MATHRUBHUMI HOME
NEWS LETTER
RSS
തിരഞ്ഞെടുത്ത എന്.സി.സി. കേഡറ്റുമാര്ക്കായി ഡല്ഹിയില് നടത്തിയ ഷൂട്ടിങ് മത്സരത്തില് കേരളത്തിനായി വെള്ളി മെഡല് നേടിയ, ചെറായിയിലെ മത്സ്യത്തൊഴിലാളി കുടുംബത്തില് നിന്നുള്ള ഐശ്വര്യയെക്കുറിച്ച്...
ചെറായി, സഹോദരന് മെമ്മോറിയല് ഹൈസ്കൂളില് ഒന്പതാം ക്ലാസ്സില് പഠിക്കുമ്പോഴാണ്, പള്ളിപ്പുറം പഞ്ചായത്തിലെ 23-ാം വാര്ഡില് കടപ്പുറം കൊറശ്ശേരി അനില്കുമാര്-ശ്രീജ ദമ്പതിമാരുടെ ഇളയ മകളായ ഐശ്വര്യ എന്.സി.സി.യില് ചേര്ന്നത്. തുടര്ന്ന്, ഷൂട്ടിങ്ങില് തീവ്രപരിശീലനം.സംസ്ഥാനതല മത്സരങ്ങളില് പങ്കെടുത്ത് സമ്മാനങ്ങള് വെടിവച്ചിട്ടു. കോഴിക്കോട്ട് നടന്ന ഷൂട്ടിങ് മത്സരത്തിലും ഐശ്വര്യ വിജയതീരമണഞ്ഞു.
ഒടുവില്, കോട്ടുവള്ളിക്കാട് എച്ച്.എം.വൈ.എച്ച്.എസ്.എസ്സിലെ പ്ലസ്വണ്ണില് എത്തിയപ്പോള് ദേശീയതലത്തില് കേരളത്തിനായി വെള്ളിത്തിളക്കവും ഈ കടലിന്റെ മകള് സ്വന്തമാക്കി. ഐശ്വര്യ എന്ന യുവ കായിക പ്രതിഭയുടെ നേട്ടത്തില് ഏറെ ആഹ്ലാദിക്കുകയാണ് ഈ കടലോരഗ്രാമം.
തങ്ങളുടെ ഇടയില് നിന്നൊരാള് ദേശീയതലത്തില് നേട്ടം കൊയ്തതിന്റെ ആഹ്ലാദത്തിലാണ് പ്രദേശവാസികള്. ഏറെ സാമ്പത്തിക പ്രതിസന്ധിയുണ്ടെങ്കിലും രണ്ട് പെണ്മക്കളെയും പഠിപ്പിച്ചെടുക്കാനുള്ള തീവ്രശ്രമത്തിലാണ് മത്സ്യത്തൊഴിലാളികളായ അച്ഛനും അമ്മയും. സഹോദരി അശ്വതി, ചെറായി എസ്.എം.എച്ച്.എസ്.എസ്. പ്ലസ്ടു വിദ്യാര്ത്ഥിനിയാണ്.
