ല്ലെങ്കിലും ഈ നാടന്‍ പലഹാരങ്ങള്‍ക്ക് രുചി ഒരല്‍പം കൂടുതലാ... നിങ്ങള്‍ക്കും തോന്നിയിട്ടില്ലേ അങ്ങനെ. വായില്‍ വച്ചാല്‍ തന്നെ അലിഞ്ഞു പോകുന്ന തരം കിണ്ണത്തപ്പം ഉണ്ടാക്കാന്‍ അമ്മയെക്കൊണ്ടേ പറ്റൂ എന്നു ഒരു തവണയെങ്കിലും നിങ്ങളും പറഞ്ഞിട്ടില്ലേ.

കിണ്ണത്തപ്പം വീട്ടില്‍ ഉണ്ടാക്കി നോക്കാത്തവര്‍ ഇനിയുമുണ്ടോ, ഉണ്ടെങ്കില്‍ ഇന്നു തന്നെ ഉണ്ടാക്കി നോക്കിയാലോ, ഇതാ കിണ്ണത്തപ്പം ഉണ്ടാക്കുന്ന വിധം. 

ചേരുവകള്‍ 
1 കപ്പ് അരിപ്പൊടി വരുത്തത് 
3 കപ്പ് തേങ്ങ ചുരണ്ടിയത് 
1 കപ്പ് പഞ്ചസാര 
1 ടീസ്പൂണ്‍ നെയ്യ് 
1 ടീസ്പൂണ്‍ ഏലയ്ക്കാപ്പൊടി 
ആവശ്യത്തിന് ഉപ്പ് 

തയ്യാറാക്കുന്ന വിധം 
ചുരണ്ടി വച്ചിരിക്കുന്ന തേങ്ങയില്‍ ആവശ്യത്തിന് വെള്ളം ചേര്‍ത്ത് നല്ലവണ്ണം അടിച്ചെടുക്കുക എന്നതാണ് ആദ്യപടി. ഇതില്‍ നിന്നും ഏകദേശം ഒന്നര കപ്പോളം കട്ടിയുള്ള തേങ്ങാപ്പാല്‍ അരിച്ചെടുത്ത് മാറ്റിവയ്ക്കണം. 

ഒട്ടും തരിയില്ലാത്തവിധം വേണം അരിപ്പൊടി വറുത്തത് അരിച്ചെടുക്കാന്‍. ഇതിലേക്ക് തേങ്ങാപ്പാല്‍ ഒഴിച്ച് തീരെ കട്ടയില്ലാത്തവിധം നന്നായി ഉടച്ച് കലക്കി വയ്ക്കുക. ഇനി ഇതിലേക്ക് പഞ്ചസാര, ഉപ്പ്, ഏലയ്ക്കാപ്പൊടി എന്നിവ കൂടി ചേര്‍ത്തിളക്കുക. 

ഈ കൂട്ട് ഏകദേശം അര മണിക്കൂറോളം അനക്കാതെ മാറ്റി വയ്ക്കണം. ഇനി ഒരു കിണ്ണത്തില്‍ അല്ലെങ്കില്‍ ഇത്തിരി കുഴിയുള്ള ഒരു പ്ലേറ്റില്‍ കുറച്ച് നെയ്യ് പുരട്ടി എടുക്കുക. ഈ പാത്രത്തിലേക്ക് നേരത്തേ തയ്യാറാക്കി വച്ചിരിക്കുന്ന കൂട്ട് ഒഴിക്കുക. 

ഇത് ഒരു പ്രഷര്‍ കുക്കറിലോ അപ്പച്ചെമ്പിലോ വെച്ച് ആവി കയറ്റി വേവിച്ചെടുക്കുക. സ്വാദിഷ്ടമായ കിണ്ണത്തപ്പം തയ്യാര്‍. പാത്രം അടുപ്പില്‍ നിന്നും വാങ്ങിവച്ച് അപ്പത്തിന്റെ ചൂട് ശരിക്കും പോയ ശേഷം മാത്രമേ കഷണങ്ങള്‍ ആക്കാവൂ അല്ലെങ്കില്‍ പൊടിഞ്ഞു പോകും.