MATHRUBHUMI RSS
Loading...
ദേവതയുടെ ശബ്ദം
ബിബിന്‍ ബാബു

സിനിമകളില്‍ പൈങ്കിളിയല്ലാത്ത ശബ്ദമുള്ള ചുരുക്കം ചില ഡബ്ബിങ്ങ് ആര്‍ട്ടിസ്റ്റുമാരുടെ ഗണത്തിലാണ് സ്റ്റുഡിയോയില്‍ എയ്ഞ്ചലിന്റെ സ്ഥാനം............ന്യൂജനറേഷന്‍ പടങ്ങളിലെ ബോള്‍ഡ് നായികാസങ്കല്‍പ്പങ്ങള്‍ക്ക് ചേര്‍ന്ന ഈ ശബ്ദം വരാനിരിക്കുന്ന 'നികൊഞാചാ'യിലാണ് ഇനി കേള്‍ക്കാനിരിക്കുന്നത് പുതിയ താരോദയമായ രോഹിണി മറിയം ഇടിക്കുളയ്ക്കുവേണ്ടി......ശേഷം 'മാഡ്ഡാഡി'ല്‍ പൂജ ഗാന്ധിക്കായി....പരസ്യവും സിനിമയുമായി തിരക്കിന്റെ ലോകത്തിലാണിപ്പോള്‍ ഈ 'ശബ്ദസുന്ദരി'..

'അച്ഛന്‍ ഇനി വരില്ലേ അമ്മേ.... ഏഴാം വയസ്സിലെ തന്റെ ആദ്യ ഡബ്ബിങ്ങ് ഡയലോഗ് ഓര്‍ത്താല്‍ എയ്ഞ്ചലിനിപ്പോഴും ചിരിപൊട്ടും. അച്ഛന്റെ കൈപിടിച്ചുനിന്ന് കിളിശബ്ദത്തില്‍ സീരിയലിനായി പറഞ്ഞ ഏതാനും വാക്കുകള്‍. പതിനാലുവര്‍ഷങ്ങള്‍ക്കിപ്പുറം രണ്ടായിരത്തോളം പരസ്യങ്ങളുടെയും ഇരുന്നൂറോളം സിനിമകളുടെയും മൈക്രോസിനിമകളുടെയും പരിചയസമ്പത്തില്‍ ചലച്ചിത്രലോകത്തെ ന്യൂജനറേഷന്‍ ശബ്ദവഴികള്‍ തേടുകയാണ് എയ്ഞ്ചല്‍ ഷിജോയിയെന്ന ഇരുപത്തൊന്നുകാരി, മാറുന്ന മലയാള സിനിമയിലെ പുതുശബ്ദം.

മമ്മി & മീ യില്‍ ടീനേജുകാരി ജുവലായി(അര്‍ച്ചന കവി), കുട്ടിസ്രാങ്കില്‍ ചവിട്ടുനാടക കളരിയിലെ സുന്ദരി പെമ്മേണയായി(കമാലിനി മുഖര്‍ജി), കേരളകഫെയിലെ ഹാപ്പിജേണിയില്‍ ബോള്‍ഡ്ബ്യൂട്ടിയായി (നിത്യ മേനോന്‍), ആഗതനില്‍ മേജറിന്റെ മകള്‍ ശ്രേയയായി(ചാര്‍മി), മായാമോഹിനിയില്‍ പട്ടേലയുടെ മകള്‍ മായയായി(ലക്ഷ്മി റായി) അടുത്തിടെ നമ്മള്‍ കേട്ടറിഞ്ഞിട്ടുണ്ട് എയ്ഞ്ചലിനെ. റണ്‍ബേബി റണ്ണില്‍ അപര്‍ണ നായര്‍ക്കും, ഗ്രാന്റ് മാസ്റ്ററില്‍ മിത്ര കുര്യനും, സ്പിരിറ്റില്‍ ഡോ.അശ്വതിക്കും എയ്ഞ്ചലിന്റെ ശബ്ദമായിരുന്നു കൂട്ട്. ഭീമയുടെയും ജോസ് ആലുക്കാസിന്റെയും ജയലക്ഷ്മിയുടെയും ഇന്ദുലേഖയുടെയും മറ്റും പരസ്യങ്ങളിലൂടെ വീട്ടിലെ സ്വീകരണമുറികളിലും സംസാരവിഷയമായിട്ടുണ്ട് ഈ 'മാലാഖ' ശബ്ദം.

