MATHRUBHUMI RSS
Loading...
മധുരപ്പൂത്തിരി

പരമ്പരാഗത ഗുജറാത്തി പലഹാരങ്ങള്‍ ഒരുക്കുന്നതെങ്ങനെയെന്ന് നോക്കാം. തയ്യാറാക്കിയത്: രഞ്ജന്‍ എം.വി, കോഴിക്കോട്


പൂരി വിത് ശ്രീകണ്ഠ്


പൂരി തയ്യാറാക്കാന്‍
ആവശ്യത്തിന് ഗോതമ്പ് മാവെടുത്ത് ഉപ്പും ഒരു ടേബിള്‍ സ്പൂണ്‍ എണ്ണയും കുറച്ച് വെള്ളവും ചേര്‍ത്ത് കുഴയ്ക്കുക. ചെറിയ ഉരുളകളാക്കണം. ഓരോന്നും ചെറിയ പപ്പടത്തിന്റെ വലുപ്പത്തില്‍ നേര്‍മ്മയായി പരത്തിവെക്കുക. എണ്ണ ചൂടാകുമ്പോള്‍ വറുത്തെടുക്കുക.
ശ്രീകണ്ഠ് തയ്യാറാക്കാന്‍
പാല്‍ ഒരു ലിറ്റര്‍
പഞ്ചസാര 500 ഗ്രാം
തൈര് ഒരു ടേ.സ്പൂണ്‍

പാല്‍ നന്നായി തിളപ്പിക്കുക. തണുത്താല്‍ അതിലേക്ക് ഒരു ടേബിള്‍ സ്പൂണ്‍ തൈര് ഒഴിക്കുക. കുറച്ച് സമയം കഴിഞ്ഞാല്‍ പാല് തൈരായി മാറും. നേര്‍ത്ത പരുത്തിത്തുണിയില്‍ ഈ തൈര് ഒഴിച്ച് കെട്ടിത്തൂക്കുക. മൂന്ന് മണിക്കൂര്‍ കഴിഞ്ഞ് കിഴി തുറക്കാം. വെള്ളം മുഴുവന്‍ വാര്‍ന്നിരിക്കും. കട്ടിത്തൈര് പാത്രത്തിലേക്ക് മാറ്റി, പഞ്ചസാര,കുങ്കുമപ്പൂ,ഏലക്കായപ്പൊടി എന്നിവ ചേര്‍ത്ത് നന്നായി യോജിപ്പിക്കുക. ഏലക്കായ പൊടിച്ചതും ബദാമും പിസ്തയും മുകളില്‍ വിതറി അരമണിക്കൂര്‍ ഫ്രിഡ്ജില്‍ സൂക്ഷിക്കുക.

ഷീര

റവ ഒരു കപ്പ്
നെയ്യ് ഒരു കപ്പ്
പഞ്ചസാര ഒരു കപ്പ്
പാല് രണ്ട് കപ്പ്
ബദാം,കിസ്മിസ്,ഏലക്കായപ്പൊടി കുറച്ച്

നെയ്യ് ചൂടാക്കുക.റവ ഇട്ട് പത്ത് മിനുട്ടോളം, തവിട്ട് നിറം വരും വരെ നന്നായി ഇളക്കുക. പാല്‍ ഒഴിച്ച് വീണ്ടും നന്നായി ഇളക്കുക. പഞ്ചസാര ചേര്‍ക്കുക.വാങ്ങി, മറ്റൊരു പാത്രത്തിലേക്ക് മാറ്റി മുകളില്‍ ബദാം,കിസ്മിസ്,ഏല ക്കായപ്പൊടി,പിസ്ത എന്നിവ വിതറുക.

മസാല സമോസ

ഉരുളക്കിളങ്ങ് ( അരിഞ്ഞത്) മൂന്ന്
സവാള (അരിഞ്ഞത്) മൂന്ന്
ഇഞ്ചി-പച്ചമുളക് പേസ്റ്റ് ഒരു ടീസ്പൂണ്‍
ഉപ്പ് ആവശ്യത്തിന്
ഗരംമസാല ഒരു ടേ.സ്പൂണ്‍
മൈദ മൂന്ന് കപ്പ്
എണ്ണ ആവശ്യത്തിന്

വറുക്കാനുള്ള എണ്ണ നന്നായി ചൂടായാല്‍ കടുകിട്ട് പൊട്ടിക്കുക. ഇതിലേക്ക് അരിഞ്ഞ ഉരുളക്കിഴങ്ങും സവാളയും വറുത്ത് കോരുക. മറ്റൊരു പാത്രത്തിലേക്കിട്ട് ഇഞ്ചി-പച്ചമുളക് പേസ്റ്റ്,ഗരംമസാല എന്നിവ ചേര്‍ക്കുക. തണുക്കാന്‍ വെയ്ക്കുക. മൈദ ഉപ്പും എണ്ണയും ചേര്‍ത്ത് മാവാക്കുക. കൊച്ചു ഉരുളകളാക്കുക. ഓരോന്നും ചെറിയ ചപ്പാത്തി വലുപ്പത്തില്‍ നേര്‍മ്മയായി പരത്തുക. നടു മുറിച്ച് അര്‍ദ്ധ വൃത്തങ്ങളാക്കണം. ഇനി കോണ്‍ രൂപത്തില്‍ മടക്കുക. കോണിന്റെ തുറന്ന ഭാഗത്തിലൂടെ നേരത്തെ തയ്യാറാക്കി വെച്ച മസാല നിറച്ച് മടക്കി ഒട്ടിക്കുക. ഓരോന്നായി വറുത്തെടുക്കുക.

