MATHRUBHUMI RSS
Loading...
ബാച്ച്‌ലര്‍ പാര്‍ട്ടി

പാചകത്തിലെ തുടക്കക്കാര്‍ക്ക് എളുപ്പം പരീക്ഷിക്കാവുന്നതും രുചികരവുമായ ഏഴ് വിഭവങ്ങള്‍. പരിചയപ്പെടുത്തുന്നത് കൊച്ചി ലേ മെറീഡിയന്‍ എക്‌സി. സൂസ് ഷെഫ് ബി.ചന്ദ്രഭാനു...


ചപ്പാത്തി റോള്‍

ചപ്പാത്തി രണ്ടെണ്ണം
കാപ്‌സിക്കം (അരിഞ്ഞത്) ഒന്ന്
തക്കാളി (അരിഞ്ഞത്) ഒന്ന്
പനീര്‍ (അരിഞ്ഞത്) ഒരു കപ്പ്
മുളക് പൊടി ഒരു ടീസ്പൂണ്‍
ജീരകപ്പൊടി ഒരു ടീസ്പൂണ്‍
ചാട്ട് മസാല ഒരു ടീസ്പൂണ്‍
ഉപ്പ് ആവശ്യത്തിന്

സവാളയും തക്കാളിയും കാപ്‌സിക്കവും എണ്ണയില്‍ വഴറ്റുക. ഇതിലേക്ക് മസാലകളും പനീറും ചേര്‍ക്കുക. നന്നായി വഴറ്റിയശേഷം ഈ കൂട്ട് ചപ്പാത്തിയില്‍ വെച്ച് റോള്‍ ചെയ്ത് രണ്ടായി മുറിക്കുക.

മസാല ബോംബെ ടോസ്റ്റ്

ബ്രെഡ് കഷ്ണങ്ങള്‍ നാലെണ്ണം
മുട്ട രണ്ടെണ്ണം
മഞ്ഞള്‍പ്പൊടി അര ടീസ്പൂണ്‍
സവാള (അരിഞ്ഞത്) ഒരു കപ്പ്
തക്കാളി (അരിഞ്ഞത്) അര കപ്പ്
പച്ചമുളക് (അരിഞ്ഞത്) കാല്‍ കപ്പ്
കുരുമുളക് രണ്ട് ടീസ്പൂണ്‍

മുട്ട പൊട്ടിച്ചൊഴിച്ചതില്‍ സവാള, തക്കാളി, പച്ചമുളക്, മഞ്ഞള്‍പ്പൊടി, ഉപ്പ്, കുരുമുളക്‌പൊടി എന്നിവ ചേര്‍ക്കുക. ബ്രെഡ് കഷ്ണങ്ങള്‍ ഈ കൂട്ടില്‍ മുക്കി തവയില്‍ ഗ്രില്ല് ചെയ്‌തെടുക്കുക.

ബോയില്‍ഡ് എഗ് സാലഡ്

പുഴുങ്ങിയ മുട്ട നാലെണ്ണം
സവാള, പച്ചമുളക് (അരിഞ്ഞത്) രണ്ടെണ്ണം വീതം
മുളക് പൊടി ഒരു ടീസ്പൂണ്‍
കുരുമുളക്‌പൊടി ഒരു ടീസ്പൂണ്‍

സവാളയും പച്ചമുളകും ചേര്‍ത്ത് അതിലേക്ക് മുക്കാല്‍ സ്പൂണ്‍ വീതം കുരുമുളകും മുളകുപൊടിയും ഉപ്പും യോജിപ്പിക്കുക. മുട്ട ഓരോന്നും നാലായി മുറിക്കുക. സാലഡിന് മീതെ വെച്ച് അലങ്കരിക്കുക. ബാക്കി ഉപ്പും കുരുമുളകും മുളക് പൊടിയും മീതെ വിതറുക.

ബെസ്റ്റ് ഫ്രന്‍ഡ്‌സ് പാര്‍ട്ടി കറി

സോയ (കുതിര്‍ത്തത്) രണ്ട് കപ്പ്
ഉരുളക്കിഴങ്ങ് (രണ്ടായി മുറിച്ചത്) രണ്ട് കപ്പ്
തക്കാളി (അരിഞ്ഞത്) ഒന്ന്
മല്ലിപ്പൊടി ഒരു ടീസ്പൂണ്‍
മുളക്‌പൊടി ഒരു ടീസ്പൂണ്‍
പച്ചമുളക് (നുറുക്കിയത്) ഒന്ന്
മഞ്ഞള്‍പ്പൊടി അര ടീസ്പൂണ്‍
മല്ലിയില (അരിഞ്ഞത്) ഒരു കതിര്‍പ്പ്
കുരുമുളക് പൊടി ഒരു ടീസ്പൂണ്‍
കറിവേപ്പില ആറെണ്ണം
ചുവന്ന മുളക് രണ്ടെണ്ണം
തേങ്ങാപ്പാല്‍ ഒരു കപ്പ്

