രംഗം സിനിമക്ക് മികച്ച സര്‍ട്ടിഫിക്കറ്റ് നൽകി സംവിധായകൻ സത്യൻ അന്തിക്കാടിൻ്റെ മകൻ അഖിൽ സത്യൻ. ഞാനൊരു ദൈവ വിശ്വാസിയാണ്. എന്ന് തുടങ്ങുന്ന കുറിപ്പിൽ അസ്സലായി ആസ്വദിക്കാനുള്ള ഒരു സിനിമയാണ് തരംഗം എന്നാണ് കുറിച്ചിരിക്കുന്നത്.

 ദാസനും വിജയനും, ഗെ റിച്ചിയും, ടാരന്റിനോയും, പ്രിയദർശനും, റാം ജിറാവും തുടങ്ങി നമുക്കിഷ്ടമുള്ള ഒരുപാട് തരം സിനിമകളുടെ മധുരവും പുളിയും എരിവുമുള്ള, എന്നാലിതിലൊന്നിലും പെടാത്ത പുതിയൊരു രസമുള്ള, വെള്ളം ചേർക്കാത്ത ഒരു ഫ്രഷ് സിനിമ.ഈ രുചി ഇപ്പോൾ മലയാളത്തിനാവശ്യമുണ്ട്.ഡൊമിനിക് അരുൺ എന്ന പേരും. എന്നാണ് അഖിൽ കുറിച്ചിരിക്കുന്നത് 

കുറിപ്പിൻ്റെ പൂര്‍ണ്ണരൂപം

"ഞാനൊരു ദൈവ വിശ്വാസിയാണ്. ദൈവത്തിന് എന്നെയും വലിയ വിശ്വാസമാണ്. ഒന്നാമത് ഞാൻ പണ്ടത്തെ പോലെ അത് വേണം, ഇത് നടക്കണം, ഭണ്ഡാരത്തിൽ ഇട്ട രണ്ടു രൂപയിൽ ഒരു രൂപ കെമിസ്‌ട്രി പരീക്ഷക്കും ബാക്കി എന്റെ കംപ്ലീറ്റ് ഭാവി സ്മൂത്ത് 
ആവാനുമാണെന്നൊക്കെ പ്രാർത്ഥിച്ച് ദൈവത്തെ വെറുപ്പിക്കാറില്ല. നീണ്ട പ്രാർത്ഥനകളേക്കാൾ ദൈവത്തിനിഷ്ടം ഒരു സിംപിൾ 'ഹായ്' ആണെന്നാണ് ഞാൻ വിശ്വസിക്കുന്നത്."

"എഴുത്തഭ്യാസം" എന്ന ബ്ലോഗിൽ ഞാൻ തന്നെ എഴുതിയതാണ്. ഇത് ഇന്നലെ ചെന്നൈയിലെ തിയറ്ററിൽ, ഇരുട്ടിൽ ഇരുന്ന് ഒന്നൂടെ ഓർത്തെടുത്ത്, സെൽഫ് - പുളകിതൻ ആയിപ്പോയി.
സ്‌ക്രീനിൽ ദൈവത്തിന്റെ ബെഡ് റൂമാണ്. രാവിലെ ഉറക്കത്തിൽ നിന്നെഴുന്നേറ്റ്, മുഖം കഴുകി ഒരു പഴയ റേഡിയൊ ട്യൂൺ ചെയ്ത് ഭൂമിയിൽ നിന്നുള്ള പ്രാർത്ഥനകൾ കേൾക്കുന്ന, ദിലീഷ് പോത്തന്റെ ഛായയുള്ള ദൈവം. പ്രാർത്ഥനകൾക്കിടക്ക് ഇത് വരെ മീശ വരാത്തതിന് ദൈവത്തിനെ ചീത്ത വിളിക്കുന്ന പയ്യനുമുണ്ട്. "ഇവനെയൊക്കെ ഏത് നേരത്താണോ.." എന്ന് ഹീബ്രു ഭാഷയിൽ പിറുപിറുക്കുന്ന, മനുഷ്യരിൽ നിന്നും മനുഷ്യപ്പറ്റു മാത്രം ആഗ്രഹിക്കുന്ന ആ പാവം ദൈവമാണ് സിനിമയിലെ നായകൻ. "ഇത് കൊള്ളാമല്ലോ !"എന്ന് നമ്മൾ മനസ്സിൽ പറയുന്ന ആ നിമിഷമാണ് പടത്തിന്റെ പേര് സ്‌ക്രീനിൽ വരുന്നത്.
"തരംഗം"

പിന്നീടങ്ങോട്ട് അസ്സലായി ആസ്വദിക്കാനുള്ള ഒരു സിനിമയാണ്. ദാസനും വിജയനും, ഗെ റിച്ചിയും, ടാരന്റിനോയും, പ്രിയദർശനും, റാം ജിറാവും തുടങ്ങി നമുക്കിഷ്ടമുള്ള ഒരുപാട് തരം സിനിമകളുടെ മധുരവും പുളിയും എരിവുമുള്ള, എന്നാലിതിലൊന്നിലും പെടാത്ത പുതിയൊരു രസമുള്ള, വെള്ളം ചേർക്കാത്ത ഒരു ഫ്രഷ് സിനിമ.
ഈ രുചി ഇപ്പോൾ മലയാളത്തിനാവശ്യമുണ്ട്.
ഡൊമിനിക് അരുൺ എന്ന പേരും.