ഖാണ്ട്‌വി

കടലമാവ് ഒരു കപ്പ്
തൈര് അര കപ്പ്
ഉപ്പ് ആവശ്യത്തിന്
മഞ്ഞള്‍പ്പൊടി ഒരു ടീസ്പൂണ്‍
എണ്ണ രണ്ട് ടേ.സ്പൂണ്‍
കറിവേപ്പില ഒരു കതിര്‍
തേങ്ങ ചിരവിയത് കാല്‍ കപ്പ്
മുളക്‌പൊടി ഒരു ടീസ്പൂണ്‍
വെള്ളം രണ്ട് കപ്പ്
മല്ലിയില അരിഞ്ഞത് ആവശ്യത്തിന്

കടലമാവ്, മഞ്ഞള്‍പ്പൊടി,ഉപ്പ്,തൈര്,വെള്ളം എന്നിവ ഒരു പാത്രത്തിലെടുത്ത് നന്നായി യോജിപ്പിക്കുക. പരന്ന വലിയ സ്റ്റീല്‍പ്പാത്രത്തില്‍ എണ്ണ പുരട്ടി, മാവ് പരത്തുക. അഞ്ച് മിനുട്ട് തണുക്കാന്‍ വെയ്ക്കുക. ഇനി പരത്തിയ മാവ് ചെറുതായി റോള്‍ ചെയ്‌തെടുക്കണം. റോളുകള്‍ ഒന്നര ഇഞ്ച് നീളത്തില്‍ മുറിച്ചെടുക്കുക. പാനില്‍ എണ്ണയൊഴിച്ച് കടുകും കറിവേപ്പിലയുമിട്ട് വറവുണ്ടാക്കുക. നേരത്തെ തയ്യാറാക്കി വെച്ച റോളുകളിലേക്ക് വറവും ചിരവിയ തേങ്ങയും മല്ലിയിലയും വിതറുക. മുളക് പൊടി മുകളില്‍ തൂവുക.

കാരറ്റ് ഹല്‍വ

കാരറ്റ് പൊടിയായി അരിഞ്ഞത് ഒരു കപ്പ്
പഞ്ചസാര ഒരു കപ്പ്
പാല്‍ ഒരു കപ്പ്
ഏലക്കായ പൊടിച്ചത്,
ബദാം,പിസ്ത കുറച്ച്

കാരറ്റ് പൊടിയായി അരിഞ്ഞതില്‍ തിളപ്പിച്ച പാല്‍ ഒഴിച്ച് ചെറുതീയില്‍ കുറുക്കുക. പാല്‍ വറ്റിവരുമ്പോള്‍ പഞ്ചസാര ചേര്‍ത്ത് ഇളക്കുക. മറ്റൊരു പാത്രത്തിലേക്ക് മാറ്റി, മുകളില്‍ ഏലക്കായപ്പൊടി, ബദാം,പിസ്ത എന്നിവ വിതറുക. തണുത്താല്‍ ഉപയോഗിക്കാം.

ബസുന്ദി

പാല് ഒരു ലിറ്റര്‍
പഞ്ചസാര 50 ഗ്രാം
ബദാം,ഏലക്കായപ്പൊടി,പിസ്ത കുറച്ച്

പാല്‍ നന്നായി കുറുക്കുക. ഇളം റോസ് നിറം വരുമ്പോള്‍ പഞ്ചസാര ചേര്‍ത്ത് വീണ്ടും തിളപ്പിക്കുക.അടുപ്പില്‍ നിന്ന് മാറ്റി ബദാം,ഏലയ്ക്കാപ്പൊടി,പിസ്ത എന്നിവ വിതറുക.

സാട്ട

മൈദ ഒരു കപ്പ്
നെയ്യ് രണ്ടര കപ്പ്
പഞ്ചസാര ആവശ്യത്തിന്
നെയ്യ് വറുക്കാന്‍
ഏലക്കായ അഞ്ച്
ബദാം, പിസ്ത അഞ്ച് വീതം

ഏലക്കായ, ബദാം എന്നിവ പൊടിച്ചതും നെയ്യും ചേര്‍ത്ത് മൈദ കുഴച്ച് വെയ്ക്കുക. മാവ്, ചെറിയ വട്ടങ്ങളാക്കി വെക്കുക. ഇതില്‍ തുളകളിടണം. നെയ്യ് ചൂടാക്കുക. സാട്ടകള്‍ ഓരോന്നായി ചുവക്കെ വറുത്ത് കോരുക. പഞ്ചസാരപ്പാനി തയ്യാറാക്കണം. സാട്ട പാനിയില്‍ മുക്കിയെടുത്ത് മീതെ ഏലക്കായ പൊടിച്ചതും ബദാമും വിതറുക.