ആദ്യ ഡബ്ബിങ് ആണ്‍കുട്ടിക്ക് വേണ്ടി

ഒരാണ്‍കുട്ടിക്ക് വേണ്ടി ഡബ്ബിങ് നടത്തിയാണ് താനീ രംഗത്തേക്കെത്തിയതെന്നോര്‍ക്കുമ്പോള്‍ കുസൃതിവിരിയും എയ്ഞ്ചലിന്റെ മുഖത്ത്. ഒരു സീരിയലിനായി ചെയ്ത 'അച്ഛന്‍ ഇനി വരില്ലേ അമ്മേയ്ത്ത എന്ന ആ ഒറ്റ ഡബ്ബിങ് ക്ലിക്കായി. കസിന്‍ബ്രദര്‍ വഴി ഏഴാം വയസ്സില്‍ ദക്ഷിണേന്ത്യയിലെ പരസ്യ നിര്‍മ്മാതാവായ കെന്നി ഫെര്‍ണാണ്ടസിനെ കണ്ടുമുട്ടിയതാണ് വഴിത്തിരിവായതെന്ന് ഏയ്ഞ്ചല്‍ ഓര്‍ക്കുന്നു. ഏഴാം വയസ്സിലെ ആദ്യ ഡബ്ബിങ്ങ് ഹിറ്റായതോടെ സീരിയലുകളിലും പരസ്യങ്ങളിലും ഡോക്യുമെന്ററികളിലും സ്ഥിരസാന്നിദ്ധ്യമായി. പോപ്പി, ജോണ്‍സ് കുടകളുടെ ജിംഗിള്‍സും ഈ മധുരശബ്ദത്തില്‍ പിറവികൊണ്ടു. സിനിമയിലേക്ക് രംഗപ്രവേശം ചെയ്തതും ഒരു തമിഴ് ബാലനുവേണ്ടി ഡബ്ബ് ചെയ്തായിരുന്നുവെന്നത് മറ്റൊരു കുസൃതി. ഭദ്രന്റെ വെള്ളിത്തിര എന്ന ചിത്രത്തിലൂടെ...

സിനിമയിലെ ഓരോ കഥാപാത്രത്തിനും തനതായവ്യക്തിത്വം നല്‍കുന്ന ഡബ്ബിങ്ങ് ആര്‍ട്ടിസ്റ്റുമാരോട് ആരാധനയാണ് ഏയ്ഞ്ചലിന്. മണിച്ചിത്രത്താഴിലെ ശോഭനയുടെ ശബ്ദമായ ഭാഗ്യലക്ഷ്മിയെ, അനിയത്തിപ്രാവില്‍ ശാലിനിക്കു ശബ്ദമായ ശ്രീജയെ, കയ്യൊപ്പില്‍ ഖുശ്ബുവിന്റെ ശബ്ദമായ വിമ്മിയെ, ചാപ്പകുരിശിലെ രമ്യ നമ്പീശന് ശബ്ദം നല്‍കിയ സുകന്യയെയൊക്കെ ഏറെ വിലമതിക്കുകയും അവര്‍ അനശ്വരമാക്കിയ കഥാപാത്രങ്ങളെപ്പോലെയുള്ള കഥാപാത്രങ്ങള്‍ പ്രതീക്ഷിക്കുകയുമാണീ 'മാലാഖ' കുട്ടി.

