Investment planദേവദാസിന് വയസ്സ് 30. കേന്ദ്ര സര്‍ക്കാര്‍ ജീവനക്കാരനാണ്. മ്യൂച്വല്‍ ഫണ്ട്, ബാങ്ക് എഫ്ഡി, പിഎഫ് എന്നിവയിലായി മൊത്തം അഞ്ച് ലക്ഷം രൂപയുടെ നിക്ഷേപം ദേവദാസിനുണ്ട്. ഭാര്യക്ക് ജോലിയില്ല. ഇതുവരെ കുട്ടികളായിട്ടില്ല.

ദേവദാസിന്റെ സാമ്പത്തിക ലക്ഷ്യങ്ങള്‍ ഇവയെല്ലാമാണ്:

റിട്ടയര്‍മെന്റ്കാല ജീവിതം
വിദേശ വിനോദയാത്ര
കുട്ടിയുടെ വിദ്യാഭ്യാസം, വിവാഹം

സാമ്പത്തിക ലക്ഷ്യങ്ങള്‍ പൂര്‍ത്തയാക്കുന്നതിന് തനിക്ക് ലഭിക്കുന്ന വരുമാനംകൊണ്ട് കഴിയുമോയെന്നാണ് ദേവദാസിന് അറിയേണ്ടത്.


ദേവദാസ്

50,000
രൂപ
പ്രതിമാസ വരുമാനം 

40,000 രൂപ 
പ്രതിമാസ ചെലവ് (ഭവനവായ്പ ഇഎംഐ ഉള്‍പ്പടെ)

ഒരു ലക്ഷം
മ്യൂച്വല്‍ ഫണ്ട് നിക്ഷേപം

രണ്ട് ലക്ഷം
പിഎഫ്: 

രണ്ട് ലക്ഷം
എഫ്ഡി

ദേവദാസ് ചെയ്യേണ്ടത്:

അടിയന്തര ആവശ്യങ്ങള്‍ക്കുള്ള പണം
പെട്ടെന്നുണ്ടാകുന്ന ആവശ്യത്തിന് ഒരു ലക്ഷം രൂപ ദേവദാസ് നീക്കിവെച്ചിട്ടുണ്ട്. ഭവനവായ്പയുടെ ഇഎംഐ ഉള്‍പ്പടെ പ്രതിമാസ വീട്ടുചെലവ് 40,000 രൂപയാണ്. ഇത് പ്രകാരം  മൂന്ന് മാസത്തെ വീട്ടുചെലവിനുള്ള തുകയായ 1.20 ലക്ഷം രൂപ സ്വീപ് ഇന്‍ ഫെസിലിറ്റിയുള്ള സേവിങ് ബാങ്ക് അക്കൗണ്ടിലോ ലിക്വിഡ് ഫണ്ടിലോ സൂക്ഷിക്കണം. കുട്ടികളായാല്‍ ആറ് മാസത്തെ ചെലവിനുള്ള തുകയെങ്കിലും എമര്‍ജന്‍സി ഫണ്ടായി കരുതണം.

ഹെല്‍ത്ത് ഇന്‍ഷുറന്‍സ്
കേന്ദ്ര സര്‍ക്കാര്‍ ജീവനക്കാരനായതിനാല്‍ സെന്‍ട്രല്‍ ഗവണ്‍മെന്റ് ഹെല്‍ത്ത് സ്‌കീം പ്രകാരമുള്ള പരിരക്ഷ ദേവദാസിന് ലഭിക്കും. ചെലവേറിയ ചികിത്സയ്ക്ക് ഇത് ഏറെ ഉപകാരപ്രദമാണ്. 

എന്നാല്‍, ചില നഗരങ്ങളില്‍ ഈ സ്‌കീം പ്രകാരം ചികിത്സ ലഭിക്കില്ലെന്നുമാത്രമല്ല കാഷ് ലെസ് ഫെസിലിറ്റിയുമില്ല. അതുകൊണ്ടുതന്നെ ആദ്യം പണം ചെലവഴിക്കേണ്ടിവരും. പിന്നീട് ചെലവായ തുക റീഫണ്ടിനായി ശ്രമിക്കാം. 

അതുകൊണ്ട് രണ്ട് ലക്ഷം രൂപയുടെയെങ്കിലും ഫാമിലി ഫ്‌ളോട്ടര്‍ ഹെല്‍ത്ത് ഇന്‍ഷുറന്‍സ് എടുക്കുന്നത് എന്തുകൊണ്ടും യോജിച്ചതാണ്. വാര്‍ഷിക പ്രീമിയമായി എണ്ണായിരത്തിനും പതിനായിരത്തിനും ഇടയിലാണ് അതിന് ചെലവ് വരിക. 

ലൈഫ് കവര്‍
ദേവദാസിന് ഇതുവരെ ലൈഫ് കവര്‍ ഇല്ല. അതുകൊണ്ട് 75 ലക്ഷം രൂപയുടെ ടേം ഇന്‍ഷുറന്‍സ് എടുക്കണം. തന്റെ അഭാവത്തില്‍ ആശ്രിതരുടെ സാമ്പത്തിക ഭദ്രത നിലനിര്‍ത്താന് അത് അനിവാര്യമാണ്. പ്രതിവര്‍ഷം 10,000 രൂപയോളമാണ് അതിന് ചെലവ് വരിക. കുട്ടകളായാല്‍ ഭാവിയില്‍ കവറേജ് ഉയര്‍ത്തുന്നതിനെക്കുറിച്ച് ആലോചിക്കണം. 

