളം അക്ഷരങ്ങളും പാട്ടിന്റെ വരികളും തെളിഞ്ഞു. ജഗതിയും മോഹൻലാലും സിനിമയിൽ ഈ ഗാനരംഗം അവതരിപ്പിച്ചത് ഓർമിപ്പിച്ചുകൊണ്ട് വർണശബളമായ വേഷത്തിൽ ഭാവഹാദികളോടെയായിരുന്നു ഇരുഗായകരും പാടിയത്.

ചോറ്റാനിക്കരയമ്മ എന്ന മലയാളം സിനിമയ്ക്കുവേണ്ടി തന്റെ പിതാവ് ശേഖർ ഈണം പകർന്ന ‘മനസ്സു മനസ്സിന്റെ...’ എന്നു തുടങ്ങുന്ന ഗാനം ശ്വേതാ മോഹൻ ആലപിച്ചപ്പോൾ റഹ്മാനാണ് പിയാനോ വായിച്ചത്.

ഈ ഗാനം വലിയ പ്രാധാന്യം നൽകി പരിപാടിയുടെ തുടക്കത്തിലാണ് അവതരിപ്പിച്ചത്.വിണ്ണൈ താണ്ടി വരുവായ എന്ന തമിഴ് സിനിമയ്ക്കായി റഹ്മാൻ ഈണം പകർന്ന  മലയാളത്തിലുള്ള രണ്ട് ഗാനങ്ങളും സംഗീത നിശയിൽ ഉൾപ്പെട്ടിരുന്നു.

‘ആരോമലെ...’ എന്നു തുടങ്ങുന്ന ഗാനം ബെന്നി  ദയാലും കാർത്തികും ഹരിചരണും ചേർന്ന് ആലപിച്ചു. ‘ഓമന പെണ്ണേ...’ എന്നു തുടങ്ങുന്ന പാട്ട് ബെന്നിയാണ് ആലപിച്ചത്. മലയാളത്തിലുള്ള ഓരോ പാട്ടും വലിയ ഹർഷാരവത്തോടെയാണ് സ്റ്റേഡിയത്തിൽ എത്തിയിരുന്ന കൂടുതലും മലയാളികളടങ്ങിയ ആസ്വാദകർ എതിരേറ്റത്.