പരസ്യങ്ങള്‍ ഏറെയിഷ്ടം

പരസ്യങ്ങള്‍ക്ക് ഡബ്ബ് ചെയ്യാനാണ് എയ്ഞ്ചലിനേറെയിഷ്ടം. ഏതാനും മിനിറ്റുകള്‍ കൊണ്ട് കഴിയുമെന്നതു തന്നെ ഈ ഇഷ്ടത്തിനു പിന്നില്‍. ഏറിയാല്‍ ഒരു മണിക്കൂര്‍ കൊണ്ടു തീരുന്നതാണ് പരസ്യഡബ്ബിങ്ങുകള്‍..പക്ഷെ സിനിമ ചെയ്യുമ്പോള്‍ ടെന്‍ഷനാണ് എയ്ഞ്ചലിന്, കഥാപാത്രത്തിന്റെ ഐഡന്റിറ്റി സംരക്ഷിക്കേണ്ട ഏറെ ഉത്തരവാദിത്വമുള്ള പണി കൈയിലായതു തന്നെയാണ് ഈ ടെന്‍ഷന്റെ കാരണം. ഇങ്ങനെയൊക്കെയൊരു ഫോര്‍മാലിറ്റിക്കു പറയുമെങ്കിലും സിനിമയില്‍ ആറു ഭാഷകളില്‍ ഡബ്ബിങ്ങ് നടത്തിക്കഴിഞ്ഞു ഈ ശബ്ദസുന്ദരി. ശബ്ദത്തെ സ്‌ക്രാച്ചില്ലാതെ നിലനിര്‍ത്താന്‍ ഒന്നും ചെയ്യാതിരിക്കുന്ന ഒരാള്‍ താനായിരിക്കുമെന്ന് അടക്കംപറയുന്നുണ്ട് ഏയ്ഞ്ചല്‍. എല്ലാം ദൈവദാനമല്ലേ.... കൂള്‍ മൈന്‍ഡിനായി കൂള്‍ഡ്രിങ്ക്‌സ്, ഐസ്‌ക്രീം തുടങ്ങി സകലതും കഴിക്കും. താനൊരു വായാടിയായിപ്പോയതില്‍ തെല്ലൊന്നുമല്ല പലരുടെയും ചീത്തവിളി കിട്ടുന്നത്, സാധാരണ ഡബ്ബിങ്ങ് ആര്‍ട്ടിസ്റ്റുമാര്‍ ലോ പിച്ചില്‍ മാത്രമേ സംസാരിക്കാന്‍ പാടുള്ളൂവെന്നാണ് സ്റ്റുഡിയോ ചട്ടമെങ്കിലും ഹൈ പിച്ച് സംസാരത്തിന്റെ തോഴിയുമാണ് എയ്ഞ്ചല്‍.
എല്ലാ നടിമാരും അവരവരുടെ ശബ്ദത്തില്‍ തന്നെ ഡബ്ബ് ചെയ്തു കാണാനിഷ്ടപ്പെടുന്നൊരാള്‍കൂടിയാണ് ഏയ്ഞ്ചല്‍...ഓരോരുത്തര്‍ക്കും വ്യത്യസ്തമായ ശബ്ദവും സ്‌റ്റൈലുമുണ്ടല്ലോ....ഇപ്പോള്‍ അന്യഭാഷാനടിമാരെ കാസ്റ്റ് ചെയ്യുന്ന ട്രെന്‍ഡ് തന്നെ പ്പോലുള്ള ഡബ്ബിങ് ആര്‍ട്ടിസ്റ്റുമാരെ കുറച്ചൊന്നുമല്ല തുണയ്ക്കുന്നതെന്നാണ് എയ്ഞ്ചലിന്റെ പക്ഷം.

കോളേജില്‍ കോഴ്‌സ് കോ-ഓര്‍ഡിനേറ്റര്‍

സിനിമയില്‍ തിരക്കേറുന്നുണ്ടെങ്കിലും സേക്രഡ് ഹാര്‍ട്ട് കോളേജിലെ കമ്മ്യൂണിക്കേഷന്‍ വിഭാഗം കോഴ്‌സ് കോ-ഓര്‍ഡിനേറ്റര്‍ കൂടിയാണ് പാലാരിവട്ടം ജോയി-സലോമി ദമ്പതിമാരുടെ ഒറ്റമകളായ എയ്ഞ്ചല്‍. സെന്റ് തെരേസാസിലെ ഡിഗ്രിവരെയുള്ള പഠനശേഷം കേരള പ്രസ് അക്കാദമിയില്‍ നിന്നും പബ്ലിക് റിലേഷന്‍ ഡിപ്ലോമയും കൈക്കലാക്കിക്കഴിഞ്ഞു ഈ ശബ്ദസൗകുമാര്യം. മുന്‍ നിര ഫിലിം എഡിറ്ററായ ഭര്‍ത്താവ് കിഷോര്‍ കാഞ്ഞിരപ്പള്ളിക്കൊപ്പം ചക്കരപറമ്പിലാണ് സിനിമകളിലെ ശബ്ദസാന്നിദ്ധ്യമായ എയ്ഞ്ചലിന്റെ താമസം.