കാട്ടിലെ മന്ത്രിയെ കൈക്കൂലിക്കാരനായി ചിത്രീകരിച്ച് തമാശപ്പാട്ടെഴുതുമ്പോള്‍ അത് ഉന്നം തെറ്റി 'നാട്ടിലെ മന്ത്രി'ക്ക് ചെന്നു കൊള്ളുമെന്ന് സ്വപ്നത്തില്‍ പോലും കരുതിയിരിക്കില്ല പൂവച്ചല്‍ ഖാദര്‍. വെറുമൊരു സിനിമാഗാനത്തിന് ആരും പ്രതീക്ഷിക്കാത്ത രാഷ്ട്രീയമാനം കൈവരിക്കാനും ചിലപ്പോഴെങ്കിലും രചയിതാവിന് പാരയാകാനും കഴിയും എന്ന് പൂവച്ചല്‍ ആദ്യമായി തിരിച്ചറിഞ്ഞ സന്ദര്‍ഭം.

പടം 'ചുഴി' (1973). സിനിമയില്‍ കുട്ടിക്കുരങ്ങനെ കളിപ്പിച്ചുകൊണ്ട് തെരുവുഗായകന്‍ പാടേണ്ട പാട്ടാണ്. കഥാസന്ദര്‍ഭം വിവരിച്ചുകേട്ടപ്പോള്‍ ചിരിയും  ഇത്തിരി ചിന്തയും ഇടകലര്‍ത്തി പൂവച്ചല്‍ ഖാദര്‍ എഴുതി: 'കാട്ടിലെ മന്ത്രീ, കൈക്കൂലി വാങ്ങാന്‍ കയ്യൊന്നു നീട്ടൂ രാമാ, നാട്ടിലിറങ്ങി വോട്ടു പിടിക്കാന്‍ വേഷം കെട്ടൂ രാമാ.'' ബാബുരാജിന്റെ ഈണത്തില്‍ ആന്റോയും എല്‍ ആര്‍ ഈശ്വരിയും പാടിയ നല്ലൊരു ഹാസ്യഗാനം. പക്ഷേ പാട്ട് റേഡിയോയില്‍ കേട്ടുതുടങ്ങിയതോടെ കഥ മാറി. ആസ്വാദകര്‍ക്കൊപ്പം വിമര്‍ശകരുമുണ്ടായി അതിന്. സംസ്ഥാന വനം വകുപ്പ് മന്ത്രിയെ കരിതേച്ചു കാണിക്കാന്‍ വേണ്ടി കരുതിക്കൂട്ടി എഴുതിയ പാട്ടാണെന്നായിരുന്നു പ്രധാന ആരോപണം. 

കാരണമുണ്ട്. അഴിമതിയാരോപണങ്ങളില്‍പ്പെട്ടുഴലുകയായിരുന്നു  അന്നത്തെ വനം മന്ത്രി. 'കാട്ടുകള്ളന്‍'' എന്നൊക്കെ വിളിച്ച് മാധ്യമങ്ങള്‍ അദ്ദേഹത്തെ വേട്ടയാടുന്ന കാലം. സ്വാഭാവികമായും മന്ത്രിയെ അടിക്കാന്‍ നല്ലൊരു വടിയായി കണ്ടു പ്രതിപക്ഷകക്ഷികള്‍ ആ പാട്ടിനെ. പാര്‍ട്ടി സമ്മേളനങ്ങളില്‍ സ്ഥിരം അജണ്ടയായി മാറി അത്. 'ജാഥ നയിക്കുവതെങ്ങിനെ നീ, കുതികാല്‍ വെട്ടുകയെതെങ്ങിനെ നീ ചക്കാത്ത് കാറില്‍ ഉത്ഘാടനത്തിനു നാടുകള്‍ ചുറ്റുവതെങ്ങിനെ നീ'' എന്നിങ്ങനെയാണ് പാട്ടിന്റെ പോക്ക്. രാഷ്ട്രീയത്തിലെ അവസരവാദികളെ കണക്കിന് കളിയാക്കിയിട്ടുണ്ടെങ്കിലും ഒരു പ്രത്യേക നേതാവിനേയും ലക്ഷ്യം വെച്ച് എഴുതിയതല്ല ആ പാട്ടെന്ന് ആണയിട്ടു പറയും ഖാദര്‍. എന്തായാലും അധികം താമസിയാതെ പാട്ട് റേഡിയോയില്‍ നിന്ന് അപ്രത്യക്ഷമായി. പൊതുയോഗങ്ങളില്‍ അതു കേള്‍പ്പിക്കുന്നതിന് അനൗദ്യോഗിക വിലക്കും വന്നു. 'ചലച്ചിത്ര ഗാനത്തിന് പോലീസ് നിരോധനം'' എന്ന തലക്കെട്ടില്‍ അക്കാലത്ത് പത്രങ്ങളില്‍ വാര്‍ത്ത വരെ വന്നിരുന്നുവെന്ന് ഓര്‍ക്കുന്നു പൂവച്ചല്‍. വിവാദങ്ങളില്‍ താല്‍പര്യം പണ്ടേയില്ലാത്തതിനാല്‍ വിശദീകരണം ചോദിച്ച് അലമ്പുണ്ടാക്കാനൊന്നും പോയില്ല മര്യാദക്കാരനായ ഖാദര്‍. 

