പണിക്കന്‍ കുടി: കൊന്നത്തടി പഞ്ചായത്തിലെ കാറ്റാടിപ്പാറ സഞ്ചാരികള്‍ക്കായി കാത്തിരിക്കുന്നു. ജില്ലയിലെ ചെറുകിട വിനോദസഞ്ചാര മേഖലകളില്‍ മുന്‍നിരയിലാണ് കാറ്റാടിപ്പാറ പ്രദേശങ്ങള്‍. ഗതാഗാതസൗകര്യമുണ്ടായാല്‍ ഇവിടേക്ക് ദിനം തോറും നൂറുകണക്കിന് സഞ്ചാരികളെത്തിച്ചേരും. പെരിഞ്ചാംകുട്ടിയിലെ മുളങ്കാടുകളുടേയും പുഴയുടേയും വശ്യസൗന്ദര്യം കാറ്റാടിപ്പാറയില്‍ നിന്നാല്‍ ആസ്വദിക്കാന്‍ കഴിയും. മൂന്നാര്‍ പള്ളിവാസല്‍ കൈലാസം, കത്തിപ്പാറ, മാവടിമലനിരകള്‍, പാമ്പളവന മേഖല വാത്തിക്കുടി, തോപ്രാംകുടി പ്രദേശങ്ങള്‍ എന്നിവ വിദൂരകാഴ്ചകളാണ്. കാറ്റാടിപ്പാറയില്‍ നിന്നു നോക്കിയാല്‍ കാണുന്ന സൂര്യാസ്തമയം അപൂര്‍വ്വാനുഭവം സമ്മാനിക്കും. ട്രക്കിംഗ് പോലുള്ള സാഹസീക വിനോദസഞ്ചാര സാധ്യതകളും ഇവിടെയുണ്ട്. ഇരുപത്തിനാലുമണിക്കൂറും കാറ്റു വീശുന്ന ഇവിടെ കാറ്റില്‍ നിന്ന് വൈദ്യുതി ഉല്പാദിപ്പിക്കാനും കഴിയും. പണിക്കല്‍കുടി മുള്ളരിക്കുടി റോഡില്‍ നിന്നും കാറ്റാടിപ്പാറയിലേക്കുള്ള രണ്ടരകിലോമീറ്റര്‍ റോഡിന്റെ ഒരു കിലോ മീറ്റര്‍ ഭാഗം മാത്രമാണ് ടാറിങ് നടത്തിയിട്ടുള്ളത്. റോഡ് ഗതാഗതയോഗ്യമാക്കുകയുംമലമുകളില്‍ സഞ്ചാരികള്‍ക്കു വേണ്ട അടിസ്ഥാന സൗകര്യങ്ങള്‍ ഏര്‍പ്പെടുത്തുകയും ചെയ്താല്‍ കാറ്റാടിപ്പാറയ്ക്ക് വിനോദസഞ്ചാര കേന്ദ്രങ്ങളില്‍ മുഖ്യസ്ഥാനം ലഭിക്കും.