ഇനി നിക്ഷേപത്തിലേയ്ക്ക് വരാം.
സാമ്പത്തിക ലക്ഷ്യങ്ങള്‍
ചെലവുകളെല്ലാം കഴിഞ്ഞ് ദേവദാസിന് പ്രതിമാസം ബാക്കയുണ്ടാകുക 10,000 രൂപമാത്രമാണ്. സാമ്പത്തിക ലക്ഷ്യങ്ങള്‍ കൈവരിക്കാന്‍ ഈ തുക അപര്യാപ്തമാണ്. 

തല്‍ക്കാലം ഈ തുക മള്‍ട്ടി ക്യാപ് ഫണ്ടുകളില്‍ നിക്ഷേപിക്കാം(പട്ടികയില്‍നിന്ന് ഫണ്ടുകള്‍ തിരഞ്ഞെടുക്കാം). നിക്ഷേപിക്കുന്ന തുകയില്‍ പത്ത് ശതമാനം എല്ലാവര്‍ഷവും കൂട്ടിക്കൊണ്ടുവരിക. ഫണ്ടുകളുടെ പ്രകടനം വര്‍ഷത്തിലൊരിക്കല്‍ വിലയിരുത്തി ആവശ്യമെങ്കില്‍ മാറ്റംവരുത്തുക.

കുട്ടി ജനിച്ചാലുടെ വിദ്യാഭ്യാസത്തിനും വിവാഹത്തിനുംവേണ്ടിയുള്ള നിക്ഷേപം തുടങ്ങണം. അപ്പോഴേയ്ക്കും വരുമാനത്തില്‍ കാര്യമായ വര്‍ധന പ്രതീക്ഷിക്കാം. ഭാര്യയ്ക്കുകൂടി ജോലി ലഭിക്കുമെങ്കില്‍ നിക്ഷേപ വഴി കൂടുതല്‍ എളുപ്പമാകും. 

അഞ്ച് വര്‍ഷം കഴിയുമ്പോഴുള്ള വിദേശ വിനോദയാത്രയ്ക്ക് 3.80 ലക്ഷം രൂപയാണ് നിങ്ങള്‍ പ്രതീക്ഷിക്കുന്നത്. അതിനുവേണ്ടി നിലവിലെ നിക്ഷേപത്തില്‍നിന്ന് 1.62 ലക്ഷം രൂപ കണ്ടെത്താം. ബാക്കിയുള്ള തുക സമാഹരിക്കുന്നതിന് (12 ശതമാനം നേട്ടപ്രകാരം)4,886 രൂപയാണ് പ്രതിമാസം നിക്ഷേപിക്കേണ്ടിവരിക. 15 ശതമാനം നേട്ടം ലഭിക്കുമെങ്കില്‍ പ്രതിമാസം 4,679 രൂപയാണ് നിക്ഷേപിക്കേണ്ടിവരിക. 

15 വര്‍ഷം കഴിയുമ്പോള്‍ കുട്ടികളുടെ ഉന്നത വിദ്യാഭ്യാസത്തിന് 11.75 ലക്ഷം രൂപയാണ് പ്രതീക്ഷിക്കുന്നത്. അതിനുവേണ്ടി (12 ശതമാനം നേട്ടം ലഭിക്കുമെങ്കില്‍)14,493 രൂപ നിക്ഷേപിക്കേണ്ടിവരും. 15 ശതമാനം നേട്ടം ലഭിക്കുന്ന നിക്ഷേപ പദ്ധതിയിലാണെങ്കില്‍ 13,458 രൂപ നിക്ഷേപിച്ചാല്‍ മതി. 

22 വര്‍ഷം കഴിയുമ്പോള്‍ 46.60 ലക്ഷം രൂപയാണ് കുട്ടിയുടെ വിവാഹത്തിനായി നിങ്ങള്‍ പ്രതീക്ഷിക്കുന്നത്. ഇതിനുവേണ്ടി 12 ശതമാനം പലിശ ലഭിക്കുന്ന നിക്ഷേപ പദ്ധതി പ്രകാരം 5,067 രൂപ നിക്ഷേപിക്കേണ്ടിവരും. 15 ശതമാനം നേട്ടം ലഭിക്കുമെങ്കില്‍ പ്രതിമാസം 3,512 രൂപ നിക്ഷേപിച്ചാല്‍ മതി.

പണപ്പെരുപ്പ നിരക്കുകളുമായി താരതമ്യം ചെയ്യുമ്പോള്‍ റിട്ടയര്‍മെന്റ് ജീവിതത്തിന് പെന്‍ഷന്‍ തുക തികയാതെവരും. 4.14 കോടി രൂപ ഇതിനായി കണ്ടെത്തണം. നിലവിലുള്ള നിക്ഷേപങ്ങളില്‍നിന്ന് 1.31 കോടി ലഭിക്കും. ബാക്കിയുള്ള തുകകണ്ടെത്താന്‍ 12 ശതമാനം നേട്ടം ലഭിക്കുന്ന നിക്ഷേപ പദ്ധതിയിലാണെങ്കില്‍ പ്രതിമാസം 11,628 രൂപയാണ്  നിക്ഷേപിക്കേണ്ടിവരിക. 15 ശതമാനം നേട്ടംലഭിക്കുമെങ്കില്‍ 6,681 രൂപ പ്രതിമാസം നിക്ഷേപിച്ചാല്‍ മതി. 

Equity: Multi Cap