''ഉന്നം പിഴച്ച'' ഗാനങ്ങള്‍ വേറെയുമുണ്ട് മലയാള സിനിമയില്‍. എഴുതിയ പാട്ടില്‍ 'വിപ്ലവവീര്യം' കൂടിപ്പോയി എന്നതായിരുന്നു ശ്രീകുമാരന്‍ തമ്പിയുടെ രചനയെ പ്രതിക്കൂട്ടിലാക്കാന്‍ സെന്‍സര്‍ ബോര്‍ഡ് കണ്ടെത്തിയ ന്യായം. 1968 ലെ കഥ. നക്‌സല്‍ബാരി പ്രസ്ഥാനം കേരളത്തിലും വേരുപിടിച്ചു വരുന്ന സമയമാണ്. ശശികുമാര്‍ സംവിധാനം ചെയ്ത 'ലവ് ഇന്‍ കേരള' എന്ന തട്ടുപൊളിപ്പന്‍ ആക്ഷന്‍ ഹ്യൂമര്‍ ചിത്രത്തിന് വേണ്ടി തമ്പി ഒരു പാട്ടെഴുതുന്നു. മാവോ സെ തുങ്ങിന്റെ ചൈനീസ് വിപ്ലവ മുദ്രാവാക്യത്തില്‍ നിന്നാണ് ഗാനത്തിന്റെ തുടക്കം: ''നൂറു നൂറു പൂക്കള്‍ വിരിയട്ടെ.'' സിനിമയില്‍ കൊള്ളസംഘത്തിലെ സുന്ദരിയുടെ മാദകനൃത്തത്തിന് അകമ്പടി സേവിക്കുന്ന പാട്ടാണെങ്കിലും അത് നമ്മുടെ നാട്ടില്‍ നക്‌സല്‍ പ്രസ്ഥാനത്തിന്റെ വളര്‍ച്ചക്ക് പ്രചോദനമാകുമെന്നായിരുന്നു സെന്‍സര്‍ ബോര്‍ഡിന്റെ കണ്ടെത്തല്‍. പാട്ട്  ഉപേക്ഷിച്ചാലേ  സിനിമക്ക് പ്രദര്‍ശനാനുമതി നല്‍കൂ എന്ന് ബോര്‍ഡിന് വാശി. ചുരുങ്ങിയത് ആ വരിയെങ്കിലും ഒഴിവാക്കിയേ പറ്റൂ. ''ഗാനചിത്രീകരണം കഴിഞ്ഞ സ്ഥിതിക്ക് ആദ്യ വരിയില്‍ ചെറിയൊരു ഭേദഗതി വരുത്തുകയല്ലാതെ വേറെ വഴിയുണ്ടായിരുന്നില്ല.'' തമ്പി ഓര്‍ക്കുന്നു. ''യേശുദാസിനെ വീണ്ടും വിളിച്ചുവരുത്തി നൂറു നൂറു പൂക്കള്‍ എന്ന വരിയുടെ സ്ഥാനത്ത് നൂറു നൂറു പുലരികള്‍ എന്ന് പാടിച്ചു റെക്കോര്‍ഡ് ചെയ്തത് അങ്ങനെയാണ്. പൂവിന്റെ സ്ഥാനത്ത് പുലരി വന്നതു കൊണ്ട് ലിപ് മൂവ്‌മെന്റിന് കാര്യമായി പരിക്കേറ്റില്ല.'' പല്ലവിയിലെ മാറ്റം അംഗീകരിച്ചു സെന്‍സര്‍ ബോര്‍ഡ് പടത്തിനു പ്രദര്‍ശനാനുമതി കൊടുത്തെങ്കിലും, പാട്ടിന്റെ ഗ്രാമഫോണ്‍ റെക്കോര്‍ഡില്‍  വിരിഞ്ഞത് പഴയ 'പൂവ്' തന്നെ. അക്കാരണത്താല്‍ ആകാശവാണി ആ ഗാനം പ്രക്ഷേപണം ചെയ്തതുമില്ല.  