എണ്ണ ചൂടാക്കി കടുകിട്ട് പൊട്ടിച്ചശേഷം ചുവന്ന മുളക് ഇടുക. സവാള, തക്കാളി, പച്ചമുളക് എന്നിവ വഴറ്റുക. മല്ലിപ്പൊടി, മുളക് പൊടി, മഞ്ഞള്‍പ്പൊടി എന്നിവയും അല്‍പം വെള്ളവും ചേര്‍ത്ത് ഉരുളക്കിഴങ്ങ് വേവിക്കുക. ഇതിലേക്ക് സോയയും മല്ലിയിലയും ചേര്‍ത്ത്, ഗ്രേവി കുറുകുന്നതുവരെ വേവിക്കുക. ശേഷം ഉപ്പ്, കുരുമുളക് പൊടി എന്നിവയും തേങ്ങാപ്പാലും ചേര്‍ക്കുക. കറിവേപ്പില കൂടെയിട്ട ശേഷം നന്നായി തിളപ്പിക്കുക.

ബാച്‌ലേഴ്‌സ് ഡെസേര്‍ട്ട്

മുന്തിരി, പൈനാപ്പിള്‍, തണ്ണിമത്തന്‍ ആവശ്യത്തിന്
വേഫേഴ്‌സ് ആവശ്യത്തിന്
മില്‍ക്ക്‌മെയ്ഡ് ആവശ്യത്തിന്

ആദ്യം പഴങ്ങള്‍ നുറുക്കുക. ശേഷം ചിത്രത്തില്‍ കാണുന്നതുപോലെ അലങ്കരിക്കുക.

പൊട്ടെറ്റോ സാന്‍ഡ്‌വിച്ച്

വേവിച്ച ഉരുളക്കിഴങ്ങ് രണ്ടെണ്ണം
സവാള (അരിഞ്ഞത്) ഒന്ന്
പച്ചമുളക് (അരിഞ്ഞത്) ഒന്ന്
ഇഞ്ചി (അരിഞ്ഞത്) കാല്‍ സ്പൂണ്‍
ബ്രെഡ് കഷ്ണങ്ങള്‍ നാല്
നെയ്യ് രണ്ട് ടേബിള്‍ സ്പൂണ്‍

സവാള, പച്ചമുളക്, ഇഞ്ചി, ഉപ്പ്, കുരുമുളക്്, മഞ്ഞള്‍പ്പൊടി എന്നിവ ഒന്നിച്ചാക്കി വഴറ്റുക. ഉരുളക്കിഴങ്ങ് ചേര്‍ത്ത് ഉടയ്ക്കുക. ബ്രെഡ് കഷ്ണങ്ങള്‍ക്കിടയില്‍ ഉരുളക്കിഴങ്ങ് മസാല വെച്ച് തവയില്‍ നെയ്യ് പുരട്ടി ഗ്രില്‍ ചെയ്യുക. വാങ്ങി നാലായി മുറിക്കുക.

കൊത്ത് പൊറോട്ട

പൊറോട്ട രണ്ടെണ്ണം
സവാള (അരിഞ്ഞത്) ഒരു കപ്പ്
തക്കാളി (അരിഞ്ഞത്) ഒരു കപ്പ്
പച്ചമുളക് അഞ്ചെണ്ണം
മുട്ട രണ്ടെണ്ണം
ഉപ്പ് ആവശ്യത്തിന്
കുരുമുളക് രണ്ട് ടീസ്പൂണ്‍
എണ്ണ അഞ്ച് ടേബിള്‍ സ്പൂണ്‍
ചിക്കന്‍ കറി / വെജ് കറി പകുതി ഭാഗം

പൊറോട്ട ചെറു കഷണങ്ങളാക്കുക. ചിക്കന്‍ / വെജ് കറിയുടെ ഗ്രേവി മാത്രം എടുക്കുക. എല്ല് നീക്കിയ ചിക്കന്‍ ചെറു കഷണങ്ങളായി മുറിക്കുക. എണ്ണ ചൂടാക്കി പച്ചമുളക്, സവാള, തക്കാളി എന്നിവ വഴറ്റുക. മുട്ട, ഉപ്പ്, കുരുമുളക്, എന്നിവ ചേര്‍ത്ത് ഇളക്കുക. പൊറോട്ടകഷണങ്ങള്‍ ചേര്‍ക്കുക. ഗ്രേവി ചേര്‍ത്ത് വേവിക്കുക. പൊറോട്ട കഷണങ്ങള്‍ നന്നായി കുതിരണം. ചിക്കന്‍/വെജ് കഷണങ്ങള്‍ ചേര്‍ക്കുക.