പച്ചക്കുരുമുളകും കാന്താരിയും പിന്നെ നെല്ലിക്കയും ചേര്‍ന്നൊരു രസതന്ത്രം. എരിവിന്റെ കൊടുമുടിയില്‍ തിളച്ചുമറിഞ്ഞ് ദിവസങ്ങള്‍ കഴിയുമ്പോള്‍ നെല്ലിക്കയൊരു കരിക്കുടുക്കയാകും. മേമ്പൊടിയായി ഇഞ്ചിയും കറിവേപ്പിലയുമൊക്കെ ചേര്‍ന്നാല്‍ മോളീസ് സ്‌പെഷല്‍ കരിനെല്ലിക്കയായി.

നല്ല പച്ചനെല്ലിക്ക കണ്ടുശീലിച്ച പുതുതലമുറ കരിനെല്ലിക്കയെന്ന് കേട്ട് മുഖംചുളിക്കും. പക്ഷേ ഒന്ന് രുചിച്ചാല്‍ രസികനെന്ന് ആരും തലകുലുക്കി സമ്മതിക്കുമെന്നാണ് മോളിയുടെ പക്ഷം.

രുചിയുടെ രസങ്ങളെല്ലാം സമ്മേളിക്കുന്ന വ്യത്യസ്തന്‍മാര്‍ വേറെയുമുണ്ട് മോളിയുടെ ശേഖരത്തില്‍. ഇടിയിറച്ചി, കപ്പ വിളയിച്ചത്, ചക്കയുണ്ട...ലിസ്റ്റ് നീളും. അന്യം നിന്നുപോകുന്ന നാടന്‍രുചികള്‍ 'റെഡി ടു ഈറ്റ്' എന്ന ആധുനികഭാവത്തില്‍ വിപണിയില്‍ അവതരിപ്പിക്കുകയാണ് മോളി പുന്നന്‍ എന്ന സംരംഭക. നാടന്‍വിഭവങ്ങള്‍ക്കൊപ്പം മോര്‌പൊടി, ചിക്കന്‍ പൊടി, ബീഫ് പൊടി, ഫിഷ് പൊടി...എന്നീ ചേരുവകളും വിപണിയില്‍ അവതരിപ്പിക്കുന്നുണ്ട്, മരിയാസ് ഹോംമെയ്ഡ്‌സ് എന്ന ബ്രാന്‍ഡില്‍.

കാച്ചിയ മോരുണ്ടാക്കാനുള്ള ചേരുവകളാണ് മോരുപൊടി. മോര് അടിച്ചെടുത്തശേഷം ഈ ചേരുവകളും ചേര്‍ത്ത് തിളപ്പിച്ചാല്‍ കോട്ടയം സ്‌റ്റൈല്‍ കാച്ചിയ മോര് റെഡി. ചിക്കനും മീനുമെല്ലാം എളുപ്പവഴിയില്‍ പാകപ്പെടുത്താന്‍ ഈ പൊടിക്കൂട്ടുകള്‍ മതി.

നാടന്‍ ശേഖരത്തില്‍പെടുത്തി 187 വിഭവങ്ങള്‍ ഇവര്‍ വിപണിയില്‍ അവതരിപ്പിച്ചിട്ടുണ്ട്. ഇവയില്‍ ചിലത് ഓര്‍ഡറനുസരിച്ച് മാത്രമാണ് തയ്യാറാക്കുന്നതെന്ന് മാത്രം. പീരുമേട് പാമ്പനാര്‍ ബത്‌ലഹേം ഫാംസില്‍ മോളിക്കു കീഴില്‍ ഒരു ചെറിയ പാചക യൂണിറ്റുണ്ട്. തദ്ദേശിയരായ ഒട്ടേറെ പേര്‍ ഇവിടെ ജോലി ചെയ്യുന്നു. ഉപയോഗശൂന്യമെന്ന് കരുതി വലിച്ചെറിയുന്നവയില്‍ നിന്നാണ് മരിയാസിന്റെ പല സ്‌പെഷല്‍ വിഭവങ്ങളും ഒരുങ്ങുന്നത്.

നന്നായി പഴുത്തുകഴിഞ്ഞാല്‍ ഉപയോഗശൂന്യമെന്നാണ് വ്യാപാരികള്‍പോലും ഏത്തക്കായെ വിശേഷിപ്പിക്കുന്നത്. എന്നാല്‍ ഈ പഴം കൊണ്ട് രുചികരമായ സിറപ്പുണ്ടാക്കാമെന്ന് മോളി പറയുന്നു. വെറുതെ വലിച്ചെറിയുന്ന മാതളത്തൊണ്ടു കൊണ്ട് വിനാഗിരി, പാഷന്‍ഫ്രൂട്ടില്‍നിന്ന് ജ്യൂസ്, ചക്ക വരട്ടിയതും ഉണ്ടയും, പാളയംകോടന്‍ പഴത്തിന്റെ ജാം...വിഭവങ്ങള്‍ നീളുന്നു.

ഭക്ഷണവിപണിയില്‍ മോളിക്കിത് കന്നിഅങ്കമല്ല. 1981 മുതല്‍ മരിയാസ് എന്ന പേരില്‍ കാറ്ററിങ് സര്‍വീസ് നടത്തുന്നുണ്ട്. ഇടക്കാലത്തൊന്ന് പ്രൗഢി നഷ്ടമായ മരിയാസിനെ വീണ്ടും പഴയ പ്രഭാവത്തിലേക്ക് തിരിച്ചുകൊണ്ടുവരാനുള്ള ശ്രമത്തിലാണ് മോളി ഇപ്പോള്‍. ഇതിനൊപ്പം ഹോംമെയ്ഡ്‌സിന്റെ വിപണി വ്യാപിപ്പിക്കാനുള്ള ശ്രമങ്ങളും. പാഷന്‍ഫ്രൂട്ട്, പപ്പായ, കാന്താരി മുളക് തുടങ്ങിയവ സ്വന്തം സ്ഥലത്ത് നട്ടുവളര്‍ത്തുന്നുമുണ്ട്. എന്നും ഇവയുടെ ലഭ്യത ഉറപ്പുവരുത്താനാണിത്.

മരിയാസ് ബ്രാന്‍ഡ് ഉല്‍പ്പന്നങ്ങള്‍ക്ക് ഇന്ത്യയുടെ പലഭാഗങ്ങളിലും വിപണിയുണ്ട്. കേരളത്തിനകത്ത് തിരഞ്ഞെടുത്ത കടകള്‍ വഴി മാത്രമാണ് വില്‍പ്പന.

നിലവില്‍ എറണാകുളത്ത് പനമ്പിള്ളി നഗറിലെ എസ്.ക്യൂവില്‍ ഇവ വാങ്ങാന്‍ കിട്ടും. തൃപ്പൂണിത്തുറയിലെ ഒരു കടയിലും താമസിയാതെ മരിയാസ് ഉല്‍പ്പന്നങ്ങള്‍ ലഭിക്കും.