മങ്കൊമ്പ് ഗോപാലകൃഷ്ണന്റെ ഓര്‍മ്മയിലുമുണ്ട് എഴുതിയ പാട്ട് തിരിച്ചുകടിച്ച അനുഭവം. തെമ്മാടിവേലപ്പനു വേണ്ടി മങ്കൊമ്പ് രചിച്ച ''ത്രിശങ്കു സ്വര്‍ഗത്തെ തമ്പുരാട്ടി'' എന്ന ഹാസ്യഗാനം അടിയന്തിരാവസ്ഥക്കാലത്ത് പ്രതിപക്ഷത്തെ യുവജന വിദ്യാര്‍ഥി സംഘടനകള്‍ ഉപയോഗിച്ചത് അന്നത്തെ പ്രധാനമന്ത്രി ഇന്ദിരാഗാന്ധിയെ ആക്രമിക്കാനാണ്. സിനിമയില്‍ ജയഭാരതിയും നസീറും പ്രത്യക്ഷപ്പെടുന്ന രംഗത്തിന് വേണ്ടി എഴുതപ്പെട്ട ഗാനം അങ്ങനെ രചയിതാവിനെ പോലും ഞെട്ടിച്ചുകൊണ്ട് ഇന്ദിരയുടെ ഏകാധിപത്യ പ്രവണതക്കെതിരായ ആക്ഷേപ ഹാസ്യ ഗാനമായി രൂപം മാറുന്നു. കാംപസ്സുകളിലായിരുന്നു പാട്ടിന് ആരാധകര്‍ ഏറെ. ''ഇന്ദിരയെ കരിതേച്ചു കാണിക്കാന്‍ കരുതിക്കൂട്ടി എഴുതിയ ഗാനമാണ് അതെന്നു ചിത്രീകരിക്കാന്‍ വരെ നീക്കമുണ്ടായി. മുടിചൂടാ മന്നന്റെ പ്രിയസന്തതി, മൂളിയലങ്കാരിയുടെ വക്രബുദ്ധി, എള്ളു കൊറിച്ചാല്‍ എള്ളോളം പെണ്ണൊരുമ്പെട്ടാല്‍ പെണ്ണോളം എന്നൊക്കെയുണ്ട് പാട്ടില്‍. അതൊക്കെ ഉദ്ദേശിക്കാത്ത തരത്തിലാണ് വ്യാഖ്യാനിക്കപ്പെട്ടത്.  പല കോളേജുകളിലും ഈ പാട്ട് പാടി വിദ്യാര്‍ഥികള്‍ ഇന്ദിരാഗാന്ധിയുടെ കോലം  കത്തിക്കുന്ന സ്ഥിതി വരെ എത്തി.''-മങ്കൊമ്പ്.

