kaduthuruthi
കടുത്തുരുത്തി വാലാച്ചിറയിലെ സര്‍ക്കാര്‍
വിത്തുത്പാദന കേന്ദ്രത്തിലെ ജനല്‍ചില്ലില്‍
സ്റ്റിക്കര്‍ പതിച്ചനിലയില്‍
കടുത്തുരുത്തി: ജനല്‍ ചില്ലുകളില്‍ കറുത്ത സ്റ്റിക്കര്‍ പതിച്ചത് നാട്ടുകാരെ വീണ്ടും ഭീതിയിലാഴ്ത്തുന്നു. കടുത്തുരുത്തി വാലാച്ചിറയിലെ സര്‍ക്കാര്‍ വിത്തുത്പാദന കേന്ദ്രത്തിലും കുറുപ്പന്തറയിലെ പാറ്റാംകുന്നേല്‍ ഷാജിയുടെ വീട്ടിലുമാണ് കറുത്ത സ്റ്റിക്കര്‍ പതിച്ചിരിക്കുന്നത്. ചൊവ്വാഴ്ച രാവിലെയാണ് സ്റ്റിക്കര്‍ കണ്ടത്.

വിത്തുത്പാദന കേന്ദ്രത്തിലെ ജീവനക്കാരുടെ രണ്ടിടത്തെ വിശ്രമമുറികളുടെ ജനലുകളിലാണ് സ്റ്റിക്കര്‍ പതിച്ചിരിക്കുന്നത്. പുലര്‍ച്ചെ സുരക്ഷാ ജീവനക്കാരനാണ് സ്റ്റിക്കര്‍ പതിച്ചിരിക്കുന്നത് കണ്ടത്. തുടര്‍ന്ന് അഗ്രികള്‍ച്ചറല്‍ അസിസ്റ്റന്റ് ഡയക്ടര്‍ പോലീസില്‍ വിവരമറിയിക്കുകയായിരുന്നു. രണ്ട് സ്ഥലങ്ങളിലും സി.ഐ. കെ.പി. തോംസണിന്റെ നേതൃത്വത്തില്‍ പരിശോധന നടത്തി.

പേടിവേണ്ട

ഫൊറന്‍സിക് വകുപ്പ് ഉദ്യോഗസ്ഥര്‍ പരിശോധന നടത്തും. മുമ്പ് പലയിടത്ത് കണ്ടവയെല്ലാം ജനല്‍ചില്ലുകള്‍ പൊട്ടാതിരിക്കാന്‍ ഒട്ടിച്ച സ്റ്റിക്കറുകളാണെന്ന് ബോധ്യപ്പെട്ടിട്ടുണ്ട്. വിത്തുത്പാദന കേന്ദ്രത്തിലെ ജനലില്‍ പതിച്ചിരിക്കുന്ന സ്റ്റിക്കര്‍ നിലത്തുനിന്ന് ഒട്ടിക്കുവാന്‍ കഴിയാത്ത രീതിയില്‍ ഉയരത്തിലുള്ളവയാണ്. -കെ.പി. തോംസണ്‍ (കടുത്തുരുത്തി സി.ഐ.)