Engineeringതിരുവനന്തപുരം: സാങ്കേതികസർവകലാശാലയിൽ പരീക്ഷാഫലം മാസങ്ങൾ വൈകുന്നതും അശാസ്ത്രീയമായ ‘ഇയർ ഔട്ട്’ സംവിധാനവും വിദ്യാർഥികളെ വലയ്ക്കുന്നു. എല്ലാ വിഷയവും ജയിക്കാതെ അടുത്ത സെമസ്റ്ററിലേക്ക് പ്രവേശനം ലഭിക്കാത്ത ഇയർ ഔട്ട് സംവിധാനം നിലനിൽക്കുന്നതിനാൽ പഠനം തുടരാനാകാത്ത സ്ഥിതിയിലാണ് സംസ്ഥാനത്തെ എൻജിനീയറിങ് വിദ്യാർഥികളിൽ പലരും.

പരീക്ഷാഫലം വൈകുന്നതും ഇയർ ഔട്ടിന് കാരണമാകുന്നുണ്ട്. ഒരുവർഷം നഷ്ടപ്പെടുന്ന  അവസ്ഥയാണെന്ന് വിദ്യാർഥികൾ പരാതിപ്പെടുന്നു. പ്രധാന പരീക്ഷയുടെയും സപ്ലിമെന്ററി പരീക്ഷയുടെയും ഫലം കൃത്യമായി പ്രസിദ്ധീകരിക്കാൻ സാങ്കേതികസർവകലാശാലയ്ക്ക് കഴിയുന്നില്ല. പരീക്ഷാ നടത്തിപ്പും ഫലപ്രഖ്യാപനവും ഓൺലൈനിലൂടെയാണ്. ഇതിനുള്ള സോഫ്റ്റ്‌വേർ സ്വകാര്യ കമ്പനിയാണ് വികസിപ്പിച്ചത്. സ്വകാര്യ ഏജൻസിക്ക് തന്നെയാണ് നടത്തിപ്പുചുമതലയും.

ഇതിലെ തകരാറാണ് ഫലപ്രഖ്യാപനം വൈകിക്കുന്നതെന്നാണ് പരാതി. ആദ്യം ഫലംവരുമ്പോൾ മെച്ചപ്പെട്ട മാർക്ക് കിട്ടേണ്ട വിഷയങ്ങൾക്ക് തോറ്റെന്ന് രേഖപ്പെടുത്തിയ സംഭവങ്ങളുണ്ടായി. പുനർമൂല്യനിർണയത്തിന് നൽകിയപ്പോൾ മെച്ചപ്പെട്ട മാർക്ക് പലർക്കും ലഭിച്ചു. പരീക്ഷാനടത്തിപ്പിൽനിന്ന് സ്വകാര്യ ഏജൻസിയെ മാറ്റണമെന്ന് വിദ്യാർഥികൾ ആദ്യംമുതൽ ആവശ്യപ്പെടുന്നുണ്ട്. മുൻവർഷം ഇതിന്റെപേരിൽ സമരവുമുണ്ടായി. സാങ്കേതികസർവകലാശാലയിൽ പരീക്ഷാ നടത്തിപ്പിനുവേണ്ട സംവിധാനമോ ജീവനക്കാരോ ഇല്ല. 

മുൻസെമസ്റ്ററിലെ പേപ്പറുകളെല്ലാം പാസായാലേ അടുത്ത സെമസ്റ്ററിലേക്ക് പ്രവേശനം ലഭിക്കൂ. തോൽക്കുന്ന വിഷയങ്ങൾക്ക് സപ്ലിമെന്ററി പരീക്ഷ എഴുതാം. കൃത്യസമയത്ത് പരീക്ഷ, ഏതാനും ദിവസങ്ങൾക്കുള്ളിൽ ഫലപ്രഖ്യാപനം, താമസിയാതെ സപ്ലിമെന്ററി എന്നിങ്ങനെ കൃത്യമായ പട്ടിക പ്രസിദ്ധീകരിച്ചെങ്കിലും ഇതിനനുസരിച്ച് ഫലം പ്രഖ്യാപിക്കാൻ കഴിയുന്നില്ല. 

സപ്ലിമെന്ററി പരീക്ഷയുടെ ഫലവും മാസങ്ങൾ വൈകുന്നു. സെമസ്റ്ററിലെ എല്ലാ വിഷയങ്ങളുടെയും ഫലം ഒരുമിച്ചല്ല പ്രസിദ്ധീകരിക്കുന്നത്. ഇതും ഫലപ്രഖ്യാപനം അപൂർണമാക്കുന്നു. നാലാം സെമസ്റ്റർവരെയുള്ള പേപ്പറുകൾ എഴുതി ജയിക്കാൻ ആറാം സെമസ്റ്റർവരെ അവസരം നൽകണമെന്നാണ് അധ്യാപകരുടെയും അഭിപ്രായം.

കോഴ്‌സ് ഉപേക്ഷിച്ചുപോകുന്ന വിദ്യാർഥികൾ നാലുവർഷത്തെ ഫീസ് പിഴയായി നൽകണമെന്ന വ്യവസ്ഥയും നിലവിലുണ്ട്. പഠനം തുടരാനും അവസാനിപ്പിക്കാനും വയ്യാത്ത സ്ഥിതിയിലായവരുമുണ്ട്.  പ്രശ്നങ്ങളെക്കുറിച്ച് ബോധ്യമുണ്ടെങ്കിലും കൃത്യമായ ഉത്തരം നൽകാൻ സർവകലാശാലാ അധികൃതർക്കാകുന്നില്ല. മുടങ്ങിയ ഫലം എപ്പോൾ പ്രഖ്യാപിക്കുമെന്നത് സംബന്ധിച്ചും അവ്യക്തതയാണ്.