അടിയന്തിരാവസ്ഥക്കാലമാണ്. തടി കേടാകും. എത്രയും വേഗം പ്രായശ്ചിത്തം ചെയ്‌തേ പറ്റൂ. അധികം കാത്തിരിക്കേണ്ടി വന്നില്ല അതിനുള്ള അവസരം വീണുകിട്ടാന്‍. തെമ്മാടി വേലപ്പന് തൊട്ടുപിന്നാലെ ഹരിഹരന്‍ സംവിധാനം ചെയ്ത 'സംഗമം' എന്ന ചിത്രത്തില്‍  ഒരു ശ്രമദാന രംഗമുണ്ട്. ദേശീയോദ്ഗ്രഥനം വിഷയമാക്കി ഒരു പാട്ട് വേണം അവിടെ. അടിയന്തരാവസ്ഥയുടെ ഭാഗമായി നടപ്പിലാക്കിയ ഇരുപതിന പരിപാടിയെ പ്രകീര്‍ത്തിച്ചു കൊണ്ട് 'ആദികവിയുടെ ആശ്രമമേ ആര്‍ഷഭാരതമേ' എന്നൊരു ഗാനം ആ രംഗത്തിന് വേണ്ടി എഴുതുന്നു മങ്കൊമ്പ്. ചരണത്തില്‍ ''ഇതളിട്ടു വിടര്‍ന്നു നിന്‍ തിരുമുറ്റത്ത് ഇരുപതു ദളമുള്ള പുഷ്പം, അമൃത നിഷ്യന്തിയാം അതിന്‍ പരാഗങ്ങളണിയും ജനഗണഹൃദയങ്ങള്‍'' എന്നീ വരികള്‍ എഴുതിച്ചേര്‍ത്തത് കരുതിക്കൂട്ടിയാണ്. ഇന്ദിരാ ഭക്തര്‍ സന്തോഷിക്കട്ടെ. എഴുതുക മാത്രമല്ല ആ പാട്ടിന്റെ ഇംഗ്ലീഷ് തര്‍ജമ  ഇന്ദിരാഗാന്ധിക്ക് അയച്ചുകൊടുക്കുകയും ചെയ്തു അദ്ദേഹം. ''ജീവനില്‍ കൊതിയുള്ള ആരും അതേ ചെയ്യൂ അന്ന്.''-മങ്കൊമ്പ് പറയും.

അടിയന്തിരാവസ്ഥക്കാലത്ത് സമ്മേളനവേദികളില്‍ പതിവായി പാടിക്കേട്ട മറ്റൊരു പാട്ടുണ്ട്: പി ഭാസ്‌കരന്‍ എഴുതി ദക്ഷിണാമൂര്‍ത്തി ഈണമിട്ട  ''കനകസിംഹാസനത്തില്‍ കയറിയിരിക്കുന്നവന്‍ ശുനകനോ വെറും ശുംഭനോ'' (അരക്കള്ളന്‍ മുക്കാല്‍ക്കള്ളന്‍). കോണ്‍ഗ്രസ്സിന്റെ അഖിലേന്ത്യാ അധ്യക്ഷന്‍ ദേവ്കാന്ത്  ബറുവയെ മനസ്സില്‍ കണ്ട് മന:പര്‍വം എഴുതിയതാണ് ആ പാട്ടെന്ന് വിശ്വസിച്ചിരുന്നു അന്ന് പലരും. ''പാട്ടിന്റെ പേരില്‍ ഭരണകക്ഷിയില്‍ നിന്ന് കടുത്ത വിമര്‍ശനവും പ്രതിപക്ഷത്തിന്റെ അകമഴിഞ്ഞ അഭിനന്ദനവും ലഭിച്ചിട്ടുണ്ട്. രണ്ടും ചിരിയോടെ മാത്രമേ ഞാന്‍ സ്വീകരിച്ചിട്ടുള്ളൂ. സിനിമയിലെ ഏതോ സന്ദര്‍ഭത്തിന് വേണ്ടി തിടുക്കത്തില്‍ എഴുതിക്കൊടുത്ത ഒരു തമാശപ്പാട്ട് മാത്രമാണത് എന്ന സത്യം അവര്‍ വിശ്വസിക്കണം എന്നില്ലല്ലോ..'' ഭാസ്‌കരന്‍ മാഷിന്റെ വാക്കുകള്‍.

Content Highlights: PriyaVarrier Oru Adaar Love ManikyaMalare Song Old